Hebreu 11
11
Laa na laa
1Laa na laa ɓaa: Mɛ̨nįi nu ɲɛ̨i hvo mą, ə́ kilitɔɔmą, yɛ́ kɛ gaa kɛa ə́ yəi, a kpaaləi yá mɛ̨nį kili kɔlɔn na a tɛ̨ą, ə́ ɲɛ̨i hvo mą. 2Yaa ɓə wɔlɔ gɛ, gu nąnni pɔlɔɠaa diɛ kɛla hvaa lɛlɛɛ hɔlɔɓo.
3Laa na laa háálai ɓə, gu gɔlɔn na guɔ kɛ, Yálá ə yɛnɛ̨ɛ̨ pɛli a naa woo, hɛnŋaai kaa hvo kɛ diɛ, diɛ hvo kulɔ li, yiiɠaa kaa hvo diɛ, ɉu.
4Laa na laa háálai ɓə gɛ, Abɛlə yɛ haláá lɛlɛɛ kulɔ la Yálá ɓa, ə tɛɛ la Kain nwɛi ɓa. Laa na laa háálai, di mąą kɛla hvaa lɛlɛɛ ɓo, diɛ mą: Dələnmoɔi kɛ. Mąąhɔlɔɓo, Yálá kpinįi ə ɲee hee nwɔ haláá hɛn mu. Abɛlə nwɔ laa na laa mąą mɛ̨nį ɓa, bələi mąn, aa haa la, a kɛ lɔ nii hvaai.
5Laa na laa háálai ɓə gɛ, Yálá ə Henɔkə həɠə, hvo haa kaa, nu ta hvo kɛa gaa yili pulu. Gbala ə tɔɔ, Yálá ə ɉəɠə. Gɛɛ di hvo ɉəɠə, di mąą kɛla hvaa ɓo, diɛ mą: ə Yálá liihon. 6Yaan, a kɛ laa na laa hvəə, nui lɔpee ta hva pɛli Yálá liihon ɉi; mąąhɔlɔɓo, nui a kɛ mąąlɛɠɛi Yálá ɓa, mąąnɛ̨ɛ̨ ə laa na yɛ, Yálá kaa laa, ɛlɛɛ, nuą da gwɛli, a di hvɛla kulɔ.
7Laa na laa háálai, Noe ə nwəli tɔɔ, Yálá ə pələ ɓo mą, yɛ hvilɛn na mɛ̨nįɠaai pai kɛi, yai nu hva gaa, mąą mɛ̨nį ɓa. Ə Yálá woo kaa a tɛ̨ą, ə kələn da bɛli, yɛ pɛli ɲəi bɛlɛ́n nuą ɓaloi. Bələ ə yɛnɛ̨ɛ̨ kəlee nwun na pili la, ə kɛ a tələnmolaai a hɔlɔɓo laa na laa hu, ŋą kwɛlin ɉəɠəmun.
8Laa na laa háálai, Abrahamə ə Yálá woo mu hon, ə lɛɛ nwoo mu, ə həɠə, ə li lɔi ta hu, yai gaa pai ɉɔlɔɓoi a gwɛlin, ɛlɛɛ, yɛ li, ɓɛimun gaa lii laa hvo nąą kɔlɔn. 9Laa na laa háálai, ə pa, ə hee nwɛ̨ą lɔi hu, ɓɛi di nąą laakwɛlanmo mą; di kɛ lɔ həɠə-kələɠaa mu, yaa da Isaakə, ɛlɛɛ Ɉakɔbə, a diɛi tii kɛ a mɛ̨nį laakwɛlanmoɔ ŋą kwɛlin ɉəɠə nuą. 10Mąąhɔlɔɓo, taai dɔɔ mun, da ɲɛlɛkɛmun gaa a Yálá kpinįi, ya ɓə Abrahamə ə kɛli mąąkpɔn.
11Laa na laa háálai ɓə gɛ, Sara yaa kpɛlimąn, bələi mąn bɔlɔɔ kɛ la, ə lon ɉɔlɔɓo, mąąhɔlɔɓo, nui mɛ̨nį laakwɛlanmo diɛ, ə laa na, yɛ, a kulɔ nwoo ɓa. 12Yili ɓə gɛ, nu tanɔ̨n gbən, yai haa ə kɛ bulu, ə lon gbulu tamąą kaa, di kpulu hu kɛnɛ̨ɛ̨ ə ɓo yɛ, yələkɔlɔn ɉu pɛmɛ̨lɛ̨n-gɔw da gboloyá kwɛlɛ ɲɛ̨ą kɔw.
13Nuą ti kəlee di lɛɛ laa na laa hu, di haa, mɛ̨nįɠaai di naakwɛlanmo diɛ, di hvo naa honŋąą kaa li. Kɛlaa, ə mą kɛ tii, di gaa kwɛaala, di nɛ̨nɛ̨ɓo, di di kpɔwɔ kɔlɔn a nwɛ̨ąą, da hiɛ kulɔ nuą ɓɛ lɔi mɛ̨i. 14Gbala ə tɔɔ nuąi da hvaa tii, da nɛ kpɔ a ɉu ponoɔ diɛ, di kaa di hee lɔi kwɛlii; 15ɛlɛɛ, akɛ ɓɛi di həɠə laa nąą kili ə lɛɛ di ɲą, də li kɛ pənə di pulu. 16A tɛ̨ą, lɔi yii viɛlaɓoɔ, yai gaa yələkɔlɔn ɉu, ya ɓə di kɛli gwɛli. Yili ɓə gɛ, Yálá hva nwumɛ̨ naa heei a di wɔ Yálá, hvó gai, aa taa nįnɛ̨ ta tɔɔ, a di wɔɔ.
17Laa na laa háálai, Abrahamə hukɔɔn di mo, diɛ mą ə Isaakə kulɔ a haláái, ə non gɔw tanɔ̨n tii kulɔ a haláá, ya pa, daa gbɛa kɛ mɛ̨nįɠaa laakwɛlanmo mą, 18ɛlɛɛ, diɛ kɛ mą: «Isaakə pɔ pələ ɓə, ə́ huwu kaa pai ɓɛlɛi la.» 19Abrahamə ə kɛli kɛ gbɔwɔ ɓa; nu ə mą haa, Yálá a pɛli nwun ɉi; yili ɓə gɛ non ə pənə ə lɛɛ ɲəi, yɛ a nwun yɛ kulɔ haa yəi.
20Laa na laa háálai ɓə nwɔ̨nɔ̨ gɛ, Isaakə ə lúwɔ́ tɔɔ Ɉakɔbə da Esau diɛ, di tinąą mąą mɛ̨nį ɓa.
21Laa na laa háálai, Ɉakɔbə kɛɛ pai laai nąnni kwɛlɛ, ə lúwɔ́ too Ɉosɛfə nonnii tɛitɛi ɓa, ə nwɔ túnwɔ̨n hvilɛn, ə gwɛli hvilɛn Yálá ɓa.
22Laa na laa háálai, Ɉosɛfə kɛɛ pai lii nąnni pɔ, ə Israɛlə lonni kulɔ mɛ̨nį Eziptə lɔi hu, mąą mɛ̨nį ɓo, ɛlɛɛ, a haa, bələi mąąnɛ̨ɛ̨ di gɔw mąą mɛ̨nį kɛ la, ə mo diɛ.
23Laa na laa háálai ɓə gɛ, Moisə hɔlɔɓoɔ, gaa-nuą di noo ɲąnįn ɉaaɓa yee mu. Mąąhɔlɔɓo, di di lon nɛlɛɛi kaa, ɛlɛɛ, di hvo ɲɔw tɔɔmun nwɔ tɔ́n ma.
24Laa na laa háálai, Moisə kɛnɛ̨i ə mo, hvo hvaa mą di hvo dəli a Faraɔn lon nɛ̨ɛ̨nu, lon. 25Hvo hvaa mą, hvo niiɓa kɛ nɛ̨ŋɛ̨n ɉu kpɛli tiikpə, kɛlaa yaamun, ə hvaa mą da Yálá nwɔ nuą di mɔ̨nɔ̨ mįi gee pɔ. 26Ə Kristə ŋą mɔ̨nɔ̨i kaa a hɛn viɛlaɓoɔ ə tɛɛ Eziptə hɛn gɔw ɓa. Mąąhɔlɔɓo, ɲɛ̨i heɛi kɛ hvɛla kulɔ ɓa.
27Laa na laa háálai, Moisə ə həɠə Eziptə lɔi hu, hvo ɲɔw tɔɔmun ŋą lííholi ɓa, ɛlɛɛ, ə tɔɔ kpąą, yɛ ɲɛ̨i a kɛ nui hva kaa, mą. 28Laa na laa háálai, ə pakə hɛli pu, ə ɲąmą hiɛ gbonŋaa mɛ̨i, ə gɛ Nwun na pili kɛmun hvo pa túnwɔ̨n Israɛlə lon dɔlɔɔɠaa diɛ.
29Laa na laa háálai ɓə, Israɛlə lonnii di gboloyá kpɔlu teen na a di kɔ́wɔ mąą kpalaa, ya pa, Eziptə nuąi kɛ bɔ di ɉukɔɔn, ɲá ə di mɛ̨i kpulu.
30Laa na laa háálai ɓə gɛ, Ɉeriko mąąkpɛ hį́iɠaa diɛ too, di kpɛɛ a daa mąątínɛ̨nŋąą a hvóló mɛ̨ihveelɛ. 31Laa na laa háálai, Rahabə kɛ a wɛlikɛnɛ̨ɛ̨nu, da kwɛli tee nuąi di nwun na hvo pili a gee; mąąhɔlɔɓo, ə ɲee hee gɔ́ nɛ̨lɛ̨ɛ̨nŋaa mu a nɛlɛɛ.
32Lə mɛ̨nį kpɔ ɓə nwɔ̨nɔ̨ kɛa ŋą́ pɛli moi? Lɔwai hvo ɲə́i, gɛ́ pɛli mɛ̨nį tamąą huyɛɠɛi káá, yɛ bələi: Zedeɔn mąą mɛ̨nį kaa la, Barakə, Samsɔn, Ɉɛfte, Davidə, Samuɛlə da Yálá kwəi mɛ̨nį hukulɔ nuą, 33a diɛi, laa na laa háálai, di yee ə tɛɛ tɔɔ lɔi tamąą ɓa, di tələnmolaa pɔ túwɔ́ ɓo, di mɛ̨nį laakwɛlanmoɔɠaa kaa, di laa yɛ hon, diɛ yalaɠaa laaləi hon, 34diɛ nwɔ̨n gbɔluɠaa luwun, diɛ kulɔ ɓɔwa kwɛaaɠaa yee mu, diɛ kulɔ ɲɔ̨n nwalawalaɠaa hu, diɛ kuláálaa kɛ kɔ́ hu, di yee yɛ tɛɛ kɔlaɠaɠaa diɛ. 35Laa na laa háálai, nɛ̨ąąi di wɔ nuą daa kɛ haa, diɛ pənə diɛ nwun.
Kɛlaa, nu taɠaa diɛ hvaa mą, diɛ di mɔ̨nɔ̨ɓo, diɛ di paa, ə gɛ, di pa yɛnɛ̨ɛ̨ hva kpɛɛ hɔlɔɓo di nwunŋąą pulu. 36Daɠaa, diɛ di liikpələ yɛlɛkulɔɉu mu, da hvaɠa, diɛ daɠaa yili a yɔwɔn, diɛ daɠaa too gaho ŋą; 37diɛ daɠaa hɔɔ a kwɛni diɛ haa, diɛ daɠaa hutee a gbɛa haɠa, diɛ daɠaa paa a ɓɔwa kwɛaa. Di kɛ lɔ tii kɛa lɔi mɛ̨i diɛ tɛɛ, ɓɛlaa kɔ́lɔ da ɓooli kɔ́lɔ ɓə kɛ a di mąąhəɠəɠaa, di ɓo a yeehvowolo nuą, diɛ di mɔ̨nɔ̨ɓo, diɛ di hon a ɲɔ̨nwɔ̨ɔ̨, 38diɛi tii, ɲɛnɛ̨ɛ̨ ŋɛ̨i hvo kɛ a di wɔɔ, di kɛli lɔ li di nwun ma nɔi pun ɉu, da ɲeeɠaa nwuɔ̨, diɛ ɓo kwɛni woloɠaa hu, da yaɓoloonŋaa pɔ.
39Di kəlee kpɔ, akɛ di kɛla hvaa lɛlɛɛ hɔlɔɓo di wɔɔ laa na laa háálai; bələi mąn ə kɛ la tii, mɛ̨nįi di naakwɛlanmo, di hvo naa honŋąą kaa ɓɛ lɔi mɛ̨i. 40Hvo gaai, Yálá ə mɛ̨nį lɛlɛɛ mąą kili tee gwəi nwɔ̨nɔ̨ a gu wɔɔ, ya ɓaa, mąą hvo nɛ̨ɛ̨li, di hvo həli mɛ̨nį kəlee laa kulɔi ɓa, gu tɔwɔ.
Currently Selected:
Hebreu 11: BKPDCG
Highlight
Copy
Compare
Share
Want to have your highlights saved across all your devices? Sign up or sign in
