Efɛsea 5

Le kelaa o ɲɛ-tengaa nin

1Le tùú niaa co cuavaa Hala kaola-a-o, la kindin mì la tuula ndu o niinu niaa nin. 2Mì la va kelaa o kaolaa nin maa mɛɛ Krista kaola naa, mí ndu pila yɔngu yoomu ndɔɔ le naa, mó siŋnun sálà cun kɛndɔɔ a sálà hɛnan Hala-o yɛ.

3Yungu co le Hala-o niaa co ni, lelan o bɛnda mì vana saalun bɛɛ dɛnɛ nɔɔlɛi súú oo súù a dɛnɛ laasiɛi kɛ́-kɛ̀, te kon te yeemɛi vɔɔnde niaa tɛɛn te. 4O bɛnda vɛlɛ mi sɔɔn vɔɔnndon, sɔɔn diɔmndon, te kon te sɔɔn nɔɔlɛiyon n fula niaa o lasondo le. Kɛ la sínà kɛndɛi Hala-e mì la va ndu balikaa mello. 5Kani mɛɛ mì la sínà hee ɲɛkɛndɛi: vana-vana co vana suundaa, vana nɔɔla Mɛlɛka o hɔl-lo, te kon te vana nɔ yeemɛi vɔɔnde-o (kani yeemɛi vɔɔnde nɔu, piɔmnda sooloo co kon ni), nda sɔlanin Masale Krista len a Masale Hala len maa kɛ́ le.

6La cɛl mì vana-vana hui niaa a sɔɔn fondon te, kani le tɛɛmbuula vaa lende kɔltuw Hala-o toalnin vanaa co ndu simullo-a coo ni. 7Lelan, la mɔɔsiaa ɲɛ-ɲɛ niaa ndaa le. 8Ɲumndan niaa va paandu ni, kɛ sunsun, ɲɛ-tengaa niaa co o Maalii nin ni. La va niinoo maa vanaa co o ɲɛ-tengaa nin-nda, 9kani tɔnɔ ɲɛ-tengaa co dɛnɛ kɛndɛ súú-súù ka ni, dɛnɛ sandaa a toɲaa. 10La kindin mì la sínà dɛnɛ hɛnan Maalii-o. 11La vow balan o dɛnnda fondola vannda co tosaa o ɲumndan nin-ndan nin te, la cɔɔmuu lan ceen kpendekele. 12Kani dɛnnda vanaa kan co tosaa o vionnɔnndo nin-ndan, siɛmbulan la bii vana le lan dimio ni. 13Kɛ dɛnnda lan kpow la fula pɛ ceen kpendekele, ndu siŋnun ɲɛ-tengaa. 14Hiovɔɔ o kon coo, ɲɛ-ɲɛ fula pɛ ceen kpendekele, ndu siŋnun ɲɛ-tengaa. Lelan o co o sɛvaa ni aa:

«Tiondu, nɔm vana co hoo o lɔan-ndo,

cɔn mà fula vanvílɛ́iya tɛɛn,

mì Krista tosa, mì ɲɛ-tengaa va niaa diondɔɔ coo.»

15Lelan, la caa taw a niinu niaa. La va lɛ maa n'diɔm te, kɛ la va vanaa kɔlkalua. 16Telen oo telen niaa sɔla pɛ dɛnɛ pum le tosaa, la tosà, kani palɛi naa n co hee nin-nde i niŋ te. 17Lelan, la va n'diɔm te, la sínà ɲɛ co hɛnan Mɛlɛka-o o.

18La hiaw ba a mɔiyan kolɔɔ le, kani o laasianndo nin kon luei vana ni, kɛ la va a piaa a Hala Kɔl-Diandaa. 19La lueinan yoomuan vellaa-velle a condun lisan, condun kɔllon a á condun vana sangala Mɛlɛka-on, n co fulaa Kɔl-Diandaa o ba-on. La solùl Mɛlɛka condun kɔllon, mì la sangala ndu a kɔlta niaalan kpow. 20La va Hala Fuɲaa balikaa mello lɔ́ɔ́-lɔ́ɔ̀ o dɛnndan kpow nin o diola Maalii naa Yeesu Krista lan.

Le calii pɔnɔɔ a lanɔɔ

21La biinan diomndan vellaa-velle le bɛɛle niaa co Krista keo len.

22Niaa vanlaandua, la tuisin a piaandaa niaa maa mɛɛ niaa tuisin a Maalii yɛ. 23Kani vanapɔnɔɔ co simlacinɔɔ le vanalanɔɔ ni, maa mɛɛ Krista co simlacinɔɔ le kunda vanaa laalannda yɛ, o co dialun ndɔn mo va vɛlɛ vana ciindiaa ndaa-o. 24Vanlaandua bɛnda mà tuisin a piaandaa ndaa o dɛnndan kpow nin maa mɛɛ kunda vanaa laalannda tuisin a Krista yɛ.

25Niaa vanpiaandua, la kaola laandaa niaa mɛɛ Krista kaola kunda vanaa laalannda háá mì ndu pila yɔngu yoomu ndɔɔ le ndu yɛ. 26Le kunda vanaa laalannda bɛndaa Hala o hɔl, mó dindi ndu a mɛnndan a á sɔɛi. 27Kani ndu pila ndóò yeema mì ndóò ce kunda vanaa laalannda o diandaa, o biilu ndɔ bɛndoo nin, o ve a isɔw le, o ve a sɔŋ te, o ve o ɲɔfɔliaa le, te kon te tambii súú oo súù. 28Lende koni, vanpiaandua bɛnda mà kaola laandaa ndaa mɛɛ nda kaola dialun ndan yɛ. Vana-vana kaola pɛ laa ndɔ, mɛɛ ndu pila kaolan lende ni. 29Kani vana-vana mel dialun ndɔn ndu pila-on te, kɛ dɔvɔɔ o dɔaw mun balo ni, mò manda mun, maa mɛɛ Krista co tosaa a kunda vanaa laalannda yɛ, 30kani dialle ndii pilɛ naa n co o kɔɔle ndɔlen nin ni. 31Maa mɛɛ o co o sɛvaa yɛ aa:

«Lelan, vanapɔnɔɔ faŋannin fuɲa ndɔ nda kala ndɔ,

mò yiinun nda laa ndɔ,

mà siŋnun falei ndii pilɛ kpé.»

32Toɲa bɛndoo co o vianaa o sɔɛi he nin. Le Krista a le kunda vanaa laalannda ya co ndu dimio ni. 33Kɛ le niaa sɔɛi he i co vɛlɛ ni. Mɛɛ mì vana-vana kaola laa ndɔ maa ndu pila, mì vana-vana ke pɔnɔ ndɔ bɛɛlen.

Currently Selected:

Efɛsea 5: BKG

Highlight

Copy

Compare