1Piɛr 5
5
Le kunda Hala-o mandaa
1I co kaasoŋaa co niaa tɛɛn-nda sila. Ya co kaasonɔɔ maa nda-o, ya co sei sangala Krista lan a vana vanin o biilu hun fulanin ceen-ndo nin-ndo-o: 2la manda kunda saa Hala-a, a co niaa o ba bɛngu-a, ò va maa baŋɔɔ le nda baŋ niaa le, kɛ o va a yeemɛi niɛi mɛɛ Hala yeema yɛ. Ò va vɛlɛ a hɔlte ɲɛ-sɔlaa le, kɛ a kɔlkɛndɔɔ. 3Ò va le kunda nda sɔɔ niaa o ba-o masalen tosaa coo a paa-kala le, kɛ le vaa tɔɔmasele kɛndɔɔ le nda. 4O kon tuma bolle vanaa mandaa n'saa fulanin ceen-ndo, la sɔla mɔsil lemasa biilaa, ó tembu loo.
5Lende koni i co le niaa cuaa felengia ni, la tuisin kaasonnda o labɛngunin. O naaŋan niaa vellaa-velle nin, la nɔ kɔl tuisianndo, kani Sɛbɛ Hala-o dimi aa: «Simullo Hala simul vanaa yongaa ni, kɛ mo tosal vanaa tuisiannda kɛndɛi.» 6Lelan, la tuisin o ba kpaaya Hala-o bɛngu, haliko mo heelu niaa o telen bɛnda-o. 7La tuisi buulannda niaalan kpow ndu coo, kani o nɔ niaa hɔlten coo.
8La pɔɛɛnun te, la va lahɔl, kani yaamɔɔ niaa, masa ɲinaa vɔɔnda co balɔɔ a kuuliaa maa yàlà, le vana o sɔlanin mo de ndu-o. 9La simul ndu ɲɛkɛndɛi a laalanndo, la sínà maa sangala pilɛla lan la co puapilɛa niaa coo o ceendo coo. 10La sanga vɔnin le telen bingi. Kɛ Hala nɔ kɛndɛi kpow o ba-o, o veelu niaa o Krista nin le biilu fɛɛn-fɛɛndo-o pila pɛɛkunin niaa, mò kindi niaa, mò luei niaa yoomuan, mò tosa la hiilun te. 11Ndu kpaayaa co o ba le fɛɛn a fɛɛn ni. Amiina.
Yilɔɔla mɛɛlaalan
12Kɛɛmasɔla Silvɛn te, o ya ce maa puapilɛ ni kɛndɛ-kɛndɛ-o, ndu mala ya le niaa sɛbɔɔ ho sɛvallo ni. I sɛval niaa ndu le niaa silaa maa o kɛndɛi Hala-e kpeekpei niaa yiinun nuaa ni.
13Vanaa sɔla hɛlio Babilɔn maa niaa-a yil niaa, Marke po ni bɛɛ yil niaa. 14La yilan vellaa-velle, mì la kɔɔmian o puapilɛyɛi nin.
Màá kɔlɲuloo va le niaa co le Krista-a kpow!
Currently Selected:
1Piɛr 5: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
