1Piɛr 1
1
Yilɔɔlan
1Ya Piɛr, kiila Yeesu Krista-o ni.
Ya co vanaa Hala hɛli, má ɲaanun, má sɛŋin o lɛŋii bungɛi he nin-nda sɛvallo ni, a co Pɔn, Kalasi, Kapadɔs, Asii a Bitini-a. 2Pua nuu Hala cii niaa hɛli mɛɛ o tuu paandu pá-pá yɛ, le tùú niaa sɔla dindio Kɔl-Diandaa o ba le sɔɛi Yeesu Krista-e biyɔɔ, mí la sɔla kooma ndɔan fasaŋiaa le dindio sɔlaa yɛ.
Màá kɛndɛi a kɔlɲuloo va le niaa taw-taw!
Tiindan kpeekpeiyo
3Balikaa co le Hala, o co Fuɲaa Maalii naa Yeesu Krista-o. O tuinun naa iɲíí, mí n muungu a kiyɛi o tendul Yeesu Krista tendul, mó fula vanvílɛ́iya tɛɛn le tiindan kpeekpeiyo sɔlaa-o, 4le kɛ́ tembu loo, o nɔɔlian too, o ɲɔfɔla loo. Kɛ́ kon co o mandaa le niaa o halataala, 5le niaa co a mandaa o kpaaya Hala-o nin a laalanndo-a, le cinda co nin le cɔmnɔnndo ceen o telennda mɛɛlaalan-ndo.
6La co ɲaaloo dɔwnɔnndo mì la va huuloo le ken, la kei bɛɛ o sanga súú-súù ka nin le telen bingi. 7Laalan niaa nɔ yɛ o Yeesu nin-ndo, ndu hiow baa kaloo a sianion. Lelan, le sinaa te la nɔ pɛ laalanndo o Yeesu nin lekɛ́ndɛi, mɛɛ mì sɔɔn dɛnɛ palaan kei niaa coo. O kon, paale Yeesu Krista cɔmnunnin-nden le tiiya pɛ, la sɔlanin candɔɔ, biiloo a bɛɛlen. 8La ci ndu le, mí la kaola ndu. Niáá ci vɔ vɛlɛ ndu le, mí la laalan ndu, mí la va huuloo a ɲaale bɛndoo, 9kani la sɔla i niaa va kiltan kɔɔli-e: cindaa le kɔlta niaalan.
10Vanaa-tɛɛngaa-diom Hala-a, a tɛɛnguu sɔɔn Hala-on a kɛndɛi va le niaa-e o kɔɔ-a yaasiaa, má tosa baalaa le cinda kon. 11A va kindinndo le telen dɛnnda lan la tosan-ndo a ɲɛ yɔngu dɛnnda lan tosanndo-o sinaa, la Hala Kɔl-Diandaa Krista-o yɔngu lan pɛɛn. O dɛnnda lan nin nda va pɔɔ sangala Krista ndóò sɔlanin-ndan a biilu ndóò sɔlanin o kon kɔɔlio dimio ni. 12Mí Hala cɔm vanaa-tɛɛngaa-diom Hala-a maa yoongu nda va tɛɛnguo-o ve le nda pila le, kɛ le niaa. Yoongu kon vanaa hiviaa Yoongu kɛndɔɔ a tiiyal niaa nihau nuaa ni, má dimi ndu a kpaaya Hala Kɔl-Diandaa fula o halataala-o. Hali mɛlɛkaa bɛɛ a yeema mà sina sɔɛi ken.
Silalan le vaa o diandaa
13Lelan, la va a bɛɛndiannda, la va o lapɔɛɛnɔn nin te. La handu tiindan niaa kpede o kɛndɛi tosalannin niaa lɔ́ɔ́ Yeesu Krista fulanin ceen-nde coo. 14La del yeeman niáà nɔ paandu o sina lepɛŋ niaa nin-ndon kɔɔli le, n niáà nɔ telen niaa va vɔ n'cuaambɔ-on pɛɛn. 15Kɛ mɛɛ vana veelu niaa-o co o diandaa yɛ, niaa bɛɛ la va a diandaa lende o kela niaa nin kpede. 16Kani o co o sɛvaa aa: «La va a diandaa, kani o diandaa ya co ni.»
17La co Vana hiyan vana o yamɛi kiolɔɔ nin too veeloo o piɛile niaalen nin aa Pua, ó kialu yamɛi vannda mɛɛ dɛnnda vana-vana la co yɛ-o pɛɛn, lelan la kela a siòònde telen niaa co o lɛŋnden coo-o. 18Kani la sínà maa o co a volion, te kon te a sianion, ɲɛm támbù mun-ndon te niaa sɔla baŋaa dɛnnda niaala fondolan ba le, dɛnnda fuɲaa niaa mel niaa kɛ́ɔ lan pɛɛn. 19Kɛ a kooma sɔvɛma bɛnduma Krista-an, Krista kon yɔŋnun ni maa saa téndé nɔ lenamta loo, ó nɔ sɔŋ too. 20Mó sɔla hɛlio lɔ́ɔ́ pá mí ceendo cɔawnun, mó fula ceen vakpa o palɛi mɛɛlɛi he le dɛnɛ niaa kɛndɔɔ. 21O ndu nin niaa laalan Hala tindi ndu fulaa vanvílɛ́iya tɛɛn, mó ke ndu biiloo-o ni, haliko mi laalan niaa a kɔlkɛsiaa va o Hala nin.
22La cii kɔlta niaalan dindi o sɔɛi toɲɛi biyɔɔ nin, haliko mi kaolian kpeekpeiyo va niaa tɛɛn. Puapilɛa nia co ni, lelan la kaolian vellaa-velle a kɔltan kpow, 23niaa velun a sɛnɛi, o co o yɛi vu-o nin te-a, kɛ o yɛi vi loo nin a sɔɛi Halɛi kiyɛyii hiw lɔ́ɔ́-lɔ́ɔ̀ lei nin-nda. 24Kani o co o sɛvaa aa:
«Maa bil vanaciee kɛ́-kɛ̀ co ni,
mì biilu ndaa kpow va maa peengela fula yondoo nin-ndan.
Billo vesa pɛ, peengoo del.»
25Kɛ sɔɛi Mɛlɛka-e ndi co le fɛɛn a fɛɛn.
Sɔɛi ken yɛ, ndi co Yoongu Kɛndɛ tiiyalan niaa-o ni.
Currently Selected:
1Piɛr 1: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
