Hebreea 8
8
Yeesu, bolle vanaa-solia-lasálà naa
1O sɔɔn naa n co dimio-on kpow nin, i hiow va isɔvɛ-e co hee ni: n nɔ bolle vanaa-solia-lasálàá, o co icali o kpɛŋɛ lemasa Hala-o o ba kɛndɔɔ coo o halataala-o. 2O co vali ndɔɔ tosaa o fonda-diandaa nin, o cɛi-kola-toandaa kpeekpeiyo nin, o Mɛlɛka pila kila-o, o vanaciee tosa loo.
3Vana-vana nda suili pɛ bolle vanaa-solia-lasálàá, baala ndɔɔ co ɲɛm-kéan yɔngoo a sálàlan solio ni. Lelan, o naa bɛɛ bɛnda mò nɔ ɲɛ o soli sálàá-o. 4Te o ceendo coo Krista ndóò va ni, ndóò venin bɛɛ vana-solia-lasálà le. Kani vanaa-solia-lasálàá celen co nin, a co ɲɛm-kéan yɔngoo mɛɛ tɔŋ Moise-o co yɛ. 5Vanaa-solia-lasálàà kan co vali kon tosaa o Cɛi-Hala-o nin. Kɛ vali nda co kon tosaa-o co macoaa maa vundule ɲɛ co tosanndo o halataala-o. Kani hali telen Moise va cɛi-kola-toandaa tangullo-o, mí Hala dimul ndu aa: «Toosiaa ndu ɲɛkɛndɛi mɛɛ ya tuulul nɔm ndu o pembei coo yɛ kpafii.» 6Kɛ Yeesu ndu, vali ndɔɔ hiow kon, kani ndu co simtɛɛndo le kpema hiow naŋɔɔ-o ni, o yiinun a diomnda hiow naŋɔɔ lan-ndo.
7Te kpema tasoo ndóò nɔ isɔw le, vanáà singa ndu a o diinndɔɔ le. 8Kɛ sɔvun Hala ce o vanaa ndɔa lo-on co mun ni, mó dimi aa:
«Mɛlɛka dimi aa: Paale vanin,
mì yii kpema sɛnɛiyo a vannda Israɛl a á haa Yuda.
9O venin maa o tase yáà yii a fuɲaa ndaa mamaa
telen ya bii nda baa le nda solio
o lɛŋnde Esipte len nin-ndo le.
Kpema kon ndu, má tɛɛmbuu ndu,
nduyɛ, ya va vana nda bɛndoo ni.
Sɔɛi fula ya Mɛlɛka o sondo-e co ken ni.
10Kani kpema va naa tɛɛn naa cuavaa Israɛlla-o va hoo ni aa:
‹Palɛi ken hiow pɛ,
i vownin tɔŋnda nilan nda nin,
mì sɛva vɛlɛ lan nda o lakɔl.
I vanin Hala ndaa,
mì nda va vanaa nia.
11Vana-vana o nda tɛɛn suu lɛnin o caan ndɔ le,
te kon te o puapilɛ ndɔɔ lo le ndu ya cɔmndo le,
kani nda kpede sinanin ya.
Mɛɛ nda co kpede, cɔn o vana hiow dɔɔnanndo-o,
kɔ tiiya o kaasonɔ hiow nda kpede-o lo,
12i malnin nda haki,
i loonun ndɛnin a hakila ndalan te.›»
13Te Hala soo pɛ a kpema sɛnɛiyo o kɔɔ, mɛɛ kon co dimio ni maa kpema tasoo muungu o paandoo. Nduyɛ ɲɔɔ muungu pɛ o paandoo, o siɔŋ, o kon o lo.
Currently Selected:
Hebreea 8: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
