1Piɛr 2
2
Yeesu a vanaa diandaa
1Lelan, la kɛɛ dɛnɛ-dɛnɛ co kɔlvesɛiyo a o kɛ́-kɛ̀ co kafalan, muulɔnndo, yeemɛi bɛnduei a caanda diolan tɛɛmbuuo. 2Maa mɛɛ cɛlɛkpɛa yeema mɛɛyan yɛ, la kaola mɛɛma sɔɛi Hala-an lende, haliko mi la hindu, mi la sɔla cindaa, 3kani la dombi mí la ca maa Maalii naŋ.
4La sɔɔnguu ndu o ibuŋ, ndu pow kiyɛiyo, o vanndacieea viow-vo, kɛ mí Hala ca ndu ɲɛ sɔvɛ bɛndu, mó hɛli ndu. 5Niaa bɛɛ, la va maa powta kiyɛi, mì la sɔla luɛyɔɔ o tangul cɛi Kɔl-Diandaa nin, mì la va vanaa-solia-lasálàá diandaa, le sálàla kɔltan solio, la hɛnan Hala o Yeesu Krista nin-ndan, 6kani o co o sɛvaa o Sɛbɛ Hala-o nin aa:
«Tofa vɔ, i co pow-sɔngio handɔɔ Siɔn,
o sɔvɛ ya hɛli-o,
vana-vana laalan ndu pɛ, ndu tulnun lasiɛmbu le.»
7Bɛɛlen le co le niaa vanaa laalannda. Kɛ le vanaa kɛɛ le laalanndo-a,
pow vanaa tangulaa viow-vo,
ndu siŋnun pow lebollo ni,
8O kon kɔɔli, mó dimi vɛlɛ aa: «Pow tosa mà boŋ, mà del-lo co kon ni.» Vanaa kan a del kani a kɛɛ le diom Hala-o biyɔɔ, nduyɛ ken ndíì kelun le nda ni.
9Kɛ niaa, vanaa Hala hɛli-a niaa co ni, vanaa-solia-lasálàá lemasaa, kunda diandaa, haliko mi la yonda dɛnnda kɛndɛla vana soli niaa o ɲumndan nin, mó cuu niaa o ɲɛ-tengaa ndɔ sɔvɛɔ-o nin-ndo lan. 10Niaa ve paandu vanaa ndɔ le, kɛ hau nin, la siŋnun yungu Hala-o, ɲíí ve paandu le niaa le, kɛ hau nin la sɔla ɲííye tuinɔnndo.
Mɛɛ vanaa laalannda bɛnda mà kela vanaa ceenda tɛɛn yɛ
11Niaa vanaa hɛnan ya-a, i co niaa sila, niaa co mialla a vanaa hiavannda o lɛŋnden coo-a, la kpakpala yeeman falun co kɔlta niaalan cɔlɔbaa-on. 12La nɔ kela kɛndɔɔ vanaa co vanaa laalan te-a tɛɛn, haliko a ɲiinduu niaa bɛɛ còòlan coo maa vanaa tosaa dɛnnda vɔɔn, mà ce dɛnnda kɛndɛla niaalan, mà biilu Hala paale o hunnin-nden.
13La tosa le Maalii, mì la tuisin simlacia co vanndacieea kpede tɛɛn-nda o labɛngunin, o va masa bɛndoo, 14o va masaa n'bungaa, a masa bɛndoo viam le vanaa tosaa dɛnnda vɔɔnda sangaa tuisio coo, te kon te le vanaa tosaa dɛnnda kɛndɛa nuvalio mello-a. 15Kani hɛnan Hala-o co ni, mì la tosa dɛnɛ kɛndɔɔ le diɔmaa co haa sɔɔn vɔɔnndon dimio a niaa o kɔɔ-a sondolan kindaa. 16La kela maa vanaa co o ba nda coo-a, kɛ nduyɛ, la siinguu hɔ́ɔ́yɛi niɛi kunga viannanndo le dɛnɛ vɔɔndo vionɔɔ le, kɛ la tosa dɛnndan maa vanaa baalaa Hala. 17La ke vana-vana bɛɛlen, la kaola puapilɛa niaa vanaa laalannda, la vo Hala mì la ke masaa bɛɛlen.
Tɔɔmasele sangala Krista lan
18Niaa cɛa, la tuisin tootoo mì la ke vanaa niaa bɛndua bɛɛlen taw, o co ko a naŋ súú ma va niaa biyɔɔ kɛndɔɔ-a le, kɛ hali a kendu calle-a bɛɛ. 19Kani o co dɛnɛ kɛndɛ le sangaa biuvɔnndo o kafalan coo le sɔɛi Hala-e biyɔɔ. 20Kani taa saangiaa pɛ vana le kela nɔm vɔɔndo, ɔ́ɔ̀ bɛɛle n sɔla o ken nin-nden? Kɛ taa saangiaa pɛ vana o dɛnɛ kɛndɛ n tosa-o kɔɔli, dɛnɛ kɛndɔɔ o va le nɔm Hala o hɔl ni. 21Le ken kpeekpei niaa sɔla veeloo ni, kani Krista bɛɛ sanga le niaa mó mel niaa tɔɔmaseloo haliko mi la dem foofola ndɔlan. 22Ndu tosa haki loo, ndu sɔɛi fula o sondo le vana hui loo, 23ndu nda yei o mingi loo, ndu nda saangiaa, o pasa loo, kɛ mó mɛi Hala Vana kialaa iyama sandaa sɔɛi ndɔɛi o ba. 24Mó cua hakila naalan o n'dial o yɔmndo coo, haliko mi n vi a ba hakio, o kon mì n muungu yoomu a ceen sandaa. Fungbula ndɔlan la tosa ni mì la sɔla siongɔɔ. 25Kani maa saa luusian-nda niaa va ni, kɛ sunsun la muungu vana co niaa mandaa-o o ibuŋ, ndu co kɔlta niaalan mandaa ni.
Currently Selected:
1Piɛr 2: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
