Gɛlaɠaa 15

Hvaa ə too galan gbɔn ɉu kɛ̨nɛ̨-kuu mɛ̨nį ɓa

1Nąąlɔwai nu taɠaa di həɠə Ɉude, diɛ pa Antiɔsə, diɛ laa na nuą kalan diɛ kɛ mą: «Da wala ká hee kɛ̨nɛ̨ ɓa, yɛ bələi Moisə ə mąą tɔn naa la, ká hva pɛli ɓaloi.» 2Yili ə nuą ɲąąhee geeɓa, Polə da Barnabasə da nuą ti di ɉuyala kpɔ kɛnɛ̨, di woo ə pɛli ɉu, diɛ: Polə da Barnabasə da di wɔ nuą taɠaa di tɛ Ɉerusalɛmə, gɛlaɠaa da galanɉonŋaa kaai, mɛ̨nįi ti ɓo mɛ̨nį ɓa.

3Antiɔsə kalan gbɔn ə ɉiɛ kulɔ wali kɛ. Di tɛɛ Fenisi lɔi da Samari lɔi hu pələ. Diɛ huwu takpɛliɠaa lɔ mɛ̨nį kalan ɉu, hukulɔ, diɛ gu nąn nonnii kəlee kwəinɛ̨ɛ̨ a yili. 4Di həliɛ Ɉerusalɛmə, galan gbɔn, gɛlaɠaa da galanɉonŋaa di di yee hee di mu. Diɛn, mɛ̨nįɠaai kpɔ Yálá ə gɛ di yee hu, di gəlee hukulɔ diɛ. 5Kɛlaa, galan nɛa taɠaa, di gbɛa kɛ a Farisiɛ̨ɠaa, di həɠə di tɔɔ, diɛ mą: «Hvo kɛli da nu yiiɠaa ti hee kɛ́nɛ̨ ɓa, ɛlɛɛ, di Moisə nwɔ tɔ́n ɉɛɓɛ́ pɔ yíi ɓo.»

6Gɛlaɠaa da galanɉonŋaa di mɛ̨nįi ti mąą nwun dɔɔ kɛ, diɛ ɉukpɛ. 7Di ɉuyala kpɔ di kee lɔwai a nwalawalaa, yili ɓə gɛ, Piɛrə ə bələ həɠə yɛ diɛ: «Nąn nonnii, ka kili kaa ɉu káá kɛ, Yálá ə ɉə́ɠə́ ɉu ka lɔwai a gɔwɔ tɔɔ yələ, ə gɛ, huwu takpɛliɠaa diɛ pɛli nwəlɛɛ lɛlɛɛ mɛ̨n ɉii ná, ɛlɛɛ, diɛ gaa a tɛ̨ą. 8Yálái a nu lii hu mɛ̨nį kaa, ə tɔɔ di pulu, a Nįį-Mąąhəɠɛɛ tɛɛi ə mo di pɔ yɛ bələi ə dɛɛ la gu pɔ. 9Hvo gwa diɛni gu lɔwai laa li kpɔ tíikpə. Laai ŋɛ̨i di mo na, yili ɓə gɛ yɛ di lii mąąhəɠə. 10Yili a kɛ tii, lə mɛ̨nį ɓa ka káá bɔ ka Yálá hukɔ́ɔn? Káá tiɛ̨ hee la laa na nuą nwuɔ̨, yai gu nąnni di hvo pɛli ɉəɠəi, ə mą kpɛli kɛ guɔ? 11Kɛlaa yaamun, gwaa gaa a tɛ̨ą, guɔ gu Ną́mu Jesus nwɔ mɛ̨inɛ̨ɛ̨ hu ɓə gu ɓalo laa, ə mą kɛ diɛ, kpɛli.»

12Nąąlɔwai nuą kəlee di di laa pilɛ kpɔ tín, yili pulu, di di wəli tɔɔ Barnabasə da Polə diɛ. Kwɛlɛɛn mɛ̨nįɠaa da kpalo mɛ̨nįɠaai Yálá ə gɛ a di yee, huwu takpɛliɠaa pɔɔli, di yili kəlee hukulɔ. 13Yii kɛa di kpɛɛ a di woo hukulaa, nąąlɔwai Ɉakə yɛ diɛ: «Ną́n nonnii! 'Ka ká wəli tɔɔ mą́ą́! 14Bələi Yálá ə tɔɔ la a nwąnąi, yɛ nuą hɔlɔɓo huwu takpɛliɠaa lɔwai a gɔwɔ tɔɔ yələ, Simɔn aa gəlee hu hukulɔ guɔ. 15Yaan, mɛ̨nįi tii, da yii Yálá kwəi mɛ̨nį hukulɔ nuą di mo, da di kee kaa; hvo gaai, di bɛ̨ɛ̨, diɛ kɛ, gu ‹Námu Yálá yɛ:

16«‹Yili pulu, gáá pənəi ŋį́ pa,

Davidə nwɔ pɛlɛ́i ŋɛ̨i pui, ŋį́ pənə ŋį́ dɔɔ

ŋį́ bɛlɛ́ kpoloon ɲą tɔɔ, ŋį́ ɉaŋą ŋį́ dɔɔ.

17Ə həɠə ɲələ ɓa, nuą kəlee da gu Ną́mu Yálá kwɛli

da nɔiɠaa kpɔ tii Náá kaa diɛ.

Mɛ̨nįi gu Nąmu Yálá kaa moi ya ka tii,

gwəi kiliɠaa ka ti gaa di pɔ mɛ̨nį kɛi.

18A gwəi kiliɠaa ti kɛ ə kɛ a di kɔlɔnŋąą wɔlɔ-wɔlɔ ɓa.›»

19Ɉakə yɛ nwɔ̨nɔ̨ diɛ: «Nwɔ́ɔ́ kwəi, mąą hvo nɛ̨ɛ̨li, huwu takpɛliɠaa da di ɲɛ̨i tínɛ̨n Yálá pɔ pələ, gu hvo laakpalamąą mɛ̨nį ta hee di nwuɔ̨. 20Ká gu hɛɓɛ́ tɛɛ lɔ diɛ, di di yee kulɔ hali kɔ́ mɛ̨nįɠaa hu, wɛli mɛ̨nįɠaa, huwɔi di hvo nwun dee li, di hvo da mįi; ɛlɛɛ, di hvo huwɔ ɲąmą mįi. 21Hvo gaai, ə gɔwɔ tɔɔ gu kalaɓɔlɔni di wɔ yələi ɓa, mąąkwɛli kɛ nuą di kaa Moisə yəi daaɠaa hu, gbala ə tɔɔ, da kɛ ɉɛɓɛ́ ɓoi a vįitɔɔ yələ, Yálá hvɛli pɛlɛ́ɠaa mu.»

Di hɛɓɛ́ tɛɛ huwu takpɛliɠaa diɛ

22Nąąlɔwai, Gɛlaɠaa da galaɉonŋaa, di woo ə laa mą, da gbɔn ɉu nuą, di nu taɠaa həɠə ɉu di lɔwai, di di tɔɔ Antiɔsə da Polə ni ə mą kɛ, Barnabasə. Diɛ ɓaa kɛ a Ɉudasə, yai da kɛ mą: Barsabasə da Silasə, nu hveelɛi ti di kɛ a laa na nuą galan nɛa lɔwai. 23Di ɉɛɓɛ́ tɛɛ di pɔ. Ɉɛɓɛ́ hu woo ka:

«Gɛlaɠaa, galanɉonŋaa, da gu nąn nonnii, diɛ ku nąn nonni túwɔ́ɓo; diɛi a huwu takpɛliɠaa, di ɓo Antiɔsə Siri lɔi hu, da yiiɠaai Silisi lɔi hu. 24Kwaa bələ mɛ̨n diɛ; ku taɠaa daa pa laa ká pɔɔli, diɛ ká kwəi pilimąą wooɠaa, da ká hupu wooɠaa ɓo káá. Kuɔ hvəə di tí a yili. 25Yiihu, ku woo aa laa mą ku kəlee, kwaa nuą həɠə ɉu, kuɔ di tɔɔ ka pɔɔli, da ku wɛlikɛmąą nuą Barnabasə da Polə. 26A diɛi ti daa di nwɔ yɛnɛ̨ɛ̨ kwɛlɛ gu Ną́mu Jesus Kristə laa mąą mɛ̨nį ɓa. 27Ku kaa Ɉudasə da Silasə di tɔɔi ká pɔɔli, diɛ ɓə pai mɛ̨nįi ti hukulɔi káá, a di laawoo. 28Hvo gaai, kwa Nįį-Mąąhəɠɛɛ ni, ku woo aa laa mą, kuɔ, ku hvo tíɛ̨ takpɛli laai ká nwuɔ̨, ə kulɔ yiiɠaai gaa a nu kəlee nwuɔ̨ tíɛ̨, diɛ ɓaa: 29'Ká hvo túnwɔ̨n hálaa huwɔ ɓa, 'ká hvo ɲąmą mįi, huwɔi di hvo nwun dee li, ka hvo mįi, ɛlɛɛ, da wɛli mɛ̨nį. 'Ká tɔɔ a ká nwąnąi, ka mɛ̨nįɠaai ti mąą laa, akɛti, káá mɛ̨nį lɛlɛɛ kɛ. Ká yələwala.»

30Yii kɛa, di nwɛlɛɛɓo nuąi ti tɔɔ bələi; yiliɠaai də li Antiɔsə. Di laa na nuą kəlee ɲąąkpɔn, di ɉɛɓɛ́ tɛɛ di pɔ. 31Ɉɛɓɛ́ hu woo ə nuą kwəinɛ̨ɛ̨, ə di nįilɔ. 32Ɉudasə da Silasə diɛ kpɛlimąn, kɛi di mo a Yálá kwəi mɛ̨nį hukulɔ nuą, di galan nɛai ti liɛwooɓo kpɔ a ɉukwɛaa, di di hvaŋąlɔ. 33Da diɛni di yíikuu tawolo kɛ gee ɓa, yili pulu, galan nɛa di di tɔɔ bələi, di pənə də li nuąi di tɔɔ, di pɔ. 34Kɛlaa, Silasə nwɛi ə kɛ yɛ gaa lɛɛi laa.

35Kɛlaa yaamun, Polə da Barnabasə di lɛɛ Antiɔsə, da nu takpɛliɠaa diɛ gu Ną́mu Yálá lawoo laa həli.

Polə da Barnabasə di di ɓɛlaɓo

36Yíikuu tawolo kulaa ɉu, Polə yɛ Barnabasə ɓa: «Daaɠaai gu Yálá lawoo laa həli ɉu, gu pənə gu tɛɛ laa, gu gu woo pili gu nąn nonnii diɛ, gu di mɛ̨i kaa, bələi di kaa gɛi la, gu gbaɠala kaa.»

37Barnabasə ə kɛ bɔ, da Ɉaan ni də li, yai naa ɓaa Markə. 38Kɛlaa, Polə hvo kɛ bɔ, nui ti kulɔ di pɔ Pamfili lɔi hu, ɛlɛɛ, hvo kɛ ɲee pɛlɛ li di wɔ kóló ɓa, da diɛni di hvo hiɛ kulɔ. 39Polə da Barnabasə di woo hvo naa mą, ya ɓə gɛ, nu kəlee ə li a dee. Barnabasə ə Markə həɠə di tɛ gələn ɉu, Siprə. 40Polə yaan, ə Silasə hvilɛn bɔ, di bələ həɠə diɛ li, gu nąn nonnii di di galihva ɓo gu Ną́mu Yálá nwɔ mɛ̨inɛ̨ɛ̨ ɓa. 41Polə ə Siri lɔi hu ɓɔ, da Silisi lɔi, yɛ gbɔn ɉu nuą hvaŋąlɔ.

Currently Selected:

Gɛlaɠaa 15: BKPG

Highlight

Compare

Copy