Efɛsea 1

Yilɔɔlan

1Ya Pol, ya co kiilanɔ Yeesu Krista-o o hɛnan Hala-o nin-ndo.

I co sɛbɔɔ ho sɛva le niaa vanaa diandaa a niaa vanaa laalan Yeesu Krista mì la va Efɛs ciee-a. 2Màá Hala Fuɲa naa nda Maalii Yeesu Krista a tosal niaa dɛnɛ kɛndɔɔ mà ke niaa kɔlɲuloo!

Ɲɛm kɛndɛn Mɛlɛka ke naa o Krista nin-ndon

3N melnun Hala balika, o co Fuɲaa Maalii naa Yeesu Krista-o. O dɔw naa duaa le co naa n co a yiinannda o Krista nin-ndo, o ke naa ɲɛm kɛndɛn co o halataala-on kpow-vo. 4Lɔ́ɔ́ pá mí ceendo cɔawnun, ndóò cii nin naa hɛli, haliko mi n va vanaa diandaa a vanaa yaalan te-a ndu o hɔl. Nduyɛ, o kaola ndɔɔ nin, 5ndóò cii nin cɛlɔɔ mi ndóò siinguu naa cuavaa ndɔa o Yeesu Krista nin. Mɛɛ hɛnan ndɔɔ co yɛ o tosa kon ni. 6Lelan, n melnun Hala balika le kɛndɛi ndɔɛi bɛnduei, i o tosal naa a Po ndɔ o kaola taw-vo o kɔɔ-e.

7Nduyɛ, o Krista nin, o kooma ndɔan nin naa n sɔla baŋaa ni, mí n sɔla hakio malɔɔ le tɛɛmbuula naalan. Kɛndɛi Hala tosal naa-e co i bɔɔ, 8kɛndɛi bɛndui o tosal naa taw, mó sɛŋi naa kɔlkalu ndɔɔ a dɛnɛ sinaa ndɔɔ coo-e pɛɛn. 9O cɔm naa sɔɛi vianaŋii ndóò yeema le tosaa-e, sɔɛi vianaŋii kɛndɛ-kɛndɛ ndóò tuu le tosaa o Krista nin-nde. 10Tuu kon yɛ, o Hala siownin kon peelu o telenndan mɛɛlulan-ndo, ndu co le ɲɛm co o halataala-on a mun o lɛŋnden coo mɔɔsiaa masaa ndu pilɛ kpé o labɛngunin ni, Krista pɛɛn.

11O yiinan naa n yiinan a Krista-o, mí naa bɛɛ n sɔla hɛlio. Mɛlɛka ndóò cii nin dɛnɛ kon tosa le naa mɛɛ o tuu yɛ. Mɛlɛka kon pɛɛn, ó tosa dɛnndan kpow mɛɛ hɛnan ndɔɔ co yɛ-o. 12Lelan, naa vanaa tasea tiindan Krista-a, n biilun bɔɔbɔɔyɛi Hala-e.

13Telen niaa bɛɛ tuei sɔɛi toɲɛi-yo, Yoongu kɛndɛ yɔngu niaa cindaa-o, mí la laalan Krista. O kon mí Hala hol niaa pondalen lɔ́ɔ́ o yɔngu niaa Kɔl-Diandaa o yiilu niaa kpemaa-o. 14Kɔl-Diandaa kon co tɔɔmasele ɲɛm kɛndɛn o kɛsul naa-on ni, háá mi vanaa Hala-a a sɔla baŋaa. N sɔlanin mun kɛ́ɔ tuma naa n sɔlanin baŋanndo kpede le hakio-o. Lelan, n lisan bɔɔbɔɔyɛi Hala-e.

Pol piɛi Mɛlɛka le vannda Efɛs

15Lelan, kabi ya tuei laalan niaa laalan Maalii Yeesu-o a kaola niaa kaola vanaa diandaa kpow-vo tɔ́ɔ́, 16i co pɛngi Mɛlɛka balikaa mello le niaa le, i co niaa yiyanndo coo o piɛilen nin. 17I co Hala, o co Maalii naa Yeesu Krista-o, Fuɲa nɔ biiloo-o ɲuna, mò yɔngu niaa kɔlkaloo. O kon la sinanin Hala, nduyɛ, la sinanin ndu lekɛ́ndɛi. 18I co vɛlɛ ndu piɛi mò luei niaa ɲɛ-tengaa o lakɔl, haliko mi la síná tiindan vana sɔla le veelu o veelu niaa-o a bɔɔbɔɔyɛi ɲɛm kɛndɛn co kɛ́ɔ le vanaa co le ndu-a on, 19mì la sínà vɛlɛ mɛɛ kpaaya bɛndu o nɔ le naa-o co yɛ. Kpaaya kon yɛ, ndu kpeekpei Hala cɔm a yoomuma bɛnduan ni. 20O Krista nin o cɔm kpaaya kon ni, Krista o tindi fulaa vanvílɛ́iya tɛɛn, mó kɛsin ndu o ba kɛndɔɔ coo o halataala-o. 21Mó kɛsi ndu bollen masɛi kpow coo, kpaayalan kpow, vanaa mayoomua kpow a simlacia kpow coo, a le diola kɛ́-kɛ̀ co piɔlnɔnndo, o co ko le telenndo ho daama le, kɛ le telen co hunɔɔ-o bɛɛ. 22Mó kɛsi ɲɔɔn kpow ndu o labɛngunin, mó siinguu ndu vana lebollo le vanaa laalannda, 23a co dialun ndɔn-nda. O vanaa laalaŋaa kan nin Krista co ni, o co kon dɛnndan kpow peeloo nɛɛ-nɛɛ ka o ceendo coo-o.

Currently Selected:

Efɛsea 1: BKG

Highlight

Copy

Compare