Tɔŋ lasálàá 11
11
SILALAN LE ƝƐM DIANDAN A LE ƝƐM DINDU LOON
Visia diandaa a visia nɔɔlɛiya
1Mí Mɛlɛka soaa o Moise nda Aarɔn ndo, mó dimul nda aa: 2«Soo o Israɛlla lo ma dimul nda aa: ‹O visia co o lɛŋnden coo-a kpow tɛɛn, visia niaa bɛnda mì la de-a co haa ni: 3la dio visi oo visi kpukula, mó nɔ buuku tɛndaa a bɛngu piasaa. 4Kɛ visia pum co, kpukulaa kínɛí nda kpukula ni, a nɔ buuku tɛndaa le, a pum co vɛlɛ buuku tɛndaa kínɛí nda nɔ ni, kɛ a kpukula le. La dia visia kan te, la cɔ nda maa visia nɔɔlɛiya nda co ni. Lelan, la dia ɲɔɔmɛɔ le, kani ndu o kpukula, kɛ o nɔ buuku tɛndaa le, la cɔ ndu maa visi nɔɔlɛiyo o co ni. 5La dia damanndo le, kani o kpukula kɛ o nɔ buuku tɛndaa le, la cɔ ndu maa visi nɔɔlɛiyo o co ni. 6La dia saŋndo le, kani o kpukula kɛ o nɔ buuku tɛndaa le, la cɔ ndu maa visi nɔɔlɛiyo o co ni. 7La dia vɛlɛ pewvo le, kani o nɔ buuku tɛndaa a bɛngu piasaa, kɛ o kpukula le, la cɔ ndu maa visi nɔɔlɛiyo o co ni. 8La bɛnda mì la de visin visia kan te few, nduyɛ la pilan nda vɛlɛ a vílɛ́iya le. La cɔ nda maa visia nɔɔlɛiya nda co ni.
9O visia co o peelo-a tɛɛn, a niaa bɛnda mì la de-a co haa ni: la dio visia peaa nɔ kɛkɛwlan a pɛɛpɛɛlan-nda, a co o mɛmma ihɛllan nin, o peela bɛndulan a o peela pɔmbɔlan nin-nda. 10Kɛ la dia visia peaa nɔ lakɛkɛw a lapɛɛpɛɛ le-a le, o va bɛɛ visia pɔmbɔa, te kon te a tɔ̀a co o mɛnndan nin-nda kpow. La cɔ nda maa visia nɔɔlɛiya nda co le niaa ni. 11Mɛɛ nda co ɲaa nɔɔlɛi bɛndu-bɛndu le niaa yɛ, la bɛnda mì la de visin ndan te. La pilan nda a vílɛ́iya le few. 12Visia peaa nɔ lakɛkɛw a lapɛɛpɛɛ le-a kpow, la cɔ nda maa visia nɔɔlɛiya nda co le niaa ni.
13O yowva tɛɛn, a niaa bɛnda mì la de le-a co haa ni, kani a co bɔɔ ɲaa vɔɔn: kovɔ́ɔ̀, tɔ̀mkumbaa, duàá, 14siɔ́ɔ̀, peele-bɔ́lɔ́ɔ́#11.14 peele-bɔ́lɔ́ɔ́: Yowvo súúo pum peele-bɔ́lɔ́ɔ́ co ni. O póltan nin a o bundɛlan nin o cal ni. Yow biyaa n'sɔɔ ndu bɛɛ co ni maa siɔ́ɔ́, te kon te maa kòòndo. a yovaa co súú pilɛ kon-nda, 15basabasakoendea súúlan kpow, 16soninkɔnɔɔ, huo, kòòndoa súúlan kpow, 17kpukulukpuo, tenkɔngɔɔ#11.17 tenkɔngɔɔ: Vannda pum veelu vɛlɛ yowvo ho aa «tilankɔngɔɔ», te kon te aa «tilakɔngɔɔ»., hu bɛndoo, 18yovaa peea, hɔ̀lɔ́hɔ̀lɔ́ɔ̀, yow yɔɔyaa pupulaa-o, 19yow yɔɔyaa cɔcɔɛi siaŋaa, duàá-nawva#11.19 duàá nawva: Yovaa humbua kela nawva kɔɔli-a co duàá-nawva ni. Vannda pum veelu nda aa yovaa nawva. súúlan kpow, yovaa n'kpoa a tɔnganndo.
20La dia vɛlɛ kambalaa pɔmbɔa nɔ bɔɔlan a kpasan-nda le. La cɔ nda maa ɲaa nɔɔlɛiya nda co le niaa ni. 21Kɛ o va bɛɛ lende, o kambalaa nɔ kan bɔɔlan a kpasan-nda nin, la tiwba mì la de a nɔ kpasan le huuloo-a. 22O kambalaa kan nin, a niaa bɛnda mì la de-a co haa ni: sóónɔa, tɛlɛa, paalenda a selennda. 23Kɛ kambalaa tɔ̀a nɔ bɔɔlan a kpasan-nda kuunan niaa le dioo, kani ɲaa nɔɔlɛiya nda co le niaa ni.›»
Visia vana pilan a vílɛ́iya ma nɔɔla Mɛlɛka o hɔl-la
24«Visia pum co, vana pilan nda pɛ, vana kon nɔɔla. Vana-vana pilan nda pɛ a vílɛ́iya, vana kon siŋnun vana nɔɔlɛiyo háá icɔllo. 25Nduyɛ vana-vana cua pɛ visi vílɛ́i vaa lende, o bɛnda mò tɔɔ volɔɔla ndɔla cuɛinanndan, mò dindi lan, a vɛlɛ mò lo o nɔɔlɛiyo háá icɔllo. 26Visia kan co haa ni, la cɔ nda maa visia nɔɔlɛiya nda co ni: visia nɔ buukula tɛndaa le-a a visia kpukula le-a. Vana-vana pilan pɛ visi vaa lende, ndu siŋnun vana nɔɔlɛiyo. 27Visia n'yɛmbɛa nɔ pelon mún hiɔɔlu má va balɔɔ o bɛngula ndalan coo-a, la cɔ nda maa visia nɔɔlɛiya nda co ni. Vana-vana pilan pɛ visi vaa lende o vílɛ́iyo, vana kon siŋnun vana nɔɔlɛiyo háá icɔllo. 28Nduyɛ, vana-vana cua pɛ visi vaa lende o vílɛ́iyo, mò kɔɛ a ndu, o bɛnda mò tɔɔ volɔɔla ndɔla cuɛinanndan, mò dindi lan, mò lo o nɔɔlɛiyo háá icɔllo. La cɔ nda maa visia nɔɔlɛiya nda co ni.
29O visia pɔmbɔa kela lɛŋ-nda tɛɛn, a niaa bɛnda mì la ce maa visia nɔɔlɛiya nda co ni-a co haa ni: lɔŋɔɔ, bɛlɔɔ, leenda súúlan kpow, 30kposio, kulunkulunndo, sangɔɔ#11.30 sangɔɔ: Visio pum sangɔɔ co ni o peelo, o fondala mɛnndan ma co lan a nɛɛ ɲulua vana ca ndu ni. O boo kálá-káláá nin o co ni. Vannda pum veelu sangɔɔ aa «kɔngɔsilaa»., leenda súúlan kpow a ɲangafeloo. 31La cɔ visia sansun kan lɛŋ-nda maa visia nɔɔlɛiya nda co o visia kpow tɛɛn ni. Vana-vana pilan nda pɛ a vílɛ́iya, vana kon lo o nɔɔlɛiyo háá icɔllo. 32Te visi vílɛ́i vaa lende del pɛ o ɲɛ oo ɲɛ coo, o va hɛngɛi toosian a yɔmndo-o, o va volɔɔ cuɛinanndo, o va yáwvo, o va bɔlɔɔ, o va ɲɛ-ɲɛ vana solin kpeku, la bɛnda mì la vow ɲɛ kon o mɛnndan nin, mò lo o nɔɔlɛiyo háá icɔllo. Te o niinu pɛ lende, o muungu o siŋnun o diandaa. 33Te visi vaa lende del pɛ o kpɛɛnɛi puuluei nin, ɲɛ-ɲɛ co o kpɛɛnɛi ken nin o siŋnun ɲɛ nɔɔlɛiyo, la bɛnda vɛlɛ mì la pɛl kpɛɛnɛi ken. 34Ɲɛdiaa oo ɲɛdiaa mɛmma va o kpɛɛnɛi ken nin-ndan mà vesulun pɛ, ɲɛdiaa kon siŋnun o nɔɔlɛiyo, te mɛmma man ma del vɛlɛ pɛ o ɲɛ-ɲɛ vana kol nin, o va o ɲɛi laandui súú-súù nin, ɲɛ kolaa kon siŋnun ɲɛ nɔɔlɛiyo. 35Ɲɛ-ɲɛ visi vílɛ́i vaa lende del pɛ coo, ɲɛ kon siŋnun ɲɛ nɔɔlɛiyo. Te o del pɛ o nɛɛ loamaa bulua coo, te kon te o yinndaceeloo coo, la bɛnda mì la pɛl nɛɛ loamaa bulua kan, te kon te yinndaceele kon, mì la tɛɛmbuu ndu kpede. Kani o siŋnun ɲɛ nɔɔlɛiyo. Niaa bɛɛ la cɔ ɲɛm mun maa ɲɛm nɔɔlɛiyon n co ni. 36Kɛ nduyɛ, te cɔlu vílɛ́i vaa lende del pɛ o soon kólaa nin, te kon te o soon mandaa mamɛnndo nin, mɛmma man mà lo madiandaa. Kɛ vana co visi vílɛ́i kon soli o mɛmma man nin-ndo, ndu siŋnun vana nɔɔlɛiyo. 37Te visi vílɛ́i vaa lende del pɛ o yɛyii nda bɛnda le saŋɔɔ-e coo, yɛyii ken lo idiandaa. 38Kɛ te a pɔɔla nin pɛ kullon, mì visi vílɛ́i vaa lende del lecoo, la cɔ kulun mun maa n'nɔɔlɛiyon n co ni. 39Te visi vana nɔla ma de-o vi pɛ, vana-vana pilan ndu o vílɛ́iyo pɛ, vana kon siŋnun o nɔɔlɛiyo háá icɔllo. 40Vana de pɛ visi vílɛ́i vaa lende, o bɛnda mò tɔɔ volɔɔla ndɔla cuɛinanndan, mò lo o nɔɔlɛiyo háá icɔllo. Vana cua vɛlɛ pɛ ndu mò kɔɛ a ndu, vana kon bɛnda mò tɔɔ volɔɔla ndɔla cuɛinanndan, mò lo o nɔɔlɛiyo háá icɔllo.
41La cɔ ɲaa huulaa pɔmbɔa a visia pɔmbɔa sasun lɛŋ-nda kpede maa ɲaa nɔɔlɛiya nda co ni, la dia nda le. 42La dia ɲaa huulaa a visia pɔmbɔa sasun lɛŋ-nda le, hali a sasun o demboo coo-a, á kela o bɛngula ndalan coo-a, á nɔ yɛmbɔn-nda pɛɛn a á nɔ bɛngulan taw-taw-va, kani a co bɔɔ ɲaa nɔɔlɛi bɛndu le niaa. 43Niaa pila nɔɔlian mì la siŋnun vanaa vɔɔŋaa bɛndu a ɲaa huulaa a visia pɔmbɔa sasun kan lɛŋ-nda o kɔɔ le. La del kasi Mɛlɛka o hɔl a dɛnɛ ndaa o kɔɔ le. 44Kani ya co Mɛlɛka ni, Hala niaa pɛɛn. Lelan la dindin few, mì la va vanaa diandaa, kani o diandaa ya co ni. Le hee, la síŋnùn vanaa nɔɔlɛiya a ɲaa huulaa a visia pɔmbɔa sasun lɛŋ-nda o kɔɔ le. 45Ya kpeekpei co Mɛlɛka ni, ya soli niaa o lɛŋnde Esipte len nin ni, haliko mi va Hala niaa. La va vanaa diandaa, kani o diandaa ya co ni.
46Silalan la co lan le niaa a dɛnɛ visia, yowva, ɲaa yoomaa co o peelo-a a ɲaa yoomaa sasun lɛŋ-nda kpow o kɔɔ ni. 47Silalan-ndan la malanin niaa le hiyanndo tosaa ɲɛ dendu ya Mɛlɛka o hɔl-lo a ɲɛ dindu ya Mɛlɛka o hɔl too tɛɛn, le hiyanndo tosaa visi vana dia-o a visi vana di loo tɛɛn.»
Currently Selected:
Tɔŋ lasálàá 11: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
