1Korɛntea 11

1La tuula ya mɛɛ ya bɛɛ co Krista tuulaa yɛ.

Mɛɛ vanalanɔɔ bɛnda mò bii bolle ndɔlen o kaannden yɛ

2I co niaa candɔɔ le yiyan niaa co ya coo o dɛnndan kpow nin-ndo a le silala nila niaa co biyɔɔ mɛɛ ya dimul niaa yɛ lan. 3Nduyɛ, i yeema mì la sínà maa Krista co vanndacieea kpow bollen ni. Vanapɔnɔɔ co vanalanɔɔ bollen ni, Hala co Krista bollen ni. 4Vanapɔnɔ oo vanapɔnɔ piɛi pɛ Hala, te kon te mò va diom Hala-o tɛɛnguuo a ɲɛ pum o lebol, mɛɛ o cii vana co ndu bollen-ndo bɛ̀ɛ̀lan tɛɛmbuu. 5Kɛ nduyɛ, vanalanɔ oo vanalanɔ va pɛ Hala piɛiyo, te kon te mò va diom Hala-o tɛɛnguuo bolle fondo, mɛɛ ndu tɛɛmbuu vana co ndu bollen-ndo labɛɛ. Bau, o co ko kpen a sendin ndóò sendin nin-ndo. 6Kani te vanalanɔɔ kumbu bollen te, mɛɛ o kilin yiinde. Kɛ nduyɛ, te o co pɛ dɛnɛ lasiɛmboo le vanalanɔɔ yiinde kilio te kon te sendio, mɛɛ o kumbu bollen. 7O bɛnda mì vanapɔnɔɔ kumbu bollen te, kani ndu co velan biilu Hala-o ni. Vanalanɔɔ yɛ, ndu co biilu vanapɔnɔɔ ni. 8Kani o co vanapɔnɔɔ le fula vanalanɔɔ o n'dial te, vanalanɔɔ fula vanapɔnɔɔ o n'dial ni. 9Vanapɔnɔɔ cownun le vanalanɔɔ le, vanalanɔɔ cɔwnun le vanapɔnɔɔ ni. 10Lelan, vanalanɔɔ yiyan le mɛlɛkaa mò nɔ tɔɔmaseloo o lebol, kon cɔm ni maa o co o kpaayaa pum bɛngu. 11Kɛ nduyɛ o Maalii nin, vanalanɔ co le te o co mì vanapɔnɔɔ va le. Lende vɛlɛ koni ni, vanapɔnɔ co le te o co mì vanalanɔɔ va le. 12Kani mɛɛ vanalanɔɔ fula vanapɔnɔɔ o n'dial-lɛ, lende vanapɔnɔɔ velun vanalanɔɔ o n'dial ni. Nda kpow, Hala o ba nda fula ni.

13Niaa pila kiolu sɔɛi he iyama. Vɛ̀ɛ̀ o bɛnda pá mì vanalanɔɔ piɛi Hala, te o kumbu bollen te? 14Ceendo pila bɛɛ pɛɛku naa maa o co dɛnɛ lasiɛmbu mì vanapɔnɔɔ bɛndi yiinde. 15Kɛ o co dɛnɛ lebɛɛ mì vanalanɔɔ ndu bɛndi yiinde. Kani yiiŋii vilɛiye i yɔngun ndu le bollen kumbɔɔ. 16Te vana pum yeema yɛ pɛ mò sɛɛngiaa, mɛɛ mò sínà maa naamu vaa lende co naa tɛɛn te, vanaa laalan Hala kpow-va bɛɛ nɔ naamu vaa lende le.

Le dioo o tabali Maalii-o

(Matie 26.26-29, Marke 14.22-25, Luke 22.15-20)

17Sɔɔn ya co mun niaa dimullo-on, o co le niaa candɔɔ le. Kani bɔɔŋiannda niaalan, dɛnɛ vɔɔndo la hiaw niaa cuu a dɛnɛ kɛndɔɔ. 18Sɔɛi tasei co hee ni, i tuei maa la bɔɔŋian pɛ, la piɔvian kundalan yɛ́-yɛ́. Nduyɛ, i laalan kon ɲɛ-pɔmbɔ. 19Kɛ nduyɛ, mɛɛ mì piɔvanndan la va niaa tɛɛn, haliko mi vana sínà vanaa lo o lediom coo lekɛ́ndɛi-ya. 20Te la cuungian pɛ, vɛ̀ɛ̀ o co ɲɛdiaa Maalii-o le niaa dia dio kon te? 21Kani telen diaa tiiya pɛ, vana-vana de ɲɛdiaa ndɔɔ a kiltan. O kon, a pum lò a yiaan, mì mɔiyan ma bii a pilla. 22Vɛ̀ɛ̀ vana-vana nɔ cɛi ndɔ le dioo a kolɔɔ lon te? Te kon te vɛ̀ɛ̀ vanaa laalan Hala-a niaa yeema bɛ̀ɛ̀lan tɛɛmbuuo mì la tuisi vanaa nɔ ɲɛ-ɲɛ le-a siɛmbulan ni? Yɛɛ ya dimul-lɛ niaa vɛlɛ? Vɛ̀ɛ̀ i candu niaa lelan? Kɛì-kɛì bɛɛ! I cendù niaa le.

23Kani naamu ya tɛɛngul niaa-o, Maalii o ba ya sɔla ndu ni. Icɔl nda mal Maalii Yeesu vannda o ba-o, mó cua buloo, 24mɛɛ o cii balikaa malɔɔ, mó yimiyimi ndu, mó dimi aa: «Dialun nun co mun ni, n yɔngun le niaa-on. La va hoo tosaa le loonɔnndo a ya o kɔɔ.» 25Ɲɛdiaa icɔllo cuvɔɔ dioo, mó tosa vɛlɛ lende a taala kólaa, mó dimul nda aa: «Taala kólaa ho co kpema sɛnɛi yiinun a kooma nian-ndo ni. La va hoo tosaa le yiyanndo a ya kɔɔ tuma-tuma niaa va pɛ koovan man kolɔɔ.» 26Kani telen oo telen niaa va pɛ buloo ho dio mì la va kolɔɔ o taala kólaa ho nin, mɛɛ piɔ́m Maalii-o niaa co cɔm kon ni háá mo hin.

27Nduyɛ, vana-vana de pɛ buloo ho, te kon te mò kol o taala kólaa Mɛlɛka-o ho nin mɛɛ o bɛnda le yɛ, mɛɛ o del kasi a dialun Maalii-on a á kooma ndɔan. 28Lelan, vana-vana yaasiaa fɔlɔn kɔl ndɔɔ, malan o dia buloo ho, mò kol o taala kólaa ho nin, 29kani vana-vana de pɛ, mò kol, mò sínà diallon mun pɛɛngu le, mɛɛ ndu co dioo a kolɔɔ le ndu pila yaalanndo. 30Le hee vanaa bɔɔ-bɔɔ co a nààlan niaa tɛɛn ni, a pum a co namtaa, a pum a vi. 31Kɛ te naa pila n yaasiaa pɛ kɔlta naalan, a kilunin naa iyama le. 32Kɛ Mɛlɛka kialunin naa iyama, mò mingi naa o nɛi, o kon n sɔlanin yaalaa a ceendo latulu le.

33Lelan puapilɛa nia, la bɔɔŋian pɛ le dioo, la cuman vellaa-velle. 34Te yiyan ma va pɛ vanndo pum nɛiyo, mɛɛ o dio o ndu lo, yɔŋii niaa pila sɔla yaalaa telen niaa va a cuungiannda-o. Le sɔɔn tɔ̀un yɛ, lɔ́ɔ́ ya kɔanin-ndo, i siownin mun toosiaa.

Currently Selected:

1Korɛntea 11: BKG

Highlight

Copy

Compare