Matie 17

Yeesu mangalan kaandennda o hɔl

(Marke 9.2-13, Luke 9.28-36)

1Palɛi ŋɔmpum o kon kɔɔli, mí Yeesu cua Piɛr, Nsaki a Nsaŋ puapilɛ ndɔ, mó kɔa a nda o pembii vilɛiye pum coo. 2Mó mangalan nda o hɔl, mí hɔlla muungu ndu volio maa lepala, mí volɔɔla va ndu lekɔɔ lan la muungu lahumbu maa ɲɛ-tengaa. 3Mí Moise nda Elii fula nda o hɔl, má va suukanndo a Yeesu. 4Mí Piɛr cua sɔɛi, mó dimul Yeesu aa: «Maalii, o naŋ bɔɔ mì n vannun nanu! Taa cɛl pɛ, i tondu cɛila kolalan tan yáá, o pilɛ le nɔm, o pilɛ le Moise, o pilɛ le Elii.» 5O lo sɔɛi, mí yumbuyumbu ɲɛ-tengaa pum kumbu nda. Mí diomndo pum soaa o yumbuyumbu kon nin aa: «Po ni ya kaola taw-vo co hoo ni, o ya hɛli a kɔlkɛndɔɔ-o. La bíí ndu diom.» 6Kaandennda tueyɔɔ diom kon, má deli lɛŋ a kuumbuan, mì siòònde bii nda taw. 7Kɛ mí Yeesu sɔɔnguu, mó piilian nda, mó dimi aa: «La cɔn, siòòŋii bii niaa le!» 8Má cua hɔlla, kɛ Yeesu ndu pilɛ kpé nda ce ni. 9Tuma nda va pembei tolɔɔ-o, mí Yeesu sila nda aa: «Háá mi Po vanacieo tendul fulaa vanvílɛ́iya tɛɛn, La dímul vana-vana a vundule niaa ce len-nden o kɔɔ le.»

10O kon kɔɔli, mí kaandennda ɲuna Yeesu aa: «Le yɛɛ vanaa pɛɛkaa latɔŋnda co yɛ niko dimio maa Elii co fɔlɔn hunɔɔ ni?» 11Mó muli aa: «I co toɲa maa Elii co hunɔɔ, mò hun mingi ɲɛ-ɲɛ o fonda ndɔɔ. 12Kɛ mì dimul niaa maa Elii hin nin, kɛ vannda sina ndu le, má tosal ndu mɛɛ ndáà yeema yɛ. Lende koni nda saangiaanin Po vanacieo ni.» 13Mí kaandennda bii dɔ́ɔ́ bila maa sɔɛi Nsaŋ Vana yinaa-e o va nda dimullo ni.

Yeesu singi poombɔ kikiɲaa va-o

(Marke 9.14-29, Luke 9.37-43a)

14Ndáà tiiyaa nɛɛ sɛ́lɔ́ɔ́ va-a, mí langbanɔɔ pum sɔɔnguu Yeesu ikɛi, mó baŋ vulan ndu o labɛngunin, 15mó dimi aa: «Maalii, tuinun po nuu iɲíí, naa ɲinaa co ndu ni, lɔ́ɔ́ pum o del o yin, lɔ́ɔ́ pum o del o mɛnndan nin. 16I yoo kaandeŋaa nɔmnda ndu, kɛ a nɔla ndu singi le.» 17Mí Yeesu muli aa: «Éé, niaa vanaa nila kalua a vanaa laasiannda ha! Háá telen kuɛɛ nɛ ya lo yɛnin niaa ikɛi? Vɛ̀ɛ̀ kpɛ́ ya lo yɛnin biwnɔnndo a niaa? La cuu ya ndu nanu.» 18Mí Yeesu soaa ɲina vɔɔn kon, mó fula poombɔ kalaa nin, mí poombɔɔ siangun bɛɛ o foofo kon. 19O kon mí kaandennda sɔɔnguu Yeesu ikɛi, má ɲuna ndu sɔɔsɔɔ aa: «Le yɛɛ naa n bumba yɛ ɲina vɔɔndo ho tovɔɔ?» 20Mí Yeesu mulul nda aa: «Kani la nɔ laalan bɔɔ le. I co niaa toɲaa dimul, niáà nɔ pɛ laalanndo maa kulii mutarde, niáà nɔla mi niáà dimul pembei he aa: ‹Faŋan o fondaa ho, mà kɔɛ o nda›, mì ndíì faŋan. Ɲɛ-ɲɛ niáà bumbanin tosa le. 21Kɛ ɲina vɔɔn vaa nuaa nɔla vanndo faŋan kɔɔli le, te o co a piɛilen a á sumndo biyɔɔ le.»

Yeesu soo vɛlɛ a piɔ́m ndɔɔ a á tendul ndɔɔ o kɔɔ

(Marke 9.30-32, Luke 9.43-45)

22Tuma nda va kelaa o tàndá Kalile-o nin-ndo, mí Yeesu dimul kaandeŋaa ndɔa aa: «A malnin Po vanacieo vannda o ba, 23mà dii ndu, kɛ mò tendul, mò fula vanvílɛ́iya tɛɛn o paale yàándɔlen.» Mí kaandennda buulan taw.

Yeesu nda Piɛr a yɔngu mulu Cɛi-Hala-o

24Mɛɛ Yeesu nda kaandeŋaa ndɔa tiiya Kapɛrnaum, mí vanaa va mulu Cɛi-Hala-o biyɔɔ-a soaa o Piɛr lo, má dimul ndu aa: «Mò va maa vana niaa bɛndoo ndu sala mulu Cɛi-Hala-o le?» 25Mí Piɛr muli aa: «O salà.» Piɛr luɛyɔɔ cɛinin, mí Yeesu keleŋa sɔɛi cua, mó ɲuna ndu aa: «Simɔn, vɛ̀ɛ́ n yiyan yɛ a sɔɛi he: nɛ̀ɛ̀aa masaa co o lɛŋnden coo-a bii yɛ muloo o ba, pilacieea baa mialla?» 26Mó mulul ndu aa: «Mialla o ba nda bii ni.» Mí Yeesu dimul ndu aa: «Mɛɛ kon co dimio ni maa pilaciea nda co lecoo le! 27Kɛ yɔŋii naa n tɛɛmbuu nda kɔltan, kɔ o dalaa nin, mà kɔ landu dolinnde, suw tase n cuanin-ndo, a kumbi ndu sondoo, a soli volii n saalunnin ndu o sondo-e, a hun yɔngu le naa ŋiɔn.»

Currently Selected:

Matie 17: BKG

Highlight

Copy

Compare