Filipea 1

Yilɔɔlan

1Naa vanaa baalaa Yeesu Krista-a, Pol nda Timote pɛɛn.

N co vanaa laalaŋaa co o Yeesu Krista nin Filipe-a, simlacia a vanaa co vanaa baalaa Hala-a malaa-a kpede sɛbɔɔ ho sɛvallo. 2Màá Hala Fuɲa naa a Maalii Yeesu Krista tosal niaa kɛndɛi, mà ke niaa kɔlɲuloo!

Pol piɛi le vanaa laalannda Filipe

3Telen oo telen kɔllo kɔɛ ya pɛ o niaa lo, i candu Hala nuu. 4Lɔ́ɔ́-lɔ́ɔ̀ ya va pɛ Hala piɛyo le niaa kpow, i piɛi a ɲaaloo, 5kani la co ya malaa le Yoongu kɛndɔɔ keiyo yondaa kabi o kandɔɔ háá hau. 6I nɔ laalanndo maa: Vana kandu vali kɛndɛ kon niaa o kɔl-lo lonin lecoo háá mò cii ndu o paale Yeesu Krista hunnin-nden. 7O bɛnda mì yiyan lende le niaa kpow, kani dɛnnda niaalan la co ya o kɔl. Kani o va telen ya co hau o kaasoo-o, o va telen ya va o pelon coo le yoongu kɛndɔɔ-o a telen ya va ndu keiyo yondaa nɛɛ-nɛɛ ka a kpaayaa-o, mɛɛ niaa co kpow, mí la sɔɔnguu mí la sɔla dɛnɛ kɛndɔɔ a ya latulu. 8Nduyɛ Hala co ya lesei maa i kaola niaa taw o Yeesu Krista nin.

9O ya co Hala piɛyo le niaa-o, ndu co ho ni: mì kaola niaa va hiovɔɔ laci lɔ́ɔ́-lɔ́ɔ̀, mò pɛ a sina kpeekpeiyo a á dɛnndan bilaa biyɔɔ ɲɛkɛndɛi, 10haliko mi la nɔla dɛnnda sɔvɛlan sinaa, mì la va a diandaa a vanaa yaalan te-a haa o hunɔɔ Krista-o. 11Mì Krista mala niaa, mì la pɛ a dɛnnda sandaa lan, o kon mì Hala sɔla biiloo a sangalaa.

Yoomoo, ndu co Krista ni

12Puapilɛa nia, i yeema mì la sina maa dɛnɛ yɔŋnun ya-o yɔngu malaa le Yoongu kɛndɔɔ hiovɔɔ laci. 13Kani simlacia kɛ́-kɛ̀ co o cɛi lemasaa nin a à tɔ̀a kpede a sínà nin maa le baala Krista ya co tosaa-o ya co o kaasoo nuaa ni. 14Vanaa bɔɔ-bɔɔ o vanaa laalannda tɛɛn a sɔla laalanndo ɲɛkɛndɛi le cɔ nda co ya o kaasoo-o. Nduyɛ, a co cɔɔloo yoomuan sɔlaa le vannda sɔɛi Hala-e dimullo, o co a isióón te.

15I co toɲa maa vanaa pum a co vannda sɔɛi Krista-e tiiyallo le yeemɛi co nda o kɔl-le, te kon te a paŋalaa. Kɛ a pum yɛ nda, a yiyan kɛndɔɔ nda co kon tosaa ni. 16Nda nda, a kaolaa o lakɔl nda co kon tosaa ni. Kani a sínà maa le Yoongu kɛndɔɔ cɛwcɛwvo ya co o kaasoo nuaa ni. 17Vanaa co yɛ vannda sɔɛi Krista-e tiiyallo a paŋalaa-a, a nɔ yiyannda kɛndɛ le, a co yiyanndo le sanga nuu cɔɔloo o kaasoo.

18Mɛ̀ɛ́-mɛ̀ɛ́ nda tosa pɛ, o va a yiyan kɛndɛ, o va a yiyan celen, haliko sii sɔɛi Krista-e i co diminndo! Lelan, i co a ɲaaloo le dɛnɛ kon. Nduyɛ, i hiawnin laci a ɲaaloo dɔwnɔnndo. 19Kani i sínà maa piɛile niaalen a Kɔl diandaa Yeesu Krista-o malanin ya le cindaa sɔlaa. 20Nduyɛ, i yeema mì kon tosan, ɲɛ ya handu kɔllo coo taw-vo co kon ni, siɛmbula biinin ya le ɲɛ-ɲɛ le. Kɛ sunsun a le fɛɛn a fɛɛn, i nɔ kɔlkɛsiaa maa Krista sɔlanin sangalaa o dialun nun nin, i va yoomu, i vu. 21Kani le ya, Krista co yoomoo ni, piɔ́mndo ndu, ɲɛ ya co sɔla-o co kon ni. 22Kɛ te o va yɛ pɛ maa lou yoomu o ceendo coo malanin ya mì tosa baala sɔvɛɔ ni, i sínà ɲɛ ya hɛli le. 23O yɔm tɛndaa tɛɛn ya co ni: yeemɛi co ya le kɔnndan, mì n kɔ vannun naa Krista latulu, ndu hiow va fisa, 24kɛ le niaa yɛ, o hiow naŋɔɔ-o co ni mì va yoomu o falon nin. 25I laalan maa i lonin yoomu mì n vannun naa niaa latulu, haliko mi la hiow laci, mì la dɔwnun ɲaale o laalanndo nin. 26O kon i muungu pɛ niaa tɛɛn, la sɔla yoomuma sɛnɛi, la lɔɔnun vɛlɛ ibuŋ le ya o Krista nin.

27Kɛ la kela mɛɛ Yoongu kɛndɛ Krista-o co yɛ. O kon, i kɔ o niaa lo, i kɔa le, i co tueyɔɔ maa la co yili o yiyan pilɔɔ nin, mì la va Yoongu kɛndɔɔ cɛwcɛwvo a laalan pilɔɔ. 28La cɛ̀l mì yaamɔɔa vueinun niaa le. Ken cɔm ni maa o ɲánndávàà nda co kɔlan lou lende ni, kɛ le niaa, cɔmndo co kon ni maa la sɔla cindaa. Nduyɛ, Hala o ba kon fulà ni. 29Kani kɛndɛi tosalan niaa-e, o co ko le Krista laalanndo daama le, kɛ le sangaa vɛlɛ le ndu. 30Bau cɔlɔba pilɔɔ naa n co naa niaa ni. I cɔlɔba paandu niaa o hɔl, i co vɔ hiovɔɔ laci tuŋ, maa mɛɛ niaa sínà yɛ.

Currently Selected:

Filipea 1: BKG

Highlight

Copy

Compare