Gɛlaɠaa 16

Timote ə hvilɛn Polə da Silasə di pulu

1Polə ə həli Dɛrbe, da Listrə, kalan non da ə kɛ laa, diɛ kɛ mą: Timote, nee ə kɛ a Ɉuifə mun da, laa na laa ə ɓo ɲəi; nąn ə ɓo a Grɛkə mun. 2Listrə, da Ikoniumə kalan nɛa di kɛli Timote laa pələ lɛlɛɛ ɓo. 3Polə ə kɛ bɔ da yaa di li, ya ɓə gɛ, ə ɉəɠə, ə ɉee kɛ́nɛ̨ ɓa, Ɉuifəɠaai kɛ laa gbinįn ɉu, di mąą mɛ̨nį ɓa. Gəlee di kɛ gɔlɔn diɛ kɛ, Timote nąn gaa a Grɛkə mun. 4Daaɠaai Polə da Silasə di kɛli tɛɛ di hu, dɔnŋaai gɛlaɠaa da galanɉonŋaa di kaa Ɉerusalɛmə di naa, di kɛli ɉukulɔ, ɛlɛɛ, diɛ kɛ diɛ: Mąąnɛ̨ɛ̨ di di pɔ yíiɓo. 5Gbɔn ɉu nuą, hvaŋą ta ə kɛli pɛlɛ mą, di kpulu hu yɛ kɛnɛ̨ a yələ kəlee.

Yálá ə Polə təli Masedoanə lɔi hu

6Polə da Silasə di Frizi lɔi da Galatə lɔi hu hiɛ, mąąhɔlɔɓo, Nįį-Mąąhəɠɛɛ aa kɛ kpɛ̨ąn di tɔwɔ Yálá lawoo laa həli mɛ̨nį ɓa Asi lɔi hu. 7Di həliɛ Misi lɔi ɲɛ̨n ma, di kɛ bɔ də li Bitini lɔi hu, kɛlaa, Jesus nwɔ Nįį hvo hvaa mą. 8Di Misi lɔi hu ɓɔ, di yɛɛ Troasə. 9Kpini ta, Polə ə hįi kaa, Masedoanə nɔi mun da yɛ nɛ̨ɛ̨mąą hvə mą, yɛ kɛ mą: «'Tɛɛ Masedoanə pələ, ə́ ku mąąkpɔn mąąɓo.» 10Ɉįi ti kaa pulu, ɲąąɓa, ku pələ kwəli kpɔlɔɔ ti mą, kuɔ li Masedoanə lɔi hu pələ. Mąąhɔlɔɓo, ku gaa, kuɔ, Yálá aa ku təli, yɛ kɛ, ku nwəlɛɛ lɛlɛɛ laa həli laa.

Lidi ə ɲee hee gu Nąmu mąą mɛ̨nį mu Filipə daai

11Ku nɛɛmą, ku tɛ kələn da hu Troasə, ku ɉaŋąn a Samotrasə pələ, mąą yələ laa ɓoɔ, kwəli Neapolisə daai, 12ku həɠə laa, kwəli Filipə daai, yai a Masedoanə lɔi daa-lee, yɛ ɓo Romə nuą yee mu. Ku yíikuu ta wolo kɛ daai ti hu. 13Hvįįtɔɔ yələ, ku kulɔ daai, kwə li ya ta kwɛlɛ, a lɔ ku kwəi, ku kaa lii Yálá hvɛlii ta kaai. Ku lɔ ku hee, nɛ̨ąɠaa ti da kɛ di ɲąąkpɔn ɉii laa, ku pələ pili diɛ. 14Nɛ̨ąą ti dɔ̨nɔ̨ laa ɓaa kɛ a Lidi, a həɠə Tiatirə daai. Nįnį-kɔlɔ həɠə lɔwɔ́tɔɔmun ni, ə kɛli kwɛli hvilɛn Yálá ɓa. Nwəli tɔɔi kpɔ kɛ kpąą, gu Ną́mu aa kɛ hvaa mą, aa níi laa ɓo Polə woo tɔwɔ. 15Yii kɛa di Lidi mąąwaa, yaa da ɲəi bɛlɛ́n nuą kəlee. Ə ku təli, yɛ kuɔ: «Yɛ bələi kpɔ káá gáá a nui aa laa gu Ną́mu Jesus mąą mɛ̨nį lai, 'ká pa kani 'ká lɔ ɲə́i bɛlɛ́n.»

Ə ku kpaan di, ku hvaa mą.

Di Polə da Silasə ni too gaho ŋą Filipə daai Yálá ə di kulɔ laa

16Yələ ta, ku kɛɛ lii Yálá hvɛlii, kolo-kɛ nɛ̨ɛ̨non da ə pa ku laakwiɛn ɉii, ɲɛ̨ąkpɛ ɲįnɛ̨n da ə kɛ bulu. Ɲɛ̨ąkpɛ ɲįnɛ̨n ti, ə kɛli hɛn gɔw tiɛ̨ nąmįną diɛ kpɔ kɛnɛ̨. 17Nɛ̨ɛ̨nui ti ə hvilɛn kwa Polə ni ku pulu, yɛ tomą, yɛ kɛ mą: «Nuą ŋɛ̨i di kaa a yələkɔlɔn ɉu Yálá nwɔ tínuą, di kaa nu ɓalo kpaalə lɛi káá.»

18Ə kɛli gɛ ti hvolo tamąą yee mu. Gɛ pələi ti, Polə líí ə holi, ə tinɛ̨n yɛ ɲinɛ̨n ti ɓa: «Gáá moi yɛ́, Jesus Kristə laa hu, 'həɠə nɛ̨ɛ̨nui ŋɛ̨i pulu.»

Ɲąąɓa, ɲinɛ̨n ti ə nɛɛmą ə həɠə bulu. 19Ya ɓə nɛ̨ɛ̨nui ti nąmįną, gaai di mo diɛ kɛ, di wɔ hɛn gɔw hɔlɔɓoi aa kulɔ di yəi, di Polə da Silasə di hon, də li a diɛ gwəli hąą kɛnɛ̨ ɓa daa-nąmįną líí la. 20Di di tɔɔ giti tee nuą lii la, diɛ diɛ: «Nuą ŋɛ̨i, di kaa woo ɲąnwąną lɔi kuɔ taai hu, Ɉuifəɠaa ɓaa diɛ. 21Ɛlɛɛ, di kaa yíí nįnɛ̨ takpɛli lɛi nuą diɛ. Kuɔi a Romə nuą, ku hva pɛli hvaa yili ɓa, ku hva pɛli bɔ túwɔ́ ɓoi.»

22Nu kpulu ə muhəɠə di pɔ a hvaa, daa nwun nąmįną di mo, di Polə da Silasə di wɔ həɠəɠaai kulɔ di kwąną, ɛlɛɛ, di di kɛlɛ a galakpa. 23Yii kɛa di di kɛlɛ kpɔ ti a mɔlɔɔ, di di too gaho ŋą, diɛ gaho pɛlɛ́ mɛ̨i kaamun ma, ə ɲɛ̨i kɛ diɛ kpɔ a nɛlɛɛ. 24Yii kɛa di mo ti mą, ə di lɔ kpɔ gaho pɛlɛ́ kpon ɲą pələ; di di kɔ́wɔ lɔ kpɔnɔ̨ hu.

25Kwii hąą ɓɛlaɓoi lɔwai, Polə da Silasə di kɛi Yálá hvɛli, diɛ Yálá mąątɛ̨nɛ̨ wələ too, gaho nąmįną yiiɠaa ti diɛ di woo mɛ̨n. 26Di lɛɛ lɔ laa, lɔ tii ɲąąɓa, nɔi ə kpɛlin gbɔ a nwalawalaa, bɛlɛ́ kɔwɔ hvilɛn ɉii ə kpɛlin. Gbon gəlee laa ə ɓo nąąlɔwai, gaho nąmįną kəlee di wɔ kpɔnɔ̨ɠaa di tee diɛ. 27Nui kɛi ɲɛ̨i kɛ gaho nąmįną diɛ, ə nwun nɔ tanɔ̨n wúlú, ə gbonŋaa kaa naaɓoɔ, ə kɛ gwəi, gaho nąmįną daa pu, ə nwɔ ɓowai kulɔ daa hu 28Kɛlaa, Polə ə tomą kpɔ mɛ̨i a nwoo kɛnɛ̨, yɛ mą: «Hvó kɛ ə́ kaa mɛ̨nį ta kɛ a ə́ kpɔwɔ, ku kəlee ku kaa ɓɛ.»

29Ɉulɔnui ti, ə mo di pa a nwɔ̨n, ə nɛɛmą ə gilɛ həɠə yɛ lɔ gaho pɛlɛ́ mu, mąą yɛ kpɛlin, ə li, ə pɛlɛ Polə da Silasə di kɔ́wɔ mu. 30Yili pulu, ə di kulɔ, yɛ diɛ: «Ną́nni! Lə ɓə mąąnɛ̨ɛ̨ ŋą́ gɛ, gɛ́ pɛli ɓaloi?»

31Di nwoo ɲąąpənə diɛ mą: «Yá laa gu Ną́mu Jesus la, yá ɓalo, yɛ́, ka ə́ yəi bɛlɛ́n nuą.»

32Polə da Silasə di gu Ną́mu Yálá lawoo laa həli ɉulɔnui ti ɓa, da ɲəi bɛlɛ́n nuą kəlee. 33Mąą kpinįi ti hu, gaho pɛlɛ́ mɛ̨i kaamun, ə li a diɛ, ə nɛɛmą, ə di wɔ palaɠaai waa. Yili pulu, di yaa, da nwɔ nuąi di mąąwaa. 34Ə Polə da Silasə ni həɠə, ə li a diɛ ɲəi bɛlɛ́n, ə kɔ̨nɔ̨n dɛɛ di pɔ. Da ɲəi bɛlɛ́n nuą di kɛ kwəinɛ̨ɛ̨ hu, mąąhɔlɔɓo, daa di yee hee Yálá mąą mɛ̨nį mu.

35Yələ ɓɔɔ kɛa, Romə nwun nąmįną di di yee pɔ nuą tɔɔ gaho pɛlɛ́ mɛ̨i kaamun bɔɔli, diɛ mą: 'Ɓo nuą ŋɛ̨i diɛ.

36Gaho pɛlɛ́ mɛ̨i kaamun ə nwɛlɛɛ ti ɓo Polə ɓa, yɛ mą: «Nwún nąmįną diɛ, ŋį́ ɓo káá, ká kulɔ, ka ká wɔɔ líɓo liilaa hu.»

37Kɛlaa, Polə ə mo gaho pɛlɛ́ mɛ̨i kaamun ti ɓa, yɛ mą: «Di ku hulɔwa nu kpulu ɲɛ̨i ɓa, hvo kɛli a ku kalamąą mɛ̨nį, kuɔi Romə kaalonnaa kaa kuɔi, yili pulu, di ku too gaho ŋą, ɛlɛɛ, diɛ kɛ di di yeeɓo kuɔ lɔ tii ɲąą, a loo pələ? Hva kɛ tii! Diɛ kpinįlee di pa di ku kulɔ!»

38Nuąi di di tɔɔ, də li di nwooɠaa ti hukulɔ gití tee nuą diɛ. Mɛ̨n di mo, diɛ kɛ; Romə kaalɛa ɓaa a diɛ, di ɲɔw kpɔ kɛnɛ̨. 39Di pa, di nɛ̨ɛ̨mąą hvə diɛ, yili pulu, di di kulɔ gaho ŋą, di ɉuhvɛli diɛ, diɛ diɛ: 'Ká həɠə ɓɛ daai. 40Kulɔi Polə da Silasə di mo gaho pɛlɛ́ mu, di li Lidi yəi bɛlɛ́n. Galan nɛai kɛ laa, di di hvaŋąlɔ wooɠaa ɓo diɛ, di tɛɛ diɛ li.

Currently Selected:

Gɛlaɠaa 16: BKPG

Highlight

Compare

Copy