Tɔŋ lasálàá 5
5
1«Te vanndo ce pɛ dɛnɔɔ pum o tosanndo, te kon te mò sina sɔɛi pum, mà veelu vannda le seilen tɛndaa a dɛnɛ kon o kɔɔ, kɛ mò kɛɛ le kɔlan seile len tɛndaa, mɛɛ hakio o tosa ni, sanga haki ndɔɔ vanin ndu pila o lebol. 2Te vanndo pilan yɛ pɛ ɲɛ nɔɔlɛiyo#5.2 ɲɛ nɔɔlɛiyo: Nɔɔlaa Mɛlɛka o hɔl pɛɛn. Ɲɛ hɛnan Mɛlɛka loo. hali o sina lepɛŋndo nin, maa visi nɔɔlɛi vílɛ́iyo, te kon te cɔlu cieenin nɔɔlɛi vílɛ́iyo, te kon te mò pilan visin visi nɔɔlɛi vílɛ́iyo pum o visia pɔm-pɔmbɔa kela lɛŋ-nda tɛɛn, mɛɛ o siŋnun vana nɔɔlɛiyo a vana tɛɛmbua tɔŋndo. 3Hali mì vanndo sìná le, te o pilan pɛ vanaciee co o dɛnɛ nɔɔlɛiyo nin-ndo, dɛnɛ súú-súù nɔla mo nɔɔliaa vanacieo, vana kon siŋnun vana tɛɛmbua tɔŋndo lɔ́ɔ́ o sinanin tɛɛmbuu ndɔɔ-o. 4Te vanndo yiyan fɔlɔn ɲɛkɛndɛi le, mo teŋnun#5.4 teŋnun: tioŋnɔnndo, mɛnanndo o co ni, ciɛ́ɔn cuaa le dɛnɔɔ kɛɔ tosaa. le dɛnɛ kɛndɔɔ tosaa, te kon te le dɛnɛ vɔɔndo, te o dow sɔɛi ken taasi mò tosa sɔɛi o teŋnun ken coo-e le, telen o sinanin lende-o, o siŋnun vana tɛɛmbua tɔŋndo.
5Lelan, mɛɛ mì vana tɛɛmbuu tɔŋndan ndan o pilɛ-o sɔlɔlan haki o tosa-o, 6o kon, o hin a cɔlu laandoo le sálà bɛɛndiaa isɔɔ o ya Mɛlɛka lo le haki o tosa-o: saa laandoo, te kon te cuin laandoo. Mì vana-solia-lasálàá tosa ndu faleŋii baŋannde coo le haki ndɔɔ vɔɔsuuo mò malnun haki.»
Sálàá le vanaa bala fondoa
7«Te vanndo nɔ se le saa laandoo, te kon te le cuin laandoo sɔlaa le, o hin o Mɛlɛka lo a piinda nda ŋiɔn, te kon te kangboa nda ŋiɔn le sálà bɛɛndiaa isɔɔ solio le haki o tosa-o. Mì o pilɛ va le sálàá le hakio sɔlaa malɔɔ, o pilɔɔ le sálà loamaa. 8Mò hin a yovaa kan o vana-solia-lasálàá lo, mì vana-solia-lasálàá dii fɔlɔn yow co le sálàá le hakio sɔlaa malɔɔ-o, mò kandu ndu bollen kiolɔɔ o kɛsei, kɛ o kilu ndu bollen kpali le, 9mò balu kooma ndɔan taaliaa o fonda-loamaa-lasálàá pindo, mò cuiŋi matɔ̀an lebɛngu. Sálà co le hakio sɔlaa malɔɔ-o co kon ni. 10O cii pɛ kon, o soli sálà loamaa a yowvo pilɔɔ, o tosa a ndu mɛɛ faleŋun sálà loamaa n co yɛ. Lende vana-solia-lasálàá bɛnda ni mo tosa vana tɛɛmbuu tɔŋndo-o faleŋii baŋannde coo le haki o tosa-o. O kon Mɛlɛka mal ndu haki. 11Te vana kon nɔ vɛlɛ se le piinda nda ŋiɔn, te kon te kangboa nda ŋiɔn sɔlaa le, o yɔngu kpeyanndo kiloo leyàá le sálàá le hakio sɔlaa malɔɔ. O bɛnda mò vow cuɛiyan lecoo le, o bɛnda vɛlɛ mo kɛsi ansan lecoo le, kani sálàá le hakio sɔlaa malɔɔ co kon ni. 12O cua ndu pɛ, o kɔɛ a ndu o vana-solia-lasálàá lo, mì vana-solia-lasálàá ɲɔla kpeyan kon baa ca, ɲɛ loonanndo co kon ni. Mò lom ndu kpúlúká o yinnden nin o fonda-loamaa-lasálàá coo, o sálàla nda loam o yinnden nin le ya Mɛlɛka lan coo. Sálàá le hakio sɔlaa malɔɔ co kon ni. 13Lende vana-solia-lasálàá bɛnda ni mo tosa faleŋii baŋannde vana kon coo le haki o tosa-o. O kon Mɛlɛka mal ndu haki. Ɲɛ tɔ̀ lonin-ndo vànin le vana-solia-lasálàá mɛɛ o tosan a sálàla ɲɛm-vaalan yɛ.»
Sálàá le ɲɛ pilaa mingio
14Mí Mɛlɛka soaa o Moise lo, mó dimul ndu aa: 15«Te vanndo tosa pɛ haki kàlà-kálàá o sandii lepɛŋnde nin, mò kɛɛ le ɲɛm co le ya Mɛlɛka-on yɔngoo, o bɛnda mò yɔngu saa kóndó nɔ lenamta loo le haki o cua a ya Mɛlɛka-o, mà kelu ndu iyama o volin latámán nin mɛɛ volin latámán có dionnɔnndo o Cɛi-Diandaa nin-ndon co yɛ. Cɔlu kon vanin le sálà ɲɛ pilaa salaa ni. 16O kon, vana tosa kon hakio-o sala ɲɛm ndóò bɛnda le ya Mɛlɛka yɔngoo-on kpow. Kɛ o va pɛ mun salaa, o handu ipilɛ o ŋuɛɛnu oo ŋuɛɛnu coo, o hin a ɲɛm mun o vana-solia-lasálàá lo. O hin pɛ a mun, vana-solia-lasálàá tosa faleŋii baŋannde ndu coo a saa kóndó kon le haki o tosa-o. O kon Mɛlɛka mal ndu haki. 17Hali mì vanndo sìná le, te o tosa pɛ hakio, mò tosa dɛnɛ tɔŋnda Mɛlɛka lan la kuuna-o, o siŋnun vana tɛɛmbua tɔŋndo hali mò sina telen o tosa dɛnɛ kon-ndo le. Le hee, sanga haki ndɔɔ vanin ndu pila o lebol. 18O bɛnda mò yoo vana-solia-lasálàá cɔlu fula o cɔlua pɔmbɔa nin-ndo, saa kóndó nɔ lenamta loo pɛɛn. O kɔɛ pɛ a ndu, à kelu ndu iyama maa cɔlu co le sálà mingiaa ɲɛ pilaa-o, mì vana-solia-lasálàá tosa faleŋii baŋannde vana kon coo le haki o tosa o sina lepɛŋndo nin-ndo. O kon, Mɛlɛka mal ndu haki. 19Sálà co le ɲɛ pilaa mingio-o co kon ni, kani tɛɛmbuuo kpeekpei vana kon ndóò tɛɛmbuu a Mɛlɛka ni.»
20Mí Mɛlɛka soaa o Moise lo, mó dimul ndu aa: 21«Te vanndo ve sakpo a Mɛlɛka le, mò tosa yɔŋ vɔɔndo, mò pala puapilɛ ndɔɔ a ɲɛ nda ke ndu le kɛsio-o o kɔɔ, a ɲɛ nda yow ndu-o o kɔɔ, mò yɔŋ vuilen, mò puu ɲɛ pilaa a sondo yeelaa, 22te kon te mò saalun ɲɛ pila lo-o, mò kɛɛ le ndu cɔmndo, mò mɛnan o còòlan coo a dɛnɛ vɔɔn vanacieo tosà-o o kɔɔ, 23mɛɛ o tosa yɔŋ vɔɔn bɛndu. Te o sina pɛ haki ndɔɔ, o bɛnda mò sala ɲɛ o ciimbuu-o, ɲɛ o puu a sondo yeelaa-o, ɲɛ nda ke ndu le kɛsio-o, te kon te ɲɛ pila lo mo saalun ndu-o. Kani hakio o tosa le dɛnnda o tosa lan-ndan ni, lelan o siŋnun vana tɛɛmbua tɔŋndo ni. 24O kon kɔɔli, o bɛnda mò mingi ɲɛ o viinun sɔɛi ndɔɛi mo mɛnan o còòlan coo-o. O va pɛ ndu mingio, o handu ipilɛ o ŋuɛɛnu oo ŋuɛɛnu coo o vɔngu ndɔɔ coo. O kon, o mingul vana nɔ ɲɛ kon-ndo paale nda vanin cɔlu o yɔngunin vana-solia-lasálàá le sálà ndɔ co le ɲɛ pilaa mingio-o solio len. 25O kon o hin a cɔlu sálà co kon le sálà mingiaa ɲɛ pilaa-o o ya Mɛlɛka lo: cɔlu fula o cɔlua pɔmbɔa nin-ndo, saa kóndó nɔ lenamta loo. Mà kelu ndu iyama, mà yɔngu vana-solia-lasálàá ndu le sálà co le ɲɛ pilaa mingio-o solio. 26Mì vana-solia-lasálàá tosa faleŋii baŋannde ndu coo Mɛlɛka o hɔl. O kon, o sɔla hakio malɔɔ le ɲɛ-ɲɛ o tosa mó siŋnun vana tɛɛmbua tɔŋndo.»
Currently Selected:
Tɔŋ lasálàá 5: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
