Matie 27

A kɔɛ a Yeesu o Pilate lo

(Marke 15.1, Luke 23.1-2, Nsaŋ 18.28-32)

1Ɲɔɔ tengaa, mí bolii vanaa-solia-lasálàá a simlacia lelɛŋnda yii diomnden le Yeesu diyɔɔ. 2Má yii ndu, má kɔa a ndu, má kɔ mal ndu Pilate masa ibungaa o ba.

Piɔ́m Yuda-o

(Dɛnnda kiilaa 1.18-19)

3Yuda mal ndu vannda o ba-o tueyɔɔ maa yamɛi Yeesu-e kiolu maa o co piɔ́mndo sɔla, mí siòònde bii ndu taw, mó mingul vanaa-solia-lasálàá a simlacia lelɛŋnda volin latámán beleyaa-on. 4Mó dimul nda aa: «I tosa yɔŋ vɔɔndo le vana tɛɛmbuu isɔɔ loo malɔɔ vannda o ba le ndu diyɔɔ.» Kɛ má mulul ndu aa: «O co sɔɛi naa le co ken te! Nɔm sina ken ni!» 5O kon, mí Yuda kɔ vuu volin latámán mun o Cɛi-Hala-o nin. Mó muungu, mó kɔ baanun yoolen o labolo, mó landun. 6Mí bolii vanaa-solia-lasálàá cɔwviaa volin mun, má dimi aa: «O bɛnda mì vana handu volion mun o ɲɛ-sɔlaa nda co hunɔɔ o Cɛi-Hala-o nin-ndo coo le, kani volin yɔngun le vanacieo diyɔɔ-on n co ni.» 7Ndáà tundɔɔ, má cɛlan, má piandu yondoo vana cɔavaa n'kpɛɛnɔɔ o ba a volin mun le mialla kumbɔɔ lon. 8Lelan háá hau, a co yondo kon veeloo aa: «Yondo koovan ma fula-o.» 9O kon mí sɔɛi Yeremi, vana-tɛɛngaa-diom Hala-o dimi-e i peelun aa: «Má cua volin latámán beleyaa, maa mɛɛ Israɛlla kelu vɔngu ndɔɔ yɛ, 10má piandu yondoo vana cuavaa n'kpɛnɔɔ o ba, mɛɛ Mɛlɛka dimul-la yɛ.»

A kɔɛ a Yeesu o Pilate masa ibunga Rɔmnda lo

(Marke 15.2-5, Luke 23.3-5, Nsaŋ 18.33-38)

11Má kɔa a Yeesu o Pilate, masa ibungaa lo, mó ɲuna ndu aa: «Vɛ̀ɛ̀ nɔm co masa Yuifia ni?» Mí Yeesu mulul ndu aa: «Nɔm pila cii dimi.» 12Mí bolii vanaa-solia-lasálàá a simlacia va ndu sɔɔn hɛɛnduuo coo, kɛ Yeesu kuŋ te, o soli le. 13O kon mí Pilate ɲuna ndu aa: «Vɛ̀ɛ̀ a co sɔɔn nda co mun nɔm hɛɛnduuo coo-on tueyɔɔ le?» 14Kɛ Yeesu mulul ndu ikɛ́-kɛ̀ le, mí masa ibungaa dɔawnun kɔndɔfili taw.

Mɛɛ mi Yeesu sɔla piɔ́mndo

(Marke 15.6-15, Luke 23.13-25, Nsaŋ 18.39, 19.16)

15Nduyɛ, telen oo telen kafo-hiavaa-coo ndóò tiiya pɛ, naamu masa ibungaa va ni mì ndóò soli vana kaasoo o pilɛ, mì ndóò mal ndu, o vannda ndáà yeema-o. 16Vana kaaso vannda ndáà sina le dɛnnda ndɔla vɔɔnndan taw-vo pum va lon, diolan Barabas. 17Mí Pilate ɲuna sɛ́lɛ́ bɛndu va lon-ndo aa: «Barabas a Yeesu nda veelu aa Krista-o, ɔ́ɔ̀ vana niaa yeema mì mel niaa-o?» 18Nduyɛ Pilate ndóò sina maa le paŋala simlacia ndáà nɔ a Yeesu-o nda hin a ndu o ndu lo ni. 19Pilate lo icali o fonda kialaa n'yamaa, mí laa ndɔ viam kiilaa le ndu dimullo aa: «Vow balan o sɔɛi langbanɔ tɛɛmbuu hoo isɔɔ loo nin te, kani i sanga cɛi-cɔl taw o lɔma sɔlaan nin le ndu.»

20Kɛ mí bolii vanaa-solia-lasálàá a simlacia pei vannda sɔɔn niŋ le Barabas malɔɔ, mà dii Yeesu. 21Mí masa ibungaa ɲuna nda vɛlɛ aa: «Ɔ́ɔ̀ o niaa yeema mì i mal o vanaa ŋiɔnda ha tɛɛn-ndo?» Má muli aa: «Barabas.» 22Mó ɲuna nda aa: «Mí vɛ̀ɛ̀ ya yɔŋ yɛ a Yeesu nda veelu hoo aa Krista-o?» Mí nda kpow muli aa: «Baŋ ndu o yɔm singafilaa coo!»

23Mí masa ibungaa ɲuna nda aa: «Dɛnɛ vɔɔn yɛɛ o tosa yɛ?» Kɛ má cɔɔlu deŋi coocoo kpélén aa: «Baŋ ndu o yɔm singafilaa coo!» 24Mí Pilate ca maa ndóò nɔla lɛ ɲɛ-ɲɛ tosa le, kani vannda va hiovɔɔ laci a vɔngaa. Mó kɔandu mɛnndan, mó pulu balan nda kpow o hɔl, mó dimi aa: «I nɔ laba o sɔɛi piɔ́m vana sandaa ho nin te. Niaa pila sɔɛi piɔ́m ndɔɔ co coo ni.» 25Mí vannda kpow a muli aa: «Sɔɛi piɔ́m ndɔɔ va naa pila a cuavaa naa coo!» 26O kon mí Pilate mel nda Barabas. O kon kɔɔli mó dimul vannda, má lɔaa Yeesu a kɔlulen. Kon hiovɔɔ, mó mal ndu vanaa cɔwva o ba le ndu baŋɔɔ o yɔm singafilaa coo.

Vanaa cɔwva mam Yeesu

(Marke 15.16-20, Nsaŋ 19.2-3)

27Mí vanaa cɔvaa Pilate-a kɔa a Yeesu o cɛi lemasaa nin, mí nda kpow kɔ balu ndu. 28Má soli ndu volɔɔlan lekɔɔ, má vow ndu doma siaŋaa pum. 29O kon kɔɔli, má lɔa mɔsil lemasaa a yɔɔn, má vow Yeesu ndu o lebol. Má sɔaa ndu kpɛ̀ndɛ̀len o ba kɛndɔɔ, má va ndu vulan beŋndo le ndu mamɔɔ, má va dimio aa: «Masa Yuifia isɛ!» 30Má va ndu lɔluan tufɔɔ coo, má cua kpɛ̀ndɛ̀len, má va ndu bollen lɔɔ a len. 31Ndáà ciiyo ndu sɔɔlɛmaa suiyo lende, má soli ndu doma bɛndoo lekɔɔ, má mingi ndu volɔɔla ndɔlan vow, má kɔa a ndu le ndu baŋɔɔ o yɔm singafilaa coo.

A baŋ Yeesu o yɔm singafilaa coo

(Marke 15.21-32, Luke 23.26-43, Nsaŋ 19.17-27)

32Tuma nda va fulaa le ndu kɔlan baŋɔɔ-o, má kei bɔŋan a langbanɔ pilɛ, diolan Simɔn, fulaa Sirɛne. Má baŋ ndu kangalan le kɔlan a yɔm singafilaa Yeesu-o. 33Ndáà tiiyaa o fondaa pum diolan Kɔlkota (kon co dimio ni aa fonda lakpokpoo), 34má yɔngu ndu mɔiyan ma pum le kolɔɔ, ma nda bingulan a ɲɛ lolɛiyo-an. Kɛ Yeesu dombio, mó kɛɛ, o kol man te.

35Ndáà ciiyo ndu baŋɔɔ o yɔm singafilaa coo, má mal siondei le volɔɔla ndɔlan piɔvanndo. 36O kon kɔɔli, má cal lon le ndu cumullo. 37Má baŋ sɛvaa pum ndu o bollen coo, le cɔmndo kɔlɔ nda dii ndu-o aa: «Yeesu co hoo ni, masa Yuifia.»

38Má baŋ vuiya pum Yeesu ikɛi nda ŋiɔn, o pilɛ ndu o ba kɛndɔɔ coo, o pilɔɔ o mɛlle coo.

39Mí vanaa va hiovɔɔ-a va bolle hiiloo, má yeow ndu. 40Má va ndu dimullo aa: «Nɔm dimi ni aa a co Cɛi-Hala-o tɛɛmbuu mà mingi o celen tangul o palɛi ndii yáá bɛngu. Mɛɛ nɔm pila ciindian ndɔ niko. Te Po Hala-o n co ni, mɛɛ tol-lɔ hau o yɔm singafilaa coo.» 41Mí bolii vanaa-solia-lasálàá, vanaa pɛɛkaa latɔŋnda a simlacia bɛɛ va ndu mamɔɔ. Má va dimio aa: 42«O ciindiaa caaŋaa celen, vɛ̀ɛ̀ mo bumba ndu pila ciindian? Ndu co masa Israɛlla ni, o tol-lɔ niko o yɔm singafilaa coo. O kon mì n laalan ndu. 43Hala o tiindan ni, te Hala yeema pɛ ndu, mɛɛ o baŋa vɔ ndu niko. Kani o dimi maa Po Hala-o o co ni.» 44Mí vuiyaa ndáà baŋ ndu ikɛi-ya bɛɛ a va ndu mamɔɔ lende.

Piɔ́m Yeesu-o

(Marke 15.33-41, Luke 23.44-49, Nsaŋ 19.28-30)

45Kandɔɔ a paalen o pol háá tiiya a lɛɛlɛ yàándɔɔ a paale yɔngannden, mí ɲumma bɛnduan ma toal o lɛŋnden kpow coo. 46Lɛɛlɛ yàándɔɔ kandɔɔ le tiiyaa, mí Yeesu deŋi coocoo kpélén aa: «Elii, Elii, lema sabatani?» Kon co dimio ni aa: «Hala nuu, Hala nuu, le yɛɛ nɛ n kɛɛ yɛ ya?» 47Vanaa va lon-nda a pum tueyɔɔ ndu dimio lende, má dimi aa: «O co Elii veeloo.» 48Fɔ́ɔ́fɔ̀, mí o pilɛ ɲaanun, mó kɔ cua ɲɛ fuɛn-fuɛɛndo pum, mó pɔɔla ndu o mɔima vaalan nin, mó sɔaa ndu o kpɛ̀ndɛ̀len, mó yɔngu ndu le kolɔɔ. 49Kɛ mí vanaa tɔ̀a dimi aa: «Cum ndɔ mì n tofan te Elii hunnin mò ciindiaa ndu.»

50Mí Yeesu deŋi vɛlɛ kpélén, o kon mó malnun kɔl. 51O telen kon, mí kola landaa va o Cɛi-Hala-o nin-ndo can a tɛndaa coocoo háá mó tiiya lebɛngu di, mí lɛŋnden le ɲiiya, mí powtan la tɛɛndiaa, 52mí sɛilan la kumbin, mí vanaa laalaŋaa bɔɔ-bɔɔ ndáà vi nin-nda muungu yoomu. 53Má fula o sɛilan nin. Yeesu tendullo niko, má luɛi o ciee diandaa nin, mí vanaa bɔɔ-bɔɔ ca nda. 54Simlacinɔ vanaa cɔwva a vanaa va ndu ikɛi le Yeesu cumullo-a cɔu lɛŋnden ɲiiyaa, má ca vɛlɛ dɛnnda yɔŋnun-ndan kpow, mí siòònde bii nda taw. Má dimi aa: «Po Hala-o lekɛ́ndɛi o va ni.» 55Vanlaandua taw a va lon, má sim tofaa kɔɔli-kɔɔli. Hali a cɛn Kalile ma va ndu balɔɔ kɔɔli le ndu malaa o balahavɛila ndɔlan nin-nda a va lon. 56Mari fula Makadala-o, Mari kalaa Nsaki nda Yosɛf a kalaa poaa Sebedee-a va nda tɛɛn ndon.

A kumbu Yeesu

(Marke 15.42-47, Luke 23.50-56, Nsaŋ 19.38-42)

57Paalen delɔɔ, mí langbanɔ bolofaa pum hun fulaa Arimatee, diolan Yosɛf, kaandennɔ Yeesu-o ndu bɛɛ va ni, 58mó kɔ komal Pilate, mó piɛi ndu dialun Yeesu-on. Mí Pilate dimul vannda, má ke ndu mun. 59Mí Yosɛf cua dialun Yeesu-on, mó simbul mun o fengbɔ sɛnɛiyo nin, 60mó kɔ kɛsi mun o sɛi ndu pila ndóò tuwnun o powvo nin-ndo nin. O kon kɔɔli, mó ɲindu pow bɛndoo pum o sɛiyo sondoo, mó kɔannun. 61Mari fula Makdala-o a Mari-o pilɔɔ a va icali o sɛiyo sondoo lon.

Kpalilaa cumulaa sɛiya

62Diimandɔɔ, o paale pɛngiaalen coo, mí simlacia vanaa-solia-lasálàá a Faliisia kɔa o Pilate lo, 63má dimul ndu aa: «Vana bɛndoo, n loonun maa telen langbanɔ poopoo ho va vɔ yoomu-o, mó dimi aa: ‹Te i vi pɛ, palɛi yaa o kon kɔɔli, i tendulnin.› 64Lelan, viom vannda mà kɔ cumul sɛiyo háá o paale yàándɔlen. Yɔŋii kaandeŋaa ndɔa kɔ ciimbuu dialun ndɔn, mà dimul vannda aa muungoo o muungu yoomu ni. A dimi yɛ pɛ lende, poopoo kon ndu hiawnin bɛɛ o tasoo.» 65Mí Pilate dimul nda aa: «La cua vanaa cɔwva mì la kɔ kɛsi nda cumullo mɛɛ o bɛnda niaa o kɔl-lɛ.» 66O kon má kɔa, má kɔ beŋul sɛiyo ɲɛkɛndɛi, má kɛsi vannda cumullo o sondoo.

Currently Selected:

Matie 27: BKG

Highlight

Copy

Compare