Abdia 1
1
1Vundule Maalii Hala cɔm Abdia len, sɔɛi o cɔm ndu a tambii Edɔm-nde o kɔɔ-e.
Mɛlɛka soo le tambii Edɔm-nde
«N tuei yoongu Mɛlɛka-o,
o kiilaa pum co vanaa-mangalaa-isɔɔa tɛɛngullo-o aa:
‹La cɔn mì n kɔ delnun Edɔm coo a cɔwvo!›
2Maalii dimi aa:
‹I co nɔm siinguu yungu hiow dɔɔnanndo
vanaa-mangalaa-isɔɔa tɛɛn-ndo.
Sɔɛi nɔmnde nɛinun nin vannda taw.
3Yonga nɔm bɛndoo co nɔm palaa ni.
O powta kpovalan tɛɛn calta nɔmndan la co ni,
a cii lan heelu coocoo ningo-ningo,
ma va ɲunanndo o kɔl nin aa:
‹Nɛ̀ɛ́ nɔla yɛ ya tuisi lɛŋ?›
4Hel bɛɛ coocoo maa kovɛ,
ma kɔ tangul vɛɛnnde nɔmnden o loeon tɛɛn,
i co nɔm tuisi ma del lɛŋ.»
Sɔɛi fula ya Mɛlɛka o sondo-e co ken ni.
5Te vuiya te kon te vanaa del vannda coo-a
hinul nɔm pɛ icɔl,
a cuanin ɲɛm nda tiwnin ba cuaa-on kpow,
mì nɔm koma lo bala fondo.
Te vanaa toosiaa mɔiyan a rɛsɛnndon-nda
hin pɛ o nakɔ nɔm n'rɛsɛnndo nin,
kpɔ̀nyɔ̀lan lapilɛn daama nda mɛinin ni.
6Niaa polale Esau len,
a cii niaa mɛi bala fondo fúú!
Bolofaa niaa va o vianaa-o bɛɛ,
vannda cii ndu saalɔn.
7À toawnin niaa o lɛŋnde niaalen coo.
Vanaa niaa bɛnda-a kpede a fulanin niaa kɔɔli,
mì vanaa va caaŋaa niaa-a tol niaa coo a kpaayaa.
Vanaa niaa co balan o hɛngɛi pilɔɔ nin-nda
co niaa yaŋɔɔlan hendullo o nɛila niaalan coo
mà va dimio aa: ‹A co lɛ ɲɛ-ɲɛ bila biyɔɔ le.›
8Le hee ya Mɛlɛka dimi ni
maa paale ya tambunin kɔllo len,
i diwnin vanaa kɔlkalua kpede
o lɛŋnde Edɔm-nden nin,
mì cii vanaa dɛnɛ sinaa o pembii Esau-ve coo.
9Nɔm kobio Teman yɛ, siòòŋii bɛnduei
biinin kuubaa nɔmnda.
O kon, vanaa co o lɛŋnde Esau len nin-nda kpede
a sɔlanin piɔ́mndo o paale cɔwlen.»
Edɔmnda dɔwnun ɲaale le dɛnɛ palaa Israɛlla
10«Le kɔlvesɛi niaa tosal puapilɛa niaa-o,
cuavaa Yakɔb-a pɛɛn,
siɛmbulan la toalnin niaa,
mì niaa pila cuu le fɛɛn a fɛɛn.
11Kani la va lon paale len,
mí la simnun, mí vanaa celennda
kɔannun a bolofaa ndaa.
La lo tofaa mí mialla hun luɛi
o kobi ndaa nin, Yerusalɛm pɛɛn,
má mal siondei le bolofaa ndaa piɔvanndo.
Niaa bɛɛ, mí la tosa maa vanaa kan.
12Niaa Edɔmnda, niáà bɛnda mí niáà naŋ kɔl
le puapilɛa niaa, Yudaa, tofaa o tuma dɛnɛ palaa kon nin te.
Niáà bɛnda bɛɛ mí niáà naŋ kɔl
tuma nda va kon piɔllo-o le.
Niáà bɛnda mi niáà dimi diomnda vɔɔnndan a nda
tuma nda va kon o mɔnɛi nin-ndo le.
13Niáà bɛnda mi niáà luɛi o kobi vanaa nia nin
tuma vannda va ɲɔɔn pungaa lon-ndo le.
Niáà bɛnda bɛɛ mí niáà ce nda o sangaa nin
mí niáà dɔwnun ɲaale le.
Niáà bɛnda mí niáà punga bolofaa ndaa
tuma nda va kon o kpundɔɔ nin-ndo le.
14Niáà bɛnda mí niáà sim o nɛi-lábándoo
le vanaa va hiɔlɔnndo-a diwvo le.
Niáà bɛnda mí niáà mal vanaa tɔ̀a lo yoomu-a
yaamɔɔa o ba o paale dɛnɛ palalen coo le.
15Kani paale Mɛlɛka kialunin
yamɛi vanaa-mangalaa-isɔɔa kpow len
le co nin le tiiyaa.
A tosalnin niaa mɛɛ niaa tosal caanda yɛ.
Yɔŋ vɔɔn niaa tosa-o mingulunnin niaa.»
Israɛlla mingulnin Edɔmnda màá
16«Niaa Israɛlla, la cii mɔima nima kɔltuwvan kolɔɔ
o pembii nii diandɛi coo.
Vanaa súúla celennda ciinin man kolɔɔ le.
À kolnin man háá mi ma bii nda,
o kon, à cuunin o lepilɔɔ few.
17O kon vanaa tɔ̀a lonin-nda
cuungiaanin o pembei Siɔn coo,
fonda muungunin kon vɛlɛ o diandaa le ya-o pɛɛn.
Polale Yakɔb len le minginnin vɛlɛ
yondala ndalan o ba,
yonda vannda ndaa hɛlu nda o ba lan pɛɛn.
18Yungu Yakɔb-o siŋnunnin maa leyin,
mì yungu Yosɛf-o siŋnun maa yinnde biyaa.
Kɛ mì yungu Esau-vo ndu siŋnun maa tɛw,
mì yinnden le lom nda kpúlúká.
Vana pilɛ bɛɛ helunnin te.
Ya Mɛlɛka dimi lende ni.»
19Yudaa hialunin lɛŋnde n'pembule Edɔm-nden a ba too, mà hɛlu vɛlɛ dɛngbɛla co o tàndá Filistia nin-ndan, mà hun cal o tàndá Efraim-ndo nin, Samari pɛɛn. Polale Bɛnyamɛn-nden le hialunin Kalaad.
20Israɛlaa vanin o ɲaanɔnndo nin a ba luaŋ-ndo-a cannin maa sɛ́lɛ́ vanaa cɔw, mà kɔ hiɔlu lɛŋnde Kanannda, mà kɔ tiiya a lɛŋnden hiɔlɔɔ háá Sarɛpta. Vanaa fula Yerusalɛm ma va o ɲaanɔnndo nin Sefarad-a, nda hialunin kobila co a ba too lan. 21Vanaa baŋa vannda-a helnin o pembei Siɔn coo le masalen tosaa o pembii Esau-ve coo.
O kon Mɛlɛka vanin masaa kpeekpei.
Currently Selected:
Abdia 1: BKG
Highlight
Share
Compare
Copy
Want to have your highlights saved across all your devices? Sign up or sign in
© Alliance Biblique en Guinée
