Tɔŋ lasálàá 10
10
Poaa ŋiɔŋaa Aarɔn-nda ŋɔɛ o yinnden nin
1Paale pilɛ, mí poaa Aarɔn-nda nda ŋiɔn, Nadab a Abihu, vana-vana cua bonyii fuusɛi ipilɛ, má vow yinnde ladɛngulten lenin, má kɛsi ansan lecoo. Má kɔa Mɛlɛka o hɔl a yinnde súú celennden, nduyɛ o ve lende le Mɛlɛka ndóò yeema le. 2Lelan, mí yinnden le fula fɛlɛmɛndɛn nɛɛ Mɛlɛka va-a#10.2 nɛɛ Mɛlɛka va-a: O Fonda Diandaa-Diandaa va o Cɛi-Diandaa nin-ndo nin Mɛlɛka va ni. Kani o Fonda Diandaa-Diandaa kon nin kesu kpema Mɛlɛka-o va o kɛsiaa ni. Nduyɛ, kesu kpema kon va tɔɔmasele cɔm maa Mɛlɛka co Israɛlla tɛɛn-ndo ni. O Fonda kon hɔl-ndɔ yinnde lom vanaa-solia-lasálàá ha len le fula., mí le hun loam nda kpúlúká, má vu Mɛlɛka o hɔl lon. 3Mí Moise dimul Aarɔn aa: «Le hee Mɛlɛka ndóò dimi ni aa mɛɛ mì vanaa co ndu sɔɔnguuo ikɛi-ya sina diondɔɔ ndɔɔ, nduyɛ mà biilu ndu vannda kpow o hɔl.» Mí Aarɔn mei kpili#10.3 Mí Aarɔn mei kpili: Sɛbɛlan lapum la hivi fondaa ho aa: «Mí Aarɔn caŋ taw-taw».. 4Mí Moise veelu Mikaɛl nda Ɛlsafan, poaa Usiɛl-la, fuɲa pɔmbɔ Aarɔn-ndo pɛɛn, mó dimul nda aa: «La sɔɔnguu mì la faŋa puapilɛa niaa a vílɛ́iya o Cɛi-Diandaa hɔl-ndɔ, mì la soli nda o dɔ́ɔ́ngɔ́ɔ̀ kɔɔli.» 5Má sɔɔnguu, má cua nda, má kɔa a nda a domala ndala lebɛngulan o dɔ́ɔ́ngɔ́ɔ̀ kɔɔli mɛɛ Moise dimul nda yɛ. 6O kon, mí Moise dimul Aarɔn nda poaa ndɔa ŋiɔnda pilɛa, Eleasar nda Itamar pɛɛn aa: «La tiimbùù yiinde niaa o lebol te, la sɛɛsiàà volɔɔla niaala cuɛinanndan le biisi komal niaa-o le, yɔŋii niaa pila bɛɛ sɔla piɔ́mndo, mì la tuisi vɛlɛ kɔltuw Mɛlɛka-o vanaa tɔ̀a kpow coo. Vanaa bɛnda mà caŋ poaa langbaa Mɛlɛka tɛɛmbuu haa a yinnden-nda-a, nda co Israɛlla ni, puapilɛa niaa pɛɛn. 7Lelan, la fáŋàn o cɛi-kola-toandaa-labɔɔŋianndo sondoo le, yɔŋii niaa sɔla piɔ́mndo. Kani niaa, la cii pɔlaa sɔla a cuɛima diandaama Mɛlɛka-an.» O kon, mí Aarɔn nda poaa ndɔa cɛl sɔɛi Moise dimul nda ken-nde.
Silalan a mɔiyan kolɔɔ o kɔɔ
8O kon kɔɔli, mí Mɛlɛka dimul Aarɔn aa: 9«Te la va pɛ le luɛyɔɔ o cɛi-kola-toandaa-labɔɔŋianndo nin, nɔm a poaa nɔmnda, la bɛnda mì la kol mɔiyan te, nduyɛ la bɛnda mì la kol ɲɛ-ɲɛ hiŋ vana hɔlla le, yɔŋii niaa sɔla piɔ́mndo. Silaa co hoo le niaa pila a le cuavaa niaa imamaa le fɛɛn a fɛɛn ni. 10Kon tosà ni mì la sina ɲɛ kɛsin teengen le baala Mɛlɛka-o-o a ɲɛ kɛsin teengen le baala ndɔɔ loo, ɲɛ co o diandaa ndu o hɔl too a ɲɛ co o diandaa ndu o hɔl-lo, 11haliko mi la caa vɛlɛ Israɛlla tɔŋnda ya yɔngu nda a sondo Moise-o kpow lan pɛɛku ɲɛkɛndɛi.»
Tɔŋndan a visin cɔlua nda soli sálàá-a o kɔɔ
12Mí Moise dimul Aarɔn a poaa ndɔa ŋiɔŋaa lo yoomu-a, Eleasar nda Itamar aa: «La cii pɛ sálà fula o ɲɛm vaan nin-ndo soli, mì la lom o co le lomɔɔ o yinnden nin le Mɛlɛka-o, la cua kpeyan tɔ̀ lonin-ndo, la de ndu o fonda-loamaa-lasálàá ikɛi. Kɛ la va ndu pɛ toosiaa, la vow lɛvɛnndo lenin te. Kani ɲɛdiaa diandaa-diandaa co kon ni. 13La bɛnda mì la de ndu nɛɛ diandaa. Ɲɛ niaa bɛnda le sɔlaa niaa cuavaa nɔmnda o ɲɛm fula o ɲɛm vaan nin le sálàá solio, mò ŋɔɛ o yinnden nin le Mɛlɛka-o co kon ni. Kani lende Mɛlɛka dimul-la ni. 14Nɔm pila, poaa nɔmnda a cuavaa nɔmaa laandua, la bɛnda mì la de kɔŋɔ cɔlu sálà nda heelu coo Mɛlɛka o hɔl-lo a lɔlu solin-ndo nɛɛ diandaa pum, kani falun mun yɔngun niaa ni. Niaa poaa nɔmnda falun mun yɔngun o sálàla kɔlɲulula Israɛlla solinin-ndan kpow nin ni. 15Israɛlla hunnin a visin macuɛin ŋɔanin o yinnden nin o fonda-loamaa-lasálàá coo-on, mà hin vɛlɛ a lɔlu solinnin-ndo, a kɔŋɔ nda solinin mà heelu ndu coo Mɛlɛka o hɔl, mà tosa falennde le ndu ndu cɔmndo-o. Falun mun co le nɔm a le poaa nɔmnda. Sɔɛi kelun le fɛɛn a fɛɛn-nde co ken ni, lende Mɛlɛka dimi ni.»
16Mí Moise nuwviaa cuin toovi yɔngun le sálà va le hakio sɔlaa malɔɔ-o solio-o, má dimul ndu maa a cii ndu nin lomɔɔ mó ŋɔa kpúlúká. Mɛɛ o tuei lende, mó tuulu kɔl a poaa ŋiɔŋaa Aarɔn-nda, a lo yoomu-a, Eleasar nda Itamar pɛɛn. Mó ɲuna nda aa: 17«Le yɛɛ nɛ la di visin cɔloo ho nɛɛ diandaa le? Ɲɛmahilu diandaa pila visin mun co ni. Nduyɛ Mɛlɛka yɔngu niaa cɔlu kon haliko mi la faŋa yɔŋ vɔɔn Israɛlla kpow, mì la tosa faleŋii baŋannde Mɛlɛka o hɔl le nda, mà sɔla hakio malɔɔ. 18Le tùú kooma cɔloo ho ma luei o Cɛi-Diandaa nin te-o, niáà bɛnda mì niáà de visin ndɔn o Cɛi-Diandaa nin, kani lende Mɛlɛka dimul-la mí tɛɛngul niaa sɔɛi ken ni.»
19Mí Aarɔn mulul Moise aa: «Yaŋnun-ndɔ, paalen-nden hau, poaa niaa soli sálà co le hakio sɔlaa malɔɔ-o a sálà loamaa o Mɛlɛka lo le nda pila, nduyɛ nɔm pila sina ɲɛ yɔŋnun ya-o, te yáà de pɛ visin cɔlu sálà co le hakio sɔlaa malɔɔ-o, ndóò vanin pá dɛnɛ kɛndɛ Mɛlɛka o hɔl?» 20Mɛɛ Moise tuei muli Aarɔn muli kon-ndo, mó hini kɔl.
Currently Selected:
Tɔŋ lasálàá 10: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
