1Tesalonikea 3
3
1O mɛɛlulan, n tiw lɛ ba cum kon yulɔɔ le. O kon mí n yiyan maa ndóò va fisa mì naa daama náà n lo Atɛn. 2O kon mí n vim niaa Timote puapilɛ naa, o co baala Hala-o tosaa naa ndaa le vannda Yoongu kɛndɛ Krista-o tiiyallo-o. Mó cɔɔlu niaa kpaayaa luei, mó luei vɛlɛ niaa yoomuan o laalan niaa nin, 3haliko vana-vana o niaa tɛɛn vu n'dial a dɛnnda palaala vannda co naa hau tuisio coo lan te. Niaa pila sínà maa dɛnnda lan Hala kelu le naa ni. 4Nduyɛ, la sínà maa lɔ́ɔ́ naa n va naa niaa-o, n va niaa dimullo maa mɛɛ mì vannda ndáà tol naa yɛlen. Nduyɛ sɔɛi ken tiiya nuaa ni, mɛɛ niaa pila sínà ndi ɲɛkɛndɛi yɛ. 5Lelan, le mɛɛ yáà tiw lɛ ba cum kon yulɔɔ le yɛ, mí viam Timote le kɔlan sɔɔn ɲuuniaa a laalan niaa o kɔɔ. I va buulanndo yɔŋii ɲina vɔɔndo ndóò tɔɔndan niaa, mì vali naa ndóò siŋnun fúú.
6Kɛ Timote langa komal naa fulaa o niaa lo, mó downun naa kona kɛndɔɔ a laalan niaa a á kaola niaa nɔ-o o kɔɔ, mó cɔm naa yiyan kɛndɛ niaa nɔ a naa-o a yeemɛi niaa nɔ le naa cɔu vɛlɛ-e. Naab bɛɛ yeemɛi ken co naa taw. 7Lelan puapilɛa naa, o sangala naalan nin a o yɛle tolaale len nin kpow, n naŋ kɔl le laalan niaa. 8Sunsun, n sɔla vɛlɛ yoomuma sɛnɛi, kani la co a yiinan sakpo o Maalii nin. 9N sínà bɛɛ mɛɛ naa n mel Hala balika le niaa le, kani la yɔngu naa ɲaaloo o lakɔl ndu o hɔl. 10Niinoo a lɔan, n co ndu ɲunaa o piɛilen nin kpeekpei le mɛɛ o cɛl naa mì n ce vɛlɛ niaa hɔlla a hɔlla, mì n siow ɲɛ lo o laalan niaa nin-ndo peelu yɛ.
11Màá Hala pila, o co Fuɲa naa-o nda Maalii naa Yeesu toosial naa nɛiyo haliko mi n kɔ komal niaa! 12Màá Mɛlɛka cɔɔlu niaa kaolaa tɛɛn vellaa-velle, mò cɔɔlu vɛlɛ ndu niaa a vanaa celen tɛɛn, mò va maa o naa n nɔ le niaa-o! 13Màá o luei kɔlta niaalan yoomuan mì la siŋnun vanaa diandaa a vanaa nɔ isɔw le-a Hala fuɲaa o hɔl telen Maalii Yeesu hunnin a vanaa ndɔa diandaa kpow-vo!
Currently Selected:
1Tesalonikea 3: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
