Hebreea 7

Mɛlkisedɛk, bolle vanaa-solia-lasálàá

1Mɛlkisedɛk kon va masaa Salɛm#7.1 Salɛm: Diola kobio Yerusalɛm la co vɛlɛ lan ni. Tofa vɔ O Kandɔɔ 14.18, Condii Lisai 76.3. ni, vana-solia-lasálà Hala-Hiow-Ɲɔɔn-Kpow-vo. Abraham va fulaa o cɔw o kɔ nɔla masaa-o, mí Mɛlkisedɛk kɔa ndu bɔŋa, mó dɔaw ndu duaa. 2Mí Abraham ke ndu o-tɔ́ndɔɔ o ɲɛm o hɛlu-on nin kpow. Diola lan aa: «Mɛlkisedɛk», kɔlɔ ndɔɔ co ni aa: «Masa dɛnɛ sandaa». Handɔɔ o kon coo, Mɛlkisedɛk kon va vɛlɛ masaa Salɛm ni, kon co dimio ni aa: «Masa kɔlɲuloo». 3O nɔ fuɲa le, o nɔ kala le, o nɔ yungu le, o nɔ fuɲa mama le. Vana sínà telen o velun te, vana sínà a piɔ́m ndɔɔ o kɔɔ le. Maa po Hala-o o co ni, vana-solia-lasálàá fɛɛn fɛɛn-ndo o co ni.

4Vana bɛndu-bɛndoo pila Mɛlkisedɛk va ni. Hali Abraham fuɲa naa mamaa, mó solul ndu o-tɔ́ndɔɔ o ɲɛm o hɛlu o cɔwvo-on. 5Ɲɛ tɔŋ Moise-o dimi le vanaa-solia-lasálàá, yungu Levii-o-o co hoo ni maa a bɛnda mà ɲuna cuavaa Israɛlla o-tɔ́ndɔɔ o ɲɛm ndan kpow nin. Vannda bɛnda mà yɔngu nda kon ni, puapilɛa ndaa pɛɛn, nduyɛ nda bɛɛ yungu Abraham-ndo nda co ni. 6Mɛlkisedɛk kon yɛ, o fula o polale Levii len nin te, kɛ mó bii Abraham o-tɔ́ndɔɔ o ba o ɲɛm ndóò nɔ-on nin kpow. O kon mí ndu Mɛlkisedɛk dɔaw vana Hala ndóò yiilu kpemaa-o duaa. 7Nduyɛ, vana-vana sina maa vana dɔaw vanndo duaa-o, ndu hiow a vana o dɔw kon duaa-o. 8Vanaa-solia-lasálàá vannda ke kan o-tɔ́ndɔɔ-a, vanndacieea daama nda co ni, paale vanin mà vi. Mɛlkisedɛk bɛɛ sɔla o-tɔ́ndɔɔ o ɲɛm kɛndɔn nin, kɛ ndu, o co yoomu le fɛɛn a fɛɛn, maa mɛɛ o co o sɛvaa yɛ. 9O kon, n nɔla mì n dimi maa telen Abraham yɔngu o-tɔ́ndɔɔ o ɲɛm ndɔn nin-ndo, Levii yɔngu o-tɔ́ndɔɔ lende ni, ndu polale ndɔlen le sɔla o-tɔ́ndɔɔ vannda o ba-o pɛɛn. 10Kani, lɔ́ɔ́ Abraham fuɲa naa mamaa kɔɛ Mɛlkisedɛk bɔŋa-o, Levii ndóò vilun ndɔ le, n nɔla mì n dimi maa o va nin ndu Abraham o n'dial.

11O tɔŋ Israɛlla nin, o cuavaa-imamaa Levii-a tɛɛn nda bɛnda le vanaa-solia-lasálàá hɛlio ni. Nduyɛ, te vanaa-solia-lasálàá fula o polale Levii len nin-nda ndáà nɔ isɔw o vali kon tosaa le, vanaa nɔ lɛnin mako a vana-solia-lasálà celen teengen maa Mɛlkisedɛk le. 12Nduyɛ, te sɔɔn solia lasálàn yɛlɛman pɛ, mɛɛ tɔŋndo bɛɛ bɛnda mò yɛlɛman. 13Kani le vana sɔɔn mun dimin-ndo, o polale celen nin o fula ni, vana-vana ve baala solia lasálà tosa o polale len nin te. 14Vana-vana sínà maa o polale Yuda len nin Maalii naa fula ni. Nduyɛ telen Moise va sɔɛi vanaa-solia-lasálàá dimio-o, o dimi ɲɛ-ɲɛ a polale len o kɔɔ le.

Yeesu, vana-solia-lasálàá maa Mɛlkisedɛk

15Ɲɛ cɔm sɔɛi kalɛi válán-ndo co hoo ni maa vana-solia-lasálà celen cɛn maa Mɛlkisedɛk. 16O siŋnun vana-solia-lasálà a yiyan ivanacieeya le, kɛ a kpaaya yoomu nɔ lamɛɛlu loo. 17Kani ɲɛ co o sɛvaa a ndu o kɔɔ-o co hoo ni aa:

«A co va vana-solia-lasálàá le fɛɛn a fɛɛn

maa Mɛlkisedɛk.»

18O kon, mí tɔŋ paandoo faŋan, kani ndóò nɔ kpaaya le, o ve vɛlɛ mako nɛŋi le. 19Kani tɔŋ Moise-o tosa dɛnɛ peelan kɛ́-kɛ̀ le. Kɛ mí tiindan hiow naŋɔɔ-o kennun naa, ndu tosá ni mí n sɔɔnguu Hala ikɛi.

20Ken tosàn mɛnanndo kɔɔli le. Kɛ o mɛnan le vanaa-solia-lasálàà tɔ̀a le. 21Kɛ le Yeesu, mí Hala mɛnan, mó dimul ndu aa:

«Mɛlɛka cii mɛnan,

nduyɛ, o yɛlɛmanin diom ndɔɔ le aa:

‹A co va vana-solia-lasálàá le fɛɛn a fɛɛn.›»

22Lelan, kpema yiilun naa o Yeesu nin-ndo hiow naŋɔɔ.

23Hiyan celen co vɛlɛ: vanaa-solia-lasálàà tɔ̀a va sɛ́lɛ́ taw, kani piɔ́mndo ve nda cɛlɔɔ le vaa lɔ́ɔ́-lɔ́ɔ̀ o fonda kon te. 24Kɛ Yeesu ndu, o co yoomu le fɛɛn a fɛɛn. Nduyɛ, lɔ́ɔ́-lɔ́ɔ̀ bɛɛ vana celen muungunin o fonda ndɔɔ le vali solia lasálàá tosaa le. 25Lelan, Yeesu nɔ kpaayaa le vanaa tiindan ndu le sɔɔnguuo Hala ikɛi-ya ciindiaa le fɛɛn a fɛɛn. Kani o co yoomu le lɔ́ɔ́-lɔ́ɔ̀, o tiwba mo va lɔ́ɔ́-lɔ́ɔ̀ Hala ɲɔɔloo le nda.

26Yeesu co bolle vanaa-solia-lasálàà naa n nɔ makoo kpeekpei-yo ni. O co o diandaa, o nɔ isɔw le, o nɔ haki le, sɛyanndo co ndu tɛɛn nda vanaa lahakia, mí Hala heelu ndu o halataala di. 27Yeesu ndu co maa vanaa tɔ̀a co bolle vanaa-solia-lasálàá-a le. O hewba le sálàlalan solio lɔ́ɔ́-lɔ́ɔ̀ le hakila ndala nda pila lan a le hakila vanaa celen. Lepilɛ kpé o tosa ken ni, lɔ́ɔ́ ndu pila yɔngun-ndo. 28Tɔŋ Moise-o ndu handun le vanndacieea tiun te-a. Kɛ mí sɔɛi Hala mɛnan-nde, i hin o tɔŋndo kɔɔli-e i siinguu Poo bolle vanaa-solia-lasálàá, o sɔla tiuvɔnndo le fɛɛn a fɛɛn-ndo.

Currently Selected:

Hebreea 7: BKG

Highlight

Copy

Compare