Tɔŋ lasálàá 26
26
1«La cównùn halaa fondoa le, le sélnùn piɔmnda le, la tosa pow sálà le, la kɛ́sì powtan o lɛŋnde niaalen nin, mì la kɛɛmiaa lan le lan sooloo le. Ya co Mɛlɛka ni, Hala niaa pɛɛn. 2La bii palɛi nii pɛngiɛi, mì le ke cɛi ni diandaa bɛɛlen. Ya co Mɛlɛka ni.»
Duaala Mɛlɛka yiilu cuaa ndɔa kpemaa le lan tuisio coo lan
3«Te la bii pɛ tɔŋnda nilan, te la tuei pɛ silala nilan mì kela lecoo, 4i yɔngunin piɔɔ a telen niaa bɛnda le sɔlaa-o. O kon, lɛŋnden le nɛŋi ɲɛm saŋnun lecoo-on, mì tɔlɔɔla iyɔmndan le kom kɔmnden pila. 5O niaa lo, la lonin malun niaan lɔɔ haa mì tuma kiandaa n'rɛsɛnndo tiiya, la lonin rɛsɛŋun niaan lɔɔ mì tuma lavayia tiiya. Baloo kuinin niaa o ba taw-taw, la calnunnin nila ɲulu o lɛŋnde niaalen nin. 6I lueinin kɔlɲuloo o lɛŋnden nin. La hini pɛ, ɲɛ-ɲɛ kpeeŋiaanin niaa le. I ciinin visia biyaa o lɛŋnden nin, a vɛlɛ cɔwvo luei lɛnin o lɛŋnde niaalen nin te#26.6 cɔwvo luei lɛnin o lɛŋnde niaalen nin te: Nuaa o sɛvan kɔɔli ni aa: «mɔɛi cɔwve kei lɛnin o lɛŋnde niaalen nin te». O kpema paandoo nin, o hebrei nin, le sɔɛi a cɔwvo o kɔɔ, mɔɛi cɔwve nda ni.. 7La toawnin yaamɔaa niaa, mì la mɛli nda a mɔɔn cɔwvon. 8Vanaa ŋuɛɛnu niaa tɛɛn a toawnin yaamɔaa niaa kɛmɛ. N'van kɛmɛ niaa tɛɛn a toawnin yaamɔaa niaa vaalan tɔ́. Yaamɔaa niaa kan a delinin niaa laci o mɔɔn cɔwvon bɛngu. 9I mululnin niaa hɔlla, mì nɛŋi niaa ipulu#26.9 mì nɛŋi niaa ipulu: Kɔlɔ diomndan ndan co ni aa: «mì tosa mì la siŋnun vanaa vialaa»., mì kui niaa, mì simi kpema nuu yili a niaa. 10Ɲɛm niaa koawnin-ndon vanin niaa o ba taw-taw, mì la va mun dioo. La solinin n'paandon o kondalan nin le n'sɛnɛiyon lueiyo lon. 11I kɛsinin calta nilan niaa tɛɛn, i nɔnin nɛyɔn niaa le. 12I vanin kelaa niaa tɛɛn, i vanin Hala niaa, mì niaa va vanaa nia. 13Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin ni, haliko la va cɛa Esiptea le. Ya yem yɔm kpòndò lecɛ ndáà handu niaa coo-o ni, mì la va kelaa a bolle iheelaa tema.»
Dangala Mɛlɛka kɔngɔlan le tuisio vanaa lanila kalua coo lan
14«Kɛ te la tui ya diom te, te kela o tɔŋndan ndan kpow coo le, 15te la kɛɛ pɛ silala nilan, mì la pɛɛsa nɛila nilan, te kela o tɔŋndan nilan kpow coo le, te la tɛɛmbuu pɛ kpema nuu, 16la tuei-yɔ mɛɛ ya tosalnin niaa yɛ:
I tuisinin kɔl yulan-yulanndo, ɲawvo a nààla dialun tuwlan niaa coo. Nààla lan la tɛɛmbuunin niaa hɔltan mì la dɔw niaa pila yɛɛvɛ. La vanin ciɛɔn niaa fondo fúú, kani yaamɔaa niaa dɔawnunnin balo a mun ni. 17I mululunnin niaa, yaamɔaa niaa koaŋnin niaa, mì vanaa nɔ nɛyɔn niaa-a kɛsin niaa nda o labɛngunin. La ɲaanunnin hali mì vana ve niaa tovɔɔ le.
18A kon kpede te la tui ya diom te, i vangalanin sangala niaalan bɛmbɛ leŋɔmmɛw le hakila niaalan. 19I pesinin ɲɛ niaa tiindan-ndo, i kindinin halataalaa niaa coo kpoke maa icilin, mì kindi lɛŋnden maa idaɲa#26.19 mì kindi lɛŋnden maa idaɲa: Kon co dimio ni maa piɔɔ venin sia le, valoo kengelanin yondolan kekew. O kon, vana nɔlanin ɲɛ-ɲɛ vàà te kon te ɲɛ-ɲɛ tɔlɔɔ le.. 20Yoomuma niaan ma cuunin o fondo fúúo coo. Lɛŋnde niaalen le nɛŋinin ɲɛm saŋnunnin lecoo-on te, tɔlɔɔla iyɔmndan bɛɛ la kumnin te.
21Te la simul-la pɛ, mì la kɛɛ le sɔɛi nii biyɔɔ, i cɔɔlunin bɛpɛla niaa vangala bɛmbɛ leŋɔmmɛw mɛɛ hakila niaalen la co yɛ. 22I cuunin visia biyaa o lɛŋnde niaalen nin, mì visia kan diw cuavaa niaa, mà diw cɔlua niaa, mà cii niaa háá mì nɛila niaalan la yimbu.
23Te kon kpow tiw vɛlɛ le niaa silaa le, te la simul-la pɛ, 24ya bɛɛ, i simulnin niaa, mì cɔɔlu sangala niaalan vangala bɛmbɛ leŋɔmmɛw le hakila niaalan. 25I tuisinin cɔwvo niaa coo, le niaa màá mingullo le kpema ni niaa tɛɛmbuu-o. Tuma niaa kɔ viannunnin o kobila niaalan nin-ndo, i saŋnin nàà n'kɔnyaa niaa tɛɛn, o kon la delnin yaamɔaa niaa o ba. 26I tuŋnin niaa ɲɛdiaa. Vanlaandua tɔ́ a loamnin bulu niaa o fonda loamaa buloo ndu pilɛ nin, mà cuu niaa ndu ɲɛ-pɔmbɔ cuinii. La dianin ndu kɛ la pimnin ndu le.
27O kon nin kpede te la bii sɔɛi nii le, te la hiow pɛ laci a ya simullo, 28ya bɛɛ, i simulnin niaa a kɔltuwvo, mì cɔɔlu sangala niaalan vangala bɛmbɛ leŋɔmmɛw le hakila niaalan. 29La sɔamnin poaa niaa a cuavaa niaa laandua. 30La nɛinunnin ya háá mì tɛɛmbuu sooluula niaalan, mì pesi máánnda niaala niaa loam ansan coo lan, mì handu niaa a vílɛ́iya o piɔmaa niaa piɔsiɛiya coo. 31I siinguunin kobila niaalan bémbélan, mì siinguu sooluula niaalan pɔmndan. Sálàla niaala cun kɛndɛlan la hɛnan ndɛnin ya cun te. 32Ya pila tɛɛmbuunin lɛŋnde niaalen, háá mì yaamɔaa niaa hun calnin lenin-nda dɔwnun kɔndɔfili taw. 33I saŋnin niaa vanaa-mangalaa-isɔɔa tɛɛn, lɛŋnde niaalen le lonin fondo, mì kobila niaalan la siŋnun pɔmndan.
34O vɔsila niaa ciinin o káálen nin o yaamɔaa lo lan kpow nin, yondola niaala lonin fondo lan la sɔlanin pɛngio. Pɛngi láà sɔla paandu loo, la sɔlanin ndu o vɔsila lan nin. 35Lende ni, yondolan la sɔlanin pɛngio. Pɛngi kon vanin sɔ̀ngɔ́ pɛngi niaa tuŋ-ndan tuma niaa va icali o lɛŋnden nin-ndo-o.
36O niaa tɛɛn, vanaa lonin yoomu o lɛŋii yaamɔaa ndaa nin-nda, i lueinin kɔl yulan-yulanndo nda nin. Hali hoeiye hiiluu peelen nin, mà tuei hiiluu kon, a voolunin mà ɲaanun mɛɛ vana ɲaanun yaamɔɔ co hunɔɔ a mɔɛi cɔwve o ba-o nuaa yɛ. A delinin hali mì vana ve nda tovɔɔ le. 37Hali mì vana ve nda tovɔɔ le, a boŋinin o nda pila vellaa-velle mɛɛ vana ɲaalun mɔɛi cɔvii yaamɔɔ nuaa yɛ. A nɔlanin yaamɔaa ndaa simullo le. 38O mɛɛlulan, lɛŋii yaamɔaa ndaa i dɔawnin nda yɛɛvɛ, ma vi vanaa-mangalaa-isɔɔa tɛɛn. 39O niaa tɛɛn, vanaa pum a lonin yoomu o lɛŋii yaamɔaa niaa nin-nda, nda dɔawnunnin yɛɛvɛ le hakila nda pilalan a le hakila fuɲaa ndaa mamaa.»
Hala loonunnin a kpeema co ndu tɛɛn nda Israɛlla-o o kɔɔ
40«O kon, a sɔlɔlannin tɛɛmbuula ndalan a tɛɛmbuula fuɲaa ndaa mamaa, mà sɔlɔlan kasila nda del a ya lan a nila kalula nda tosa a ya lan. 41A biinin bila maa ya bɛɛ mí simul nda, mí yaa nda o lɛŋii yaamɔaa nda nin. O kon, a sinanin maa a yɔŋnun vanaa lo lediom coo le. Le hee a tuisinnin, mà cɛl sanga tol nda coo le hakila ndalan-ndo. 42I loonunnin a kpema co naa tɛɛn naa Yakɔb-o, i loonunnin a kpema co naa tɛɛn naa Isaak-o, i loonunnin vɛlɛ a kpema co naa tɛɛn naa Abraham-o. O kon, i loonunnin a ciɛ́ɔn ya cua a lɛŋnde ndalen o kɔɔ-on. 43Tuma nda vanin nɛɛ celen-ndo, lɛŋnde ndalen le vanin lemalnannden, o kon yondolan la sɔlanin pɛngio. Tuma kon, nda pila co va sangaa sɔlaa le tùú nda kɛɛ le tɔŋnda nilan biyɔɔ-o a le tùú silala nilan la nɛinun nda-o. 44Ya yɛ, hali tuma nda vanin a saŋnannda o lɛŋii yaamɔaa ndaa nin-ndo, i kɛɛnin nda few-few le, a nɛinunnin ya le, i ciinin nda le, i tɛɛmbuunin kpema nuu a nda le. Kani Mɛlɛka ya co ni, Hala ndaa pɛɛn. 45Le cinda ndaa, i loonunnin a kpema co naa tɛɛn naa fuɲaa ndaa mamaa-o o kɔɔ, fuɲaa ndaa mamaa ya soli o lɛŋnde Esipte len nin vanaa-mangalaa-isɔaa celennda o hɔl-la pɛɛn. I soli nda haliko mi va Hala ndaa. Ya co Mɛlɛka ni.»
46Silalan ndan, pɛɛkulan ndan a tɔŋndan ndan Mɛlɛka handu ndu pila a Israɛlla tɛɛn o pembei Sinai ni. A Moise o kei le nda lan tɛɛngullo ni.
Currently Selected:
Tɔŋ lasálàá 26: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
