1Korɛntea 12
12
Valta Kɔltan
1Puapilɛa nia, i yeema mì la va o sínà lepɛŋndo nin a valta kɔltan o kɔɔ le. 2Tuma niáà síná vɔ Hala loo, a va niaa nanɔɔ má va kɔlan a niaa le piɔmaa suu le-a sooloo. 3Lelan i yeema mì cɔm niaa maa vana-vana Kɔl Hala-o co pɛ nin, o dimi le aa: «Màá Yeesu dɔwnun danga!» Lende koni, vana-vana tiwba mò dimi le aa: «Yeesu, Maalii o co ni», te Kɔl-Diandaa co ndu nin te.
4Valtan la co yɛ́-yɛ́, kɛ Hala Kɔl-Diandaa pilɔɔ kpé yɔngu lan ni. 5Baalalan la co súúlan taw, kɛ Mɛlɛka pilɔɔ kpé. 6Kpekulan la co súúlan taw, kɛ Hala pilɔɔ kpé tosa lan lende vannda kpow nin ni. 7Nduyɛ Hala Kɔl-Diandaa yɔngun vana-vana le dɛnɛ kɛndɛ vannda kpow. 8Vana pum, mì Kɔl-Hala-o ke ndu sɔɔn kɔlkalon dimio, o pilɔɔ sɔɔn dɛnɛ sinaan mɛɛ Kɔl-Diandaa pilɛ kon co yɛ. 9Mì kɔl pilɛ kon ke vana pum laalanndo, mò ke vanndo pillo kpaayaa le vanaa lanàá singio, 10mì Kɔl-Hala pilɛ kon ke vana pum kpaaya le dɛnnda kɔndɔfiltan tosaa, o pum le diom Hala-o tɛɛnguuo, o pum le yiyanndan sinaa. O yɔngun vana pum le sɔɛi o sɔɔn mangalan celen nin, o pum le sɔɔn mangalan mun vannda hivullo. 11Kɔl pilɛ kon kpé co dɛnnda lan tosaa ni, mò va vannda lan piɔwvo a pilɛn-pilɛnnda mɛɛ hɛnan ndɔɔ co yɛ.
Kɔɔlen nden pilɛ a falon taw
12Nduyɛ, kɔɔle vanacieo len pilɛ le co ni, kɛ falon taw le nɔ ni. Falon n va bɛɛ sɛ́lɛ́ lende o kɔɔle len nin, kɔɔlen nden pilɛ kpé le co ni, lende koni Krista co ni. 13Kani naa kpow n sɔla yinɔɔ Kɔl-Diandaa pilɛ kon o ba, mí n siŋnun kɔɔle pilɛ len, vana va Yuifinɔ, vana va Yuifinɔ le. Vana va cɛ, vana vannun o ba nɔm coo, mí n sɔla Kɔl-Diandaa pilɛ kon le kolɔɔ.
14O co falei ndii pilɛ le i co diallon te, kɛ falon taw. 15Te pelei dimi pɛ aa: «O co ya le co baa le. Lelan i co o diallon coo le.» Kon kuuna ndi vaa falei ipilɛ o diallon nin te. 16Te nilen le dimi pɛ aa: «O co ya le co hɔlten te. Lelan i co o diallon coo le.» Kon kuuna len vaa falei ipilɛ o diallon nin te. 17Te kɔɔlen kpede léè va pɛ hɔlten, vɛ̀ɛ̀ léè tuɛi yɛnin? Te léè va yɛ pɛ nilan kpow, vɛ̀ɛ̀ léè saa yɛnin ɲɔɔn cun? 18Kɛ nduyɛ, Hala kɛsi ifalu oo ifalu o diallon nin mɛɛ hɛnan ndɔɔ co yɛ. 19Te kɔɔlen kpow léè va pɛ falei ndi pilɛ, kuɛɛ nɛ diallon mun-ngoo va yɛnin? 20Lelan, falon co taw, kɛ kɔɔle pilɛlen kpé.
21Le hee, hɔlten le nɔla mì le dimul baa le aa: «I nɔ mako a nɔm te». Bollen bɛɛ, le tiwba mì le dimul pelon te aa: «I nɔ mako a niaa le.» 22Kɛ falun naa n ca maa n nɔ mayoomu loon bɛnda mì n va naa o n'dial. 23Nduyɛ falun naa n ca maa n co n'sɔvɛ taw loon, mun naa n hiow bɛɛlen keo ni. N naa n yiyan maa n niŋ bɛɛ loon naa n hiow caa vionɔɔ ni. 24Kɛ nduyɛ, n vannda ca-on, n kumbu mun te. Kɛ, Hala toosiaa falun naan toosiaa pum, mó ke n vana ci n'sɔvɛ loon bɛɛle bɛndulen, 25yɔŋii sɛiyanndo va o diallon nin, kɛ mì n nɔnnan hɔlten vellaa-velle. 26Te falei ipilɛ sɔla pɛ sangaa, falun tɔ̀un kpow n sanga latulu a ndi. Te ipilɛ sɔla pɛ biiloo, n tɔ̀un kpow n dɔwnun ɲaale a falii ken latulu.
27Niaa yɛ, kɔɔle Krista len niaa co ni, niaa a pilɛn-pilɛnnda kpow, dialun ndɔn niaa co ni. 28Lelan, o vanaa laalannda tɛɛn, mí Hala kɛsi fɔlɔn kiilaa, diinndɔɔ vanaa-tɛɛngaa-diom Hala-a, yàándɔɔ vanaa pɛɛkaa. O kon kɔɔli, vanaa tosa dɛnnda kaamaalan-nda, o nda kɔɔli, vanaa nɔ kela singiaa lan-nda, vanaa mala vannda-a, simlacia a vanaa sɔaa o sɔɔn mangalan celen nin-nda. 29Vɛ̀ɛ̀ nda kpow co kiilaa ni? Vɛ̀ɛ̀ nda kpow co vanaa-tɛɛngaa-diom Hala-a ni? Vɛ̀ɛ̀ nda kpow co vanaa pɛɛkaa ni? Vɛ̀ɛ̀ nda kpow tosa dɛnnda kaamaalan ni? 30Vɛ̀ɛ̀ nda kpow nɔ ke singiaa n'vanndo ni? Vɛ̀ɛ̀ nda kpow sɔaa o sɔɔn mangalan celen nin ni? Vɛ̀ɛ̀ nda kpow tɛɛsiaa diomndan ni? 31Lelan, yeemɛi bii niaa le valta hiow naŋɔɔ lan nuwviaa.
Kɛ i co nihau niaa nɛi hiow naŋɔɔ-o cɔm.
Currently Selected:
1Korɛntea 12: BKG
Highlight
Copy
Compare
Share
Want to have your highlights saved across all your devices? Sign up or sign in
© Alliance Biblique en Guinée
