Tɔŋ lasálàá 4
4
Sálàá le hakio sɔlaa malɔɔ
1Mí Mɛlɛka soaa o Moise lo, mó dimul ndu aa: 2«Soo o Israɛlla lo ma dimul nda aa: ‹Te vanndo tosa pɛ hakio o sina lepɛŋndo nin, mò tɛɛmbuu tɔŋnda Mɛlɛka lan o pilɛ a dɛnɛ ndu Mɛlɛka kuuna-o pum tosaa, nuaa vana kon bɛnda le tosaa ni:
3Te vana-solia-lasálà sɔla pɔlaa-o tosa hakio ni, mì haki ndɔ kon taŋ o vanaa tɔ̀a lo, o bɛnda mò solul Mɛlɛka sálàá le haki kon a naw tova nɔ lenamta loo, haliko mo sɔla hakio malɔɔ. 4O bɛnda mò hin a naw tova kon o cɛi-kola-toandaa-labɔɔŋianndo sondoo, mò handu ndu baa o lebol, mò kelu ndu bololan ya Mɛlɛka o hɔl. 5Mì vana-solia-lasálà sɔla pɔlaa-o cua kooma cɔlu kon, mò luɛi a man o cɛi-kola-toandaa-labɔɔŋianndo nin, 6mò vow suei lenin, mò vesul man bɛmbɛ leŋɔmmɛw ya Mɛlɛka o hɔl o kola co o landaa o Cɛi-Diandaa nin-ndo, o kpengii co ndu o hɔl-le coo. 7Mò suu vɛlɛ kooma man o kpɛ̀ɛ́n fonda nda loam ansan coo-on coo Mɛlɛka o hɔl o cɛi-kola-toandaa-labɔɔŋianndo nin. O cii pɛ, o kɔ cuiŋi matɔ̀an o fonda nda sòli sálàla loamaalan coo-o bɛngu, o co o cɛi-kola-toandaa-labɔɔŋianndo sondoo-o pɛɛn. 8Mò faŋa cuɛima naw tova yɔngun kon le sálà kon-ndan kpow, sálàá le hakio sɔlaa malɔɔ pɛɛn: cuɛima kumbu pulon-ndan a cuɛima pulun mun simbulun nin-ndan, 9kɔlkelen miunndon a cuɛima kumbu mun mì ma kumbu kpengun miunndon-ndan a bungɛi hiow naŋɔɔ o yemnde nin-nde, i vana faŋa a kɔlkelon latulu-e pɛɛn. 10Te vana-solia-lasálàá faŋa pɛ ɲɛm mun lende maa mɛɛ o bɛnda le mun faŋaa o cɔlu sálà kɔlɲuloo yɛ, o bɛnda mò lom mun o fonda-loamaa-lasálàá coo, nɛɛ nda sòli sálàla loamaalan-nda pɛɛn. 11O kon kɔɔli, o cua yáw naw tova kon, visin ndɔn, bolle ndɔlen, bɛngula ndɔlan, pulun ndɔn a poola co lenin-ndan kpow, 12kon co dimio ni aa naw kon kpow, o fula a ɲɛm mun o dɔ́ɔ́ngɔ́ɔ̀ kɔɔli, o kɔɛ a mun nɛɛ diandaa pum, nɛɛ nda hulu pultan-nda, o lom mun kpúlúká o kilion coo. Ó sál lapullo coo ɲɛm mun bɛnda le ŋɔu ni.
13Te o va pɛ maa sɛ́lɛ́ cuavaa Israɛlla kpow tosa hakio o sina lepɛŋndo nin ni, mà tɛɛmbuu tɔŋndo pum a ɲɛ ya Mɛlɛka kuuna tosaa-o, mà siŋnun vanaa tɛɛmbua tɔŋnda lende, mì sɔɛi ken vennun nda tɛɛn, 14lɔ́ɔ́ haki kon sinannin válán-ndo, nda kpow a bɛnda mà soli naw tovaa sálà le haki kon, mà kɔɛ a ndu o cɛi-kola-toandaa-labɔɔŋianndo sondoo. 15Mì kaasoŋaa kɔlkalua nda tɛɛn a handu balan naw tova kon o lebol Mɛlɛka o hɔl, mà kelu ndu bololan ndon. 16A cii pɛ, vana-solia-lasálà sɔla pɔlaa-o kɔɛ a kooma cɔlu kon matiŋ o cɛi-kola-toandaa-labɔɔŋianndo nin, 17o vow suei ndɔɛi lenin, o vesul man bɛmbɛ leŋɔmmɛw o kola-landaa co o Cɛi-Diandaa nin-ndo, o kpengii co ndu o hɔl-le coo. 18O kon, o suu vɛlɛ kooma man o kpɛ̀ɛ́n fonda-loamaa-lasálà co Mɛlɛka o hɔl o cɛi-kola-toandaa diandaa nin-ndo. O cuiŋi kooma tɔ̀an kpow o fonda-loamaa-lasálàá bɛngu, nɛɛ nda sòli sálàla loamaalan o cɛi-kola-toandaa-labɔɔŋianndo sondoo-a pɛɛn. 19Mò faaŋiaa cuɛima naw tova kon kpow, mò lom man kpúlúká o fonda-loamaa-lasálàá coo. 20O bɛnda mò tosa a naw tova kon mɛɛ o tosa a naw tova yɔngun le sálàá le hakio sɔlaa malɔɔ-o yɛ, tova yɔngun le haki bolle vanaa-solia-lasálàá-o pɛɛn. Lende vana-solia-lasálàá bɛnda ni mo tosa faleŋii baŋannde nda coo le haki nda tosa-o, o kon Mɛlɛka mal nda haki. 21Ken cuu pɛ, o soli naw tova kon o dɔ́ɔ́ngɔ́ɔ̀ kɔɔli, à lom ndu o yinnden nin mɛɛ nda lom naw tova tasoo yɛ. Sálàá le haki vannda kpow malnɔnndo co kon ni.›
Sálàá le simlacinɔɔ pum
22‹Te simlacinɔɔ pum tosa hakio o sina lepɛŋndo nin ni, mò tɛɛmbuu tɔŋndo pum o dɛnɛ Mɛlɛka Hala ndɔɔ kuuna-o pum tosaa nin, mɛɛ o siŋnun vana tɛɛmbua tɔŋndo. 23Te o sina dɔ́ɔ́ pɛ maa o tosa hakio, o bɛnda mò hin a cuin toovi nɔ lenamta loo le sálàá solio, 24mò handu baa cuin kon o lebol, mò kelu ndu bololan Mɛlɛka o hɔl, o fonda nda kialu cɔlua co le sálà loamaa-a bololan-ndo. Sálà co le hakio sɔlaa malɔɔ-o co kon ni. 25O kon kɔɔli, vana-solia-lasálàá vow suei o kooma cuin kon nin, o suu man o kpɛ̀ɛ́n fonda-loamaa-lasálàá, nɛɛ nda soli sálàla loamaalan-nda. O kon o cuiŋi kooma tɔ̀an o fonda-loamaa-lasálà kon bɛngu. 26O cii pɛ, o lom cuɛima cuin toovi kon kpow o fonda-loamaa-lasálàá coo, mɛɛ o lom cuɛima cɔlu sálà kɔlɲuloo yɛ. Mɛɛ lende vana-solia-lasálàá bɛnda ni mo tosa faleŋii baŋannde ndu coo le haki o tosa-o. O kon, Mɛlɛka mal ndu haki.›
Sálàá le vanaa tɔ̀a
27‹Te vana pilɛ o vanaa tɔ̀a tɛɛn tosa hakio o sina lepɛŋndo nin ni, mò tɛɛmbuu tɔŋndo pum a dɛnɛ Mɛlɛka kuuna tosaa-o, mɛɛ o siŋnun vana tɛɛmbua tɔŋndo. 28Te o sina dɔ́ɔ́ pɛ maa o tosa hakio, o bɛnda mò yɔngu cuin laandu nɔ lenamta loo le sálàá solio le haki o tosa-o. 29Mò handu baa cuin laandu kon o lebol, mò kelu ndu bololan o fonda nda kialu cɔlua co le sálà loamaa-a bololan-ndo. 30A dii ndu pɛ, vana-solia-lasálàá vow suei o kooma ndɔan nin, o suu man o kpɛ̀ɛ́n fonda-loamaa-lasálàá, nɛɛ nda soli sálàla loamaalan-nda pɛɛn. O kon kɔɔli, o cuiŋi kooma tɔ̀an o fonda-loamaa-lasálàá bɛngu. 31O faaŋiaa cuɛima cuin laandu kon kpow mɛɛ nda faaŋiaa cuɛima cɔlua sálà kɔlɲulua yɛ, mì vana-solia-lasálàá lom man o fonda-loamaa-lasálàá coo, haliko mi cun ndɔɔ hɛnan ya Mɛlɛka. Mɛɛ lende vana-solia-lasálàá bɛnda ni mo tosa faleŋii baŋannde ndu coo le haki o tosa-o. O kon Mɛlɛka mal ndu haki.
32Te saa laandoo vanndo yɔngu le sálà co le hakio sɔlaa malɔɔ-o ni, o bɛnda mò yɔngu saa laandu nɔ lenamta loo, 33mò handu ndu baa o lebol, mò kelu ndu bololan le sálàá solio le hakio sɔlaa malɔɔ. O fonda nda kialu cɔlua yɔngun le sálà loamaa solio-a bololan-ndo o bɛnda ni mo kelu cɔlu kon bololan. 34O kon vana-solia-lasálàá vow suei o kooma man nin, o suu man o kpɛ̀ɛ́n fonda-loamaa-lasálàá, nɛɛ nda soli sálàla loamaalan-nda pɛɛn, o cuiŋi kooma tɔ̀an o fonda-loamaa-lasálàá bɛngu. 35O kon, o faaŋiaa cuɛima ndɔan mɛɛ nda faaŋiaa cuɛima saa téndé yɔngun le sálà kɔlɲuloo-o-an yɛ, mì vana-solia-lasálàá lom man o fonda-loamaa-lasálàá coo, o sálàla nda loam o yinnden nin le ya Mɛlɛka lan coo. Lende vana-solia-lasálàá bɛnda ni mo tosa ndu faleŋii baŋannde coo le haki o tosa-o. O kon Mɛlɛka mal ndu haki.›»
Currently Selected:
Tɔŋ lasálàá 4: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
