Filipea 2

Tuisinndo a bɔɔbɔɔyɛi Krista-e

1Te Krista luei vana yoomuan ni, te o va pɛ maa vana sɔla yoomuan o kaolaa nin, mì Kɔl-Diandaa cuu diom pilɔɔ, te o va pɛ mì ɲííye a kɛndɛi co, 2mɛɛ la va diom pilɛ, o kon mì la peelu ɲaale nuu. La kaolian vellaa-velle, mì la nɔ kɔl pilɔɔ a yiyan pilɔɔ. 3La tosa ɲɛ-ɲɛ a latɔnga te kon te le lacandɔɔ sɔla le, kɛ la tosa dɛnndan o tuisinndo nin, mì la ce caanda fisa hiovɔɔ niaa pila coo. 4Vana-vana o niaa tɛɛn buulan ko le tɔnɔ ndɔɔ daama le, kɛ o buulan vɛlɛ o caanda. 5Kela niaa va maa kela vanaa sínà Yeesu-a.

6Ndu co ɲɛ pilɔɔ a Hala-o,

o kungulan siimian o siimian nda Hala-o coo le.

7Kɛ mí ndu pila mal biilu o va nin-ndo, mó siingun cɛɔ le siŋnɔn o siŋnun maa vanaciee-o. Ndóò cɔu maa o siŋnun vanacieo, 8mí ndu pila cɛl le tuisinndo,

mó tuisin háá, mó cɛl le piɔ́mndo sɔlaa o yɔm-singafilaa coo.

9Lelan bɛɛ Hala heelu ndu ni, mó ke ndu diola hiow diolan kpow lan,

10haliko mi vana-vana o halataala, o lɛŋnden coo a ciee-piɔ́m a baŋ vulan telen nda tuɛinin diola Yeesu lan-ndo, 11o kon mì lediɛɛmu oo lediɛɛmu le dimi kpedekele aa: «Yeesu Krista co Vana bɛndoo» le biilu Pua Hala-o ni.

La diondu maa ɲɛ-tengaa o ceendo coo

12Lelan, caaŋaa nia ya kaola taw-va, maa mɛɛ niaa co lɔ́ɔ́-lɔ́ɔ̀ vanaa biyaa isɔɔ-a o dɛnɛ Hala-o nin yɛ, la hiow laci a tosaa lende telen ya co niaa ikɛi-yo, kɛ mì la hiow bɛɛ sɔɛi ndɔɛi biyɔɔ telen ya co niaa tɛɛn too. 13Kani Hala co tosaa ni mì la va hɛnan ndɔɔ tosaa mɛɛ tuu ndɔɔ co yɛ.

14La tosa dɛnndan kpow, o va a sɔɔn pɔmbɔ le, o va vɛlɛ a lasɛɛngian te, 15haliko mi la va vanaa yaalan te-a a vanaa diandaa, mì la va cuavaa Hala-a, à vànà seelun isɔw nin te-a vanaa co laasianndo-a a vanaa vɔɔnda tɛɛn. Mì la va nda diondɔɔ tɛɛn maa ɲɛ-tengaa o ceendo, 16kani la nɔ sɔɛi yoomuɛi. Lelan siɛmbula biinin ya paale Krista hunnin-nden te, kani i ɲeenun ɲaanɔn fondo le, i sanga sanga fondo le.

17Kɛ o va bɛɛ mì kooma nian ma siŋnun sálàá handɔɔ o sálà niaa co Hala solullo a laalanndo-o coo, ɲɔɔ hɛnan ya ni, mì dɔwnun ɲaale a niaa kpow latulu. 18Niaa bɛɛ, la naŋ kɔl mì la dɔwnun ɲaale a ya latulu.

Timote nda Epafrodite

19I nɔ kɔlkɛsiaa o Maalii Yeesu nin maa o lo ɲɛ-pɔmbɔ mì vim niaa Timote, haliko mi ya pila i va yoomuan sɔlaa a yoongula ya vanin tueyɔɔ fulaa o niaa lan. 20Kani i nɔ vana celen te, o buulan dɛnɛ niaa-o, vana nɔ̀ kɔllo lekɛ́ndɛi o sɔɛi niɛi coo-o, 21kani vana-vana co tɔnɔ ndɔ ndu pila-o nuwviaa, a co buulan le dɛnɛ Yeesu Krista-o le. 22Kani niaa pila sínà mɛɛ Timote lo lediom coo a ya yɛ. Mɛɛ poo va fuɲaa ikɛi le ndu malaa nuaa yɛ, lende o co ya malaa le Yoongu kɛndɔɔ yondaa ni. 23Te i sínà dɔ́ɔ́ pɛ mɛɛ sɔɛi nii vanin yɛ, i yeema mì vem ndu o niaa lo. 24Nduyɛ, i nɔ laalanndo o Maalii nin maa ya pila tamalanin le kɔlan o niaa lo le.

25Kɛ nduyɛ, i ce maa o co fisa mì vem Epafrodite puapilɛ nuu, o naa n co baalaa latulu, mì n va cɔlɔba pilɔɔ-o, o niaa vem le ya hunɔɔ malaa lɔ́ɔ́ ya va o bahavɛiyo nin-ndo, 26kani co yeemaa taw le niaa cɔu vɛlɛ kpow, o co buulanndo taw le tùú niaa tuei maa o co a naa-o. 27I co toɲa maa mí ndóò naa taw, o va le vuo. Kɛ mí Hala tuinun ndu iɲíí, o co yɛ ka ndu le o tuinun iɲíí le, ya bɛɛ mó tuinun ya iɲíí, yɔŋii yáà sɔla kɔl tambɛi celen o hoo kɔɔli. 28Lelan ya co ndu keleŋa yɔɔ ni, haliko mi la dɔwnun ɲaale le ndu cɔu vɛlɛ. O kon mì kɔl ni tambɛiyo bɛɛ yɛlɛma tiŋ. 29La bii ndu o Maalii nin a ɲaaloo ɲɛkɛndɛi, mì la biilu vanaa vaa lende, 30kani le baala Krista-o o va le piɔ́mndo sɔlaa ni. Yoomu ndɔɔ va le ndu hiɔlɔnndo o ya malaa, mala niaa pilaa tiwnin ba loo.

Currently Selected:

Filipea 2: BKG

Highlight

Copy

Compare