1Tesalonikea 4
4
Silalan le kelaa o nɛila hɛnan Hala lan coo
1Le sɔɛi ciiyo puapilɛa nia, n cɔm niaa mɛɛ vana kela mà hɛnan Hala yɛ. Nduyɛ la co nin kelaa o nɛila lan coo. Kɛ sunsun, n co niaa ɲuna mì n tɛɛlun niaa o diola Maalii Yeesu lan, la cɔɔlu nɛila lan biyɔɔ. 2Kani la sínà pɛɛkula naa n yɔngu niaa fulaa Maalii Yeesu o ba lan. 3Ɲɛ Hala yeema-o co ni mì la va vanaa diandaa, mì la mal dɛnnda suundɛilan, 4mì vana-vana o niaa tɛɛn bii dialun ndɔn, mò kennun bɛɛlen. 5La malnun yeemɛi vɔɔnde o ba maa vanaa sìna Hala le-a le. 6Vana-vana pílàn puapilɛ ndɔɔ tana le, vana-vana tɛɛmbuu puapilɛ ndɔɔ labɛɛ o sɔɛi he nin te. Maa mɛɛ naa n dimul niaa sɔɛi ken kpéŋ-kpéŋ yɛ, Mɛlɛka tuisinin vannda sangaa coo le hakila vaa lende. 7Kani Hala veelu naa le kela o dɛnɛ nɔɔlɛi nin te, kɛ le kelaa o dindinndo nin. 8Lelan, vana-vana kɛɛ pɛ pɛɛkoo ho, o co vanaciee le o kɛɛ le, kɛ Hala, o co niaa Kɔl-Diandaa ndɔɔ keo-vo o kɛɛ lende ni.
9Hali mì n sɛval bɛɛ niaa a kaola bɛnda mò va vanaa laalannda tɛɛn-ndo o kɔɔ le, kani niaa pila sɔla pɛɛkoo Hala o ba maa la kaolian vellaa-velle. 10Ɛ̀ɛ̀ nduyɛ, lende niaa co kelaa a puapilɛa nia Maseduan kpow ni. Nduyɛ puapilɛa naa, n co niaa vɛlɛ sila, la hiow bɛɛ o kon coo. 11La kindin mì la nɔ kɔlɲuloo, mì la muli hɔlla o makola niaalan, mì niaa pila kelu lalle o baala niaa nin mɛɛ naa n dimul niaa yɛ. 12O kon, vanaa co vanaa laalan te-a kenin niaa bɛɛlen, la venin o ba vana bɛngu le.
Le hunɔɔ Maalii-o
13Puapilɛa naa, n yeema mì la sínà toɲaa le vanaa vi-a, yɔŋii mɔnɛi bii niaa maa vanaa celen, a nɔ tiindan te-a. 14N laalan maa Yeesu vi mó tendul. Lende koni, n laalan vɛlɛ maa Hala minginin vanaa laalan má vu-a yoomu nda Yeesu-a latulu.
15Nduyɛ, ɲɛ naa n co niaa dimul fulaa o sɔɛi Maalii-e nin-ndo co hoo ni. Naa vanaa vanin yoomu lɔ́ɔ́ Maalii hunin-ndo-a, n hiwnin vanaa vi-a laci le. 16Kani telenndo tiiya pɛ, n tuɛinin diomndo fulaa o halataala, mì n tuei bulu Hala-o diom, o kon mì Maalii pila tol. Vanaa vi o diola Yeesu lan-nda fɔlɔn a tendulnin ni. 17O kon kɔɔli, naa vanaa va vɔnin yoomu-a n kɔanin naa ndaa latulu o yumbuyumboo nin, mì n kɔ bɔŋa Maalii o hoeiye nin. O kon n vanin naa Maalii-aa lɔ́ɔ́-lɔ́ɔ̀. 18Lelan, la vá yoomuan lueinanndo vellaa-velle a diomndan ndan.
Currently Selected:
1Tesalonikea 4: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
