Matie 18
18
Vana hiow vaa o bɔɔ o masale Hala len nin-ndo
(Marke 9.33-37, Luke 9.46-48)
1Tuma kon, mí kaandennda sɔɔnguu Yeesu ikɛi, má ɲuna ndu aa: «Nɛ̀ɛ́ hiow yɛ vaa o bɔɔ o masale halataala len nin?» 2Mí Yeesu veelu cuaambɔ pɔmbɔɔ pum, mó simi ndu nda tɛɛn, 3mó dimi aa: «I co niaa toɲaa dimul, te la mangalan mì la muungu maa cuaambɔa pɔmbɔa le, la lueinin o masale halataala len nin te. 4Lelan, vana-vana tuisin pɛ maa poombɔ pɔmbɔɔ ho, ndu hiawnin vaa o bɔɔ o masale halataala len nin ni. 5Nduyɛ vana-vana cɛl pɛ cuaambɔ pɔmbɔɔ maa hoo o diola nilan, mɛɛ ya pila o cɛl ni.»
Kanalanndo
(Marke 9.42-48, Luke 17.1-2)
6«Kɛ vana yɔŋnun pɛ sabu le cuaambɔ laalan ya-o lueiyo o pɔwlan nin, o co fisa le vana kon, mà baa ndu pow bɛndoo o labolo, mà viow ndu o mɛmma ihɛllan bɛngu di. 7Dɛnɛ palaa co le ceendo, le tùú o co vannda pelon lueiyo o pɔwlan nin-ndo. I co toɲa maa fɔ mí pɔwlan la yɔŋnun, kɛ dɛnɛ palaa co le vana co yɔŋnɔn sabu le pɔwla lan yɔŋnɔnndo-o. 8Te ba nɔmndo, te kon te pelii nɔmnde co tosa ni ma del o pɔwlan nin, mɛɛ kiolu ba kalaa, te kon te pelii kalɛi, ma viow ndi polon. Kani o co fisa ma sɔla yoomu fɛɛn-fɛɛndo a baa ndu pilɛ, te kon te a pelei ndii pilɛ, a balan tan tiɔn te kon te pelon mún miun kpow nɔu, mà viow nɔm o yinnde fɛɛn-fɛɛnnden nin. 9Te hɔlte nɔmnden le co yɛ tosa ni ma del o pɔwlan nin, mɛɛ kala hɔlte len ma viow len polon. Kani o co fisa ma sɔla yoomu fɛɛn-fɛɛndo a hɔlten le pilɛ a á hɔltan nɔu latiɔn kɛ ma viow nɔm o ɲánndávàà.
Tale saa lo mó cannun-ndo
(Luke 15.3-7)
10La mandan le cuaambɔa pɔmbɔa vaa nuaa o pilɛ pɛɛsaa. Kani i co niaa dimul, mɛlɛkaa ndaa co Fuɲa ni co o halataala-o hɔlla tofaa o halataala tuŋ-tuŋ. 11Bau Po vanacieo hin le o lo-o ciindiaa#18.11 Bungɛi he co o sɛbɛla paandulan lapum nin te..»
Tale saa laasian-ndo
(Luke 15.3-7)
12Mí Yeesu dimi taloo aa: «Vɛ̀ɛ̀ niaa yiyan yɛ? Te vanndo pum nɔ pɛ saa kɛmɛ, mì o pilɛ o nda tɛɛn o lo, vɛ̀ɛ̀ o mɛi saa belaŋɔmahiɔɔlu a à ŋɔmahiɔɔlua o pembei coo mò kɔɛ o lo-o nuwviaa le? 13I co niaa toɲaa dimul, te o saalun pɛ ndu, o dɔwnun ɲaale le saa pilɛ kon hiovɔɔ ɲaale o dɔawnun le saa belaŋɔmahiɔɔlu a à ŋɔmahiɔɔlua lo le-a-o. 14Lende koni, Fuɲa niaa co o halataala-o yeema mì cuaambɔa pɔmbɔa ha o pilɛ bɛɛ lo le.»
Te vanndo tosa pɛ dɛnɛ hakio
15«Te puapilɛ nɔmndo cua pɛ hakio, kɔ ma soo o ndu lo niaa ndu ŋiɔn kpé. Te o tuei pɛ nɔm diom, mɛɛ o siŋnun vɛlɛ puapilɛ nɔmndo. 16Kɛ te o tui nɔm diom te, veelu vana pilɛ, te kon te vanaa ŋiɔn le sɔɛi kalɛi kpede toosiaa seiya a ŋiɔn, te kon te a yaa o hɔl. 17Te o kɛɛ pɛ le nda nilan yaŋɔɔ, a cɔm kunda vanaa laalannda sɔɛi kalɛi, te o kɛɛ nin pɛ kunda vanaa laalannda diom, mɛɛ cɔ ndu maa vana-mangalaa-isɔɔ celen, maa vana biyaa mulu.
18Mì dimul niaa toɲaa, ɲɛ-ɲɛ niaa yii pɛ o lɛŋnden coo, ndu yiinunnin o halataala, ɲɛ-ɲɛ niaa timbi vɛlɛ pɛ o lɛŋnden coo, ndu timbinnin o halataala.
19Mì dimul niaa vɛlɛ toɲaa maa te vanaa ŋiɔn o niaa tɛɛn a cɛlan pɛ o lɛŋnden coo le ɲɛ-ɲɛ ɲunaa o piɛilen nin, Fuɲa ni co o halataala-o kenin nda ndu. 20Kani nɛɛ vanaa ŋiɔn, te kon te vanaa yaa cuungian pɛ o diola nilan, i co nda tɛɛn.»
Tale vana baala mel haki loo
21O kon mí Piɛr sɔɔnguu, mó dimi aa: «Maalii, te puapilɛ nuu cua pɛ hakio a ya, vɛ̀ɛ̀ kpɛ́ ya bɛnda yɛ mì mal ndu haki? Vɛ̀ɛ̀ bɛmbɛ leŋɔmmɛw ni?» Mí Yeesu mulul ndu aa: 22«I dimul nɔm te aa bɛmbɛ leŋɔmmɛw. Kɛ háá belaŋɔmmɛw bɛmbɛ leŋɔmmɛw.» 23Lelan masale halataala len le co maa masa ndóò yeema le vanaa ndɔa baalaa konaa ɲunaa-o. 24Ndóò kandɔɔ sɔɔn yaasiaa, má cuu ndu langbanɔ pilɛ fulaa o vanaa ndɔa baalaa tɛɛn, mí volion hel ndu taw-taw. 25Le tùú ndóò nɔ ɲɛ le mun salaa loo, mí vana ndɔ bɛndoo dimi le ndu pila, laa ndɔ, cuavaa ndɔa a ɲɛ-ɲɛ ndóò ndɔ pisio, le kuee ndɔ kon salaa. 26Mí vana baala kon del lɛŋ ndu o labɛngunin, mó dimi aa: «Biwnun a ya, i co nɔm volin nɔmndon salal kpede!» 27Mí ɲííye bii vana ndɔ bɛndoo a ndu, mó mal ndu haki le kuee kon, mó mal ndu kɔnndan. 28Vana baala kon fulaa, mó komal caan ndɔ pilɛ, ndu bɛɛ vana baalaa o va ni maa ndu, o kuee ndɔɔ va volion ɲɛ-pɔmbɔ daama-o. Mó bii ndu, mó ŋɔaw ndu bololan, mó dimi aa: «Fɔ ma sala kuee nuu.» 29Mí caan ndɔ kon del ndu o labɛngunin, mó ɲɔɔlu ndu aa: «Biwnun a ya, i co kuee nɔmndo sala kpede!» 30Kɛ mó kɛɛ, mó kɔ mal caan ndɔ kon o kaasoo, mó lo lon háá mó cii kuee ndɔɔ sala. 31Caaŋaa ndɔa cɔu sɔɛi ken, mí mɔnɛi bii nda taw-taw. Má kɔ downun vana nda bɛndoo kona. 32Le hee, mí vana ndɔ bɛndoo veelu vana baala kon, mó dimul ndu aa: «Éé, nɔm vana baala kɔlvesɛiyo ho! Kuee ni va nɔm-ndo kpow, mí mal nɔm haki le ndu le tùú n tɛɛlun ya-o. 33Nɔm bɛɛ, nɔm óò bɛnda mì nɔm óò tuinun caan nɔm iɲíí mɛɛ ya tuinun nɔm iɲíí yɛ.» 34Mí vana ndɔ bɛndoo tuulu kɔllo taw, mó mal ndu vanaa saangiaa vannda-a o ba háá mó cii kuee pilaa sala kpede.
35Mí Yeesu dimi vɛlɛ aa: «Lende koni Fuɲa ni co o halataala-o tosanin a niaa ni, te la mel puapilɛa niaa haki a kɔlta niaalan kpow le.»
Currently Selected:
Matie 18: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
