Filipə 1

Túwɔ́-woo

1Ɲą́ą́ Polə kwa Timote Jesus Kristə ŋą tínuą, kuɔ ɓə ɉɛɓɛ́i ŋɛ̨i tɛɛi Kristalɛa diɛ, diɛi di kaa Filipə daai, da di mɛ̨ikaa nuą, ə mą kɛ, di wɔɔ tínuą. 2Nɛ̨ɛ̨laa da liilaa ə kɛ káá, yɛ həɠə gu Ną́n Yálá da gu Ną́mu Jesus Kristə yəi.

Polə ə Yálá hvɛli Filipə daai kalan nɛa diɛ

3Ŋą́ nwɔ́ Yálá hɛɠɛɛɓo, ɓɛlɔwai lɔpee ka nąą kili a too la ŋą́. 4Yələ kəlee, ŋą́ hvɛli wooɠaa hu, vá lɛ̨ą káá, ɛlɛɛ, ŋą́ vɛliɓoi tii kɛ a gwə́inɛ̨ɛ̨. 5Mąąhɔlɔɓo, kaa kpɔnmąą tɛɛ bɔ́ nwɛlɛɛ lɛlɛɛ laa həliɛ hu, ə həɠə voló tɔlɔɔ ɓa, ə həli la yiihu ɓa. 6Náái na kpɔ gɛ́: Yálái góló lɛlɛɛ ti kɔ́wɔ tɔɔ ká hu, gaa pai lɛɛi mą, ə naa kulɔ, a Jesus Kristə ŋą hvólói. 7Vialaɓoɔi ka mąą liihɛlɛn ə too mą́ą́, ka mąą mɛ̨nį kaa níí hu a hvóló kəlee, mąąhɔlɔɓo, mɛ̨inɛ̨ɛ̨i yálá ə gɛ mą́ą́, ká wɔɔ nąą kaa ɉu. Ə mą kɛ yiihu gáá gaho ŋą, ə mą kɛ, ŋą́ kɛ la gbɔ́ɔ́ ɓa gɛ́ wɛlɛɛ lɛlɛɛ mąąkɔ̨nwɔ̨, gɛ́ naa həli. 8A tɛ̨ą, nwɛlikɛmąą laaii gaa ɲə́i Kristə laa hu ka mąą mɛ̨nį ɓa, Yálá ɓə a gɛla.

9Yii ŋą́ vɛli, ká mąą mɛ̨nį ɓa ya ka: Gɛ́ ka wɔ wɛlikɛmąąlaa hu yɛ kɛnɛ̨ lɔ a yələ kəlee, da yɛ pɛlɛ mą mɛ̨nį kɔ́lɔnŋąą hu, 10káá pɛli mɛ̨nįɠaa gulɔ ɉu kɛi, yii nɛlɛɛ, káá gɛ; yili ɓə pai gɛi, ká mąą ə həɠə, ká mąąkulɔi hva kɛ káá, a Kristə ŋą hvóló; 11yili ɓə a gɛ, ká pilɛ kɛa a tələnmolaai a həɠə Jesus Kristə yəi, yɛ pa gu pɔ, guɔ Yálá mąąwiɛ la, guɔ Naa tɛ.

Polə too mɛ̨nį gaho ɲą, da Nwɛlɛɛ lɛlɛɛ tɛ mɛ̨nį tɔwɔ

12Nąn nonnii, gáá bɔ ka gɔlɔn kaa diɛ laa nɔ̨nwɔ̨ yiiɠaai həli mą́ą́, yili aa kɛ a wɛlɛɛ lɛlɛɛ tɛ mɛ̨nį tɔwɔ. 13Dɔɔkwəlii holahiɠaa, da pələ takpɛli nuą, di gɔlɔn diɛ gáá gaho ŋą Kristə mąą mɛ̨nį ɓa. 14Gɛ́ mɛ̨nį gaho ɲą, yili aa gu nąn nonnii tamąą di wɔɔ liikpələ ta kɛ mą, gu Ną́mu hu, di hva ɲɔw Yálá lawoo laa həli.

15A tɛ̨ą, daɠaa da gɛ hɛn nwɛlilaa da wɛli kpɛɛmąą laa, kɛlaa, daɠaa diɛ Kristə mąą mɛ̨nį laa həli a liinɛ̨ɛ̨ gwəi. 16Nuąi da gɛ a wɛlikɛmąą laa, da gɛ a nwɛlikɛmąąlaa, di gɔlɔn diɛ mą: gɛɛ mɔ̨ɔ̨ gaho ŋą, gáá ɓɛ wɛlɛɛ lɛlɛɛ mąąkɔ̨nwɔ̨ mɛ̨nį ɓa. 17Diɛi tii, da Kristə mąą mɛ̨nį laa həli a kili ɲɔ̨nwɔ̨ɔ̨, di kwəi kili hvo lɛlɛ li, di kwəi kili ɓaa, di nwɔ́ɔ́ gahoi ŋą mɔ̨nɔ̨ ta kɛ mą.

18Kɛlaa, yili hvo a mɛ̨nį ta! Yii a tɛ̨ą ya ɓaa: di gɛ a wɛli kpɛɛ mąą laa, di gɛ lii lɛlɛɛ hu, Kristə mąą mɛ̨nį laa ə həli lɔ, yili ɓə a gwə́inɛ̨ɛ̨. 19Mąąhɔlɔɓo, ŋį́ gɔlɔn, yili kaa pai kɛi a málo mɛ̨nį, ka wɔ hvɛli woo háálai, da Jesus Kristə nwɔ Kilii háálai. 20Yɛ bələi ɲɛ̨́i kaa la dɔwɔ a nwalawalaa, gílitɔɔ la mą, və́ pai nwumɛ̨i, kəlee, nwɔ́ kilitɔɔmąą laa kaa kpɔlɔɔ ɲee tɔ̨nɔ̨ mɛ̨i, yiihu, ə mą kɛ, a yələ kəlee, Kristə laa kaa pai tɛi ŋą́ yɛnɛ̨ɛ̨ hu, a pɛli ə kɛ, vúlú kɔwɔ ɲą, awala kɛ tii, a ɉáá mɛ̨nį. 21Mąąhɔlɔɓo, ŋą́ kɛ vúlú kɔwɔ ɲą, nwɔ́ yɛnɛ̨ɛ̨ ɓaa a Kristə, ŋį́ haa, yili kaa mą́ą́ a tɔ̨nɔ̨ kɛnɛ̨ɛ̨. 22Kɛlaa, akɛ ŋą́ lɛɛ yɛnɛ̨ɛ̨, ŋą́ pɛli kólo lɛlɛɛɠaa kɛi, ɲą́ą́ hvə ŋą́ níiɓa həɠə. 23Gáá mɛ̨nį hveelɛ lɔwai: gáá bɔ ŋį́ li Kristə pɔ, ɛlɛɛ, yili kpɔ ɓə nwɛli kaa mą́ą́. 24Kɛlaa, ŋį́ lɛɛ nwɔ̨nɔ̨ yɛnɛ̨ɛ̨, yili lɛlɛɛi lɔ nwɔ̨nɔ̨ ka mąą mɛ̨nį ɓa. 25Yili ɓa, gílí la teɛi gɛ́ diɛ, gáá pai lɛɛi ɓɛ ka kəlee ka pɔ; ə gɛ, ka wɔ kwəinɛ̨ɛ̨ da ka wɔ laa na laa di tɛ tɔwɔ. 26Yili ɓa, ŋą́ pənə ŋą́ pa ka pɔ, gáái ká mo, mąąwiɛlaai ká yəi Jesus Kristə hu, da yɛ pɛlɛ mą.

27Yii lɔ mą, ya ɓaa: 'ká wɔ yɛnɛ̨ɛ̨ kɛ pələ ə pɛli Kristə nwɔ wɛlɛɛ lɛlɛɛi pɔ yííɓoi. Yili ɓə a gɛ, ŋą́ pa ka pɔɔli-o, və́ pa ka pɔɔli-o, ŋą́ pɛli woo lɛlɛɛ mɛ̨n ɉii, yɛ hvilɛn na káá, diɛ kɛ: Ká kwəi kaa tanɔ̨n, káá gɔ tɔ̨nɔ̨i kɔ, a ká laa pələ nwɛlɛɛ lɛlɛɛ la; 28'ká hvo nɛɛ laa ka yowoɠaa di hvo ka mąą ɲɔw mɛ̨nį ta hu, yili a di kili pu ɉu, diɛ, di kaa nwun na pili pələ mɛ̨i, kɛlaa ka wɛi, ə ɓo a ɓalo pələ. Yili a həɠə Yálá pɔ. 29Mąąhɔlɔɓo, Yálá háálai ɓə ka kɛ la a Kristə nwɔ tínuą, ka laa mɛ̨nį na yaa tɔ̨nɔ̨ lɔ hvəə, kɛlaa, ə gɛ ka mɔ̨nɔ̨ mį́į́ mąą mɛ̨nį ɓa. 30Gɔ́ tɔ̨nɔ̨i ŋɛ̨i ká gáá gɛ́ gɔ́i, ɛlɛɛ, ká kili ə ɓo ɉu, káá, gáá ni mąi, káá kpɛli ká da kɔ́.

Currently Selected:

Filipə 1: BKPDCG

Highlight

Copy

Compare