Kalatea 6
6
La maalian vellaa-velle
1Puapilɛa nia, te la saalun pɛ vanndo pum dɛnɛ vɔɔndo tosaa, o bɛnda mì niaa co vanaa kɔlla-a mingi ndu o nɛi o fɛ́ɛ́-fɛ́ɛ́o nin. Kɛ niaa pila mandan dɛ, yɔŋii niaa bɛɛ sɔla tɔɔndanndo. 2La maalian o sangalan nin vellaa-velle, tɔŋ Krista-o peeloo co kon ni. 3Te vanndo cennun pɛ ɲɛ, mò ve yɛ niko ɲɛ-ɲɛ le, mɛɛ ndu pila co palanndo ni. 4Kɛ vana-vana mɛɛndian kela ndɔɔ ɲɛkɛndɛi. Te ndu pila ce yɛ pɛ maa o nɔ dí mò sangalan, mɛɛ ndu pila sangalan, kɛ o va le tuvanndo a caanda le. 5Kani vana-vana cuanin volɔɔ ndɔ.
6Vana nda co Sɔɛi Hala-e pɛɛkoo-o bɛnda mò piɔw ɲɛm ndɔn nda vana co ndu pɛɛkoo-o.
7La lúɛì o lapɔw nin te: vana mem Hala le. Ɲɛ vanacieo saŋ-ndo, ndu koni o koaw vɛlɛ ni. 8Vana saŋ pɛ le yeemɛi ndɔɛi ndu pila-e, ɲɛ yeemɛi ndɔɛi koam-ndo o koaw ni, piɔ́mndo pɛɛn. Kɛ vana saŋ pɛ le Kɔl-Diandaa, ndu kow o fula o Kɔl-Diandaa nin-ndo, yoomu fɛɛn-fɛɛndo pɛɛn. 9N sangan le dɛnɛ kɛndɔɔ tosaa le, kani n koawnin a telen bɛnda-o, te n mel te. 10Lelan, telen naa n nɔ vɔ fondaa-o, n tosalan vannda kpow dɛnɛ kɛndɔɔ, kɛ taama-taama puapilɛa naa vanaa laalannda.
Silala mɛɛlaalan a yilɔɔlan
11Sɛvaa ho co fondo kpodo-kpodo mɛɛ niaa co ndu cɔw nuaa yɛ le, a ba ya sɛval niaa ni. 12Vanaa kɛ́-kɛ̀ co niaa kɔɔli le toomaa diyɔɔ kangalan, haliko mi vannda ce nda vanaa kɛndɛ sii nda co kon yeema ni. A yeema ma tol nda leyɛ le yɔm singafilaa Krista-o le, ken kínɛí nda co nuwviaa ni. 13Kani nda pila dii tooma kon-nda, a co kela o tɔŋndan coo le. Kɛ yeemɛi ndɛi sii co ni, mì la cɛl le toomaa diyɔɔ, haliko ma va sangalanndo maa nda tosa ni mi la dii toomaa. 14Ya le ya, i sangalannin le ɲɛ-ɲɛ celen te, te o co le yɔm singafilaa Maalii Yeesu Krista-o le, o yɔm kon coo ceendo baŋnun le ya ni, mi ya i baŋnun ndon le ceendo. 15Kani ɲɛ co sɔɛi-yo, o co falenyɛi, te kon te kɔ̀ndélen te, kɛ ndu co vaa vanaciee cɔavaa sɛnɛi-yo ni. 16Vanaa kɛ́-kɛ̀ co kelaa o nɛi kon coo, maa kɔlɲuloo a dɛnɛ kɛndɛ Hala-o va nda coo a o yungu Hala-o kpow coo!
17I ya co niaa mɛɛlu dimul-le co hee ni, vana saangiaa lɛ ya le, kani i nɔ nin tindila ya sanga le Yeesu lan o n'dial.
18Puapilɛa nia, màá kɛndɛi Maalii Yeesu Krista-e i va niaa lakɔl! Amiina!
Currently Selected:
Kalatea 6: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
