2Piɛr 1
1
Yilɔɔlan
1Ya Simɔn Piɛr, vana baalaa a kiila Yeesu Krista-o ni.
Ya co vanaa sɔla laalan sɔvɛɔ maa naa o dɛnɛ cindaa Hala naa nda Vana naa ciindiaa Yeesu Krista nin-ndo-a sɛvallo ni. 2Màá kɛndɛi a kɔlɲuloo kui niaa o lakɔl le sínà niaa síná Hala a Maalii naa Yeesu-o!
Veeloo a hɛli Hala-o
3Kpaaya ndɔ ihalayaa yɔngu naa ɲɛ-ɲɛ naa n nɔ makoo le vaa a sandaa, mó cɔm naa vana veelu naa o biilu ndɔɔ a o dɛnnda ndɔla kaamaala o tosa lan nin-ndo. 4O ndu nin o dimi le naa dɛnnda bɛndula sɔvɛlan tosallo ni, haliko mi la va o halayɛi ndɔɛi nin, mì la ɲaanun yeemɛi vɔɔŋii co o ceendo coo-e. 5Le kon yɛ, la kindikindin mì la handu kela kɛndɔɔ o laalan niaa coo, mì la handu dɛnɛ sinaa o kela niaa kɛndɔɔ coo, 6mì la tiw niaa pila ba handɔɔ o dɛnɛ niaa sina-o coo, mì la va vanaa biwnannda handɔɔ o tiw niaa tiw niaa pila ba-o coo, mì la handu ɲííye o biuvɔn niaa coo, 7mì la handu hɛɛnianndo o ipuapilɛyɛi nin o ɲííye coo, mì la handu kaolaa o hɛɛnianndo o ipuapilɛyɛi nin coo. 8Kani te la nɔ pɛ káàlan ndan, mì la kui niaa niŋ, la melnin niaa mì la kɛɛ ɲɛ tosa, te kon te mì la kɛɛ komɔɔ le Maalii naa Yeesu Krista sinaa le. 9Kɛ te vanndo nɔ kaalan ndan te, mɛɛ vana sumɛi co kɔlan yingo-yingo-o o co ni: o pɔɛɛnun maa o sɔla dindio le hakila ndɔla paandulan-ndo.
10Lelan puapilɛa nia, la cɔɔlu yoomuan luei o veelu Hala veelu niaa-o a o hɛli o hɛli niaa-o nin, la va pɛ tosaa lende, la delnin lɔ́ɔ́-lɔ́ɔ̀ le. 11O kon la sɔlanin dio le luɛyɔɔ o masale fɛɛn-fɛɛnnde Maalii naa a vana naa ciindiaa Yeesu Krista len nin.
12Lelan i vanin niaa sɔɔn mun yiyilanndo lɔ́ɔ́-lɔ́ɔ̀, o va bɛɛ maa la sina nin mun, mì la va isisi yili o toɲaa nin hau. 13Te i co vɔ pɛ o ceendo ho coo, i ce ken dɛnɛ sandaa, mì va niaa yiyilanndo le mɛɛ niaa va o lapɔɛɛn nin te yɛ, 14kani i sínà, maa mɛɛ Maalii naa Yeesu Krista cɔm ya ndi yɛ, o lo lɛ levil te mì faŋan o ceendo ho coo. 15Kɛ i keinin o nɛi oo nɛi coo, haliko i kɔnnun nin bɛɛ, mì la koma loonun a dɛnndan ndan o kɔɔ.
Vanaa ce biilu Krista-o-a
16Nduyɛ, o co bundɔn nda caa toosiaa-on te naa n co niaa dimul a hunɔɔ kpaaya Maalii Yeesu Krista-o o kɔɔ le, kɛ naa pila n ce biilu ndɔɔ a lehɔl ciŋ. 17Kani o sɔla bɛɛlen a biiloo Hala Fuɲaa o ba, telen o tuei diomndo fulaa o biilu bɛndu Hala-o nin, mó dimul ndu-o aa: «Po ni ya kaola taw-vo co hoo ni, o ya hɛli a kɔl nuu kpow-vo!» 18Mí naa pila n tuɛi diom fula kon o halataala telen naa n va naa ndaa o pembii diandɛi coo-o.
19Hiovɔɔ o kon coo, sɔɔn vanaa-tɛɛngaa-diom Hala-a n co naa o ba, n niaa nɔ dí le hɔlten handɔɔ coo mɛɛ vana handu fitina co biyɔɔ o ɲumndan nin-ndo hɔlten coo háá mi ɲɛ-tengaa paale siaa tenga, mì loei idii-e tenga o kɔlta niaalan nin yɛ. 20O tase ya co niaa dimul-lo co hoo ni, la sínà maa vana-vana bɛnda mò tɛɛsiaa diom kɛ́-kɛ̀ o sɔɔn vanaa-tɛɛngaa-diom Hala-a dimi mì n va n sɛvaa o Sɛbɛ Hala-o nin-ndon a yiyan ndɔ ndu pila le, 21kani o co a yiyan ivanacieeya le vanaa-tɛɛngaa-diom Hala-a dimi sɔɔn nda dimi-on te, kɛ o kpaaya Kɔl-Diandaa bɛngu vanndacieea tɛɛnguu diomnda Hala lan ni.
Currently Selected:
2Piɛr 1: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
