Filipə 2

Kristə nwɔ kpɔwɔ mąą yɛɛlaa

1Akɛ kani, ká toliɛi Kristə hu, ká hvaŋąlɔɔ wɛlikɛmąą laa hu, ká yee lɔɔ gee hu Kili-Mąąhəɠɛɛ haalai, liinɛ̨ɛ̨ gwəi laa da ɲɛ̨imąąwɛli kaa hu, 2akɛtii, 'ká gwə́inɛ̨ɛ̨ kani, a nɛ̨ɛ̨i 'ká mo a ká kee. Wɛlikɛmąą laa tanɔ̨n ə kɛ ká yəi, ká kiliŋąhiɛ pələ ə kɛ tanɔ̨n, 'ká gɛ pələ kwɛli mą, ká yee ə lɔ gee hu; 3'Ká hvo mɛ̨nį lɔpee ta kɛ a wɛli kpɛɛ mąąlaa, a wala kɛ ti, nu ta hvo gbɔwɔ kɛnɛ̨ kiliŋąhiɛ kɛ; kɛlaa, kpɔwɔ mąą yɛɛ laa hu, ka ka ɓɛlaa kaa yɛ, ká tɛɛ-mąąɠaa. 4Nu ta hvo giliŋąhiɛ gbɔwɔ nwɔ tɔlɔ kwɛli mɛ̨nį ɓa, kɛlaa ka ka kiliŋąhiɛ ka ɓɛlaa di wɛi ɓa. 5Mąąnɛ̨ɛ̨ ka wɔ kiliŋąhiɛ ə kɛ lɔ yɛ pələi Kristə nwɛi ə kɛ la.

6Yai, bələi mąn Yálá laa kaa ɲəi,

hvo giliŋąhiɛ li da Yálá di pɛli mɛ̨nį ɓa, hvo kąnąn yili ɓa.

7Kɛlaa yaamun, ə gbɔwɔ mąąkpoloon,

ə gbɔwɔ kɛ yɛ luwɔ,

gɛ pələ ə kɛ yɛ nu,

ɛlɛɛ yaan, gbɔwɔ kɛ pələi tii, di kɛ gɔlɔn nɔ, yɛ nu.

8Ə gbɔwɔ mąą yɛɛ,

ə lɛɛ woo mu laa kɛ, ə lɛɛ ɉu, ə haa la,

ə haa kpɔ la ɓa.

9Yili ɓə gɛ Yálá ə ɉee hɛn gəlee nwun mɛ̨i,

laai gɛnɛ̨ dɛɛ laa kəlee ɓa, di ɉee mą,

10ya ɓə a gɛ, Jesus laa hu, nu kəlee a pu nwungbə la, di gwɛli hvilɛn mą,

yələkɔlɔn ɉu, lɔi mɛ̨i, da lɔi mu;

11ɛlɛɛ, hįi kəlee diɛ mo, diɛ kɛ: Jesus Kristə ɓə a Ną́mu,

Ną́n Yálá ŋą mąąwiɛlaa hu.

Kristalɛa di wɔɔ mąą tíi

12Yili ɓa, nwɛ́likɛmąą nuą, bələ ká kɛi lɛɛ nwoo mu laa kɛ la, a yələ kəleei, 'ká lɛɛ lɔ ka yee yili ɓa, yiihu, ə mą kɛ və́ laa ká pɔ, ká túwɔ́ pələ ə ká nwun mąąɓo mɛ̨nį too pono ɲą, káá ɲɔwu la, ká mąą yɛ kpɛlin. 13Mąąhɔlɔɓo, Yálá ɓə a, niiɓa gɛ lii, da gɛ wɛli too káá, yɛ bələi gaa la gwəi a nɛlɛɛ.

14'Ká hvo ká woolaa ka kɛ mɛ̨nį lɔpee ta hu, ka hvo hɛatoo. 15Ə gɛ ka kɛ a nuąi hɔn və diɛ, ka kɛ a Yálá lonni leelee, yiiɠaai di mąą kulɔi hvo diɛ yɛnɛ̨ɛ̨, hulu nuą da nu ɲɔ̨nwɔ̨ɔ̨ɠaa lɔwai. Mąąnɛ̨ɛ̨ ka lən di lɔwai yɛ yələkɔlɔn ɉu pɛmɛ̨lɛ̨n-gɔw. 16Káái ɓalo woo kaa ká yəi, ka kɛi túwɔ́ ti, gu Ną́mu pai lɔwai, ɲɛ̨́i a pono. Yili ɓə a nɛ yɛ, mɔ̨nɔ̨i ŋą́ mįi, da gólói ŋą́ gɛ, və́ gɛ li kpɛli.

17Ɉaláái ká wɔɔ laa na laa a gulɔ, da pɔ tíɓo, akɛ, naa kulɔ hɛn mąą a ɲą́mą, ŋą́ hvaa mą, ŋą́ dɛɛ ká pɔ, a gwə́inɛ̨ɛ̨. 18Bələ lɔ ɓə mąąnɛ̨ɛ̨, káá kpɛlimąn ká kwəi ə nɛ̨ɛ̨ la, yɛ ɲą́ą́.

Timote da Epafroditə

19Ną́mu Jesus hu, gáá bɔ ŋą́ Timote tɔɔ ka pɔɔli yiihu, a ɉu kpua, ə gɛ ɓɛlɔwai a pənə a paa la a ka mąą mɛ̨nį hukulɔ mą́ą́, ɲą́ą́ gbɛli ŋį́ hvaŋą lɔ hɔlɔɓo. 20Nui lɔpee ta hvo ɲə́i, kwá yaa kuɔ ká mąą liihɛlɛn ɉee a neelee, ə kulɔ lɔ Timote yaa tɔ̨nɔ̨ gbən bulu. 21Yiiɠaai ti kəlee, di kpɔɔ mɛ̨nį lɔ ɓə da niihɛlɛn Ɉee; di hva di kiliŋąhiɛ Jesus Kristə mąą mɛ̨nį ɓa. 22Bələi Timote a kulɔ la nwoo ɓa, kaa kpinįi ka gɔlɔn. Da pələi kwa yaa kwa kólo kɛ la, ya ɓə bɔ́ yɛ nón, gɛ́ ɓo yɛ nąn, kuɔ nwɛlɛɛ lɛlɛɛ mąąkɔ̨nwɔ̨. 23Ŋą́ pai gbɔ́wɔ́ mɛ̨nį huponoɔ kaai la, nąąlɔwai ɓə gáá pai Timote tɔɔ la ə pa ka pɔ. 24Kilitɔɔmąą laa kaa ɲə́i gu Ną́mu hu, gɛ́ ɲą́ą́ gbinįi gáá pai ká pɔɔli, ɉu hvo kwɛa li.

25Epafroditə ŋɛ̨i ká dɔɔ yɛ pa mą́ą́ kpaan gbɛɛ hɛnŋąa laa lɛi, ŋą́ gaa, gɛ́ nɛlɛɛ ɓaa, ŋą́ pənə, ŋą́ dɔɔ, ə pa ka pɔ, gaa a mɛ́lan nɛlɛɛ góló ŋɛ̨i gáá gɛi da gɔi ŋɛ̨i gáá gɔi mąą mɛ̨nį hu; 26gaa kpɔ bɔ ə ɲɛ̨i tɔɔ káá, niihɛlɛnŋąąi, mąąhɔlɔɓo, kaa kɛ nwɔ ɲɔ̨n mɛ̨nį pələ mɛ̨n. 27A tɛ̨ą ə ɲɔ̨n gɛ kpɔ tii, ɉaai ə lɛɛ tiikpə, kɛlaa, Yálá ə ɲɛ̨imąąwɛli kaa, yaa tɔ̨nɔ̨ lɔ hvəə, ku nu hveelɛi ɓə ə ku ɲɛ̨imąąwɛli kaa, ə gɛ, nwɔ́ liihɛlɛn da hvo pa pɛlɛ mą. 28Gáá bɔ ə pənə, pa kɛa ka pɔɔli kpɔ ɉa-ɉa, ə gɛ, ɓɛlɔwai ka gaa la ka kwəi ə nɛɛ ɲą́ą́ gbɛli nwɔ́ liihɛlɛn ə kpɛɛ. 29Yili ɓa a pa, ka naa kwiɛn a kwəinɛ̨ɛ̨ kɛnɛ̨ɛ̨ gu Ną́mu laa hu, ka gɔlɔn kaa diɛ nu ɲɔ̨nwɔ̨mąnŋaai ti ɓə, mąąnɛ̨ɛ̨ ka di mąąwiɛ. 30Mąąhɔlɔɓo, ɉaai ə lɛɛ tiikpə Kristə nwɔ kólói mąą mɛ̨nį ə gbɔwɔ kulɔ a haláá, ə gɛ, ɉɛn kɛ ka hva pɛli ɉəɠəi ka hvo paa la bɔ́, ə paa la.

Currently Selected:

Filipə 2: BKPDCG

Highlight

Copy

Compare