Hebreu 10
10
Ɉaláá taanɔ̨n gbən tii ə nąą kulɔ
1Dɔn va pɛli mą, mɛ̨nį lɛlɛɛɠaai gaa pai, mąą mɛ̨nį ɲɛ̨i kulɔi kpɔ a neelee, gaa lɔ kɛ a nįnįn ɉu lɛ hɛn; yii dɔn ə kɛli ɉuhvɛli, ya ɓaa, ɉaláá huwu tanɔ̨n tii kaa gulɔ lɔ a kwɛlan gəlee, a gɛ pələ huwu tanɔ̨n. Yili ɓə gɛ, hva pɛli mą kɛ, nuąi da bɔ yíiɓo, di mąą mɛ̨nį ɲɛ̨i kulɔi a nɛlɛɛ, hvo naa kulɔ. 2Akɛ kɛ nuąi kɛli kwɛli hvilɛn tii, di wɔɔ nɛ̨ŋɛ̨nŋaa ə waa diɛ kpɔ tɛ̨ɛ̨-tɛ̨ɛ̨i, di hvo li di kpɔwɔ kaa kɛa a nɛ̨ŋɛ̨n ɉəɠə nuą, ɛlɛɛ, di hvo li haláá takpɛliɠaa kulɔ di wɔɔ nɛ̨ŋɛ̨nŋaa mąą mɛ̨nį ɓa. 3Kɛlaa yaamun, ɉalááɠaa tii pɔ pələ ɓə, di kɛi lɔ di wɔɔ nɛ̨ŋɛ̨n nąą kili toɔ di kpɔwɔ ŋą, a kwɛlan gəlee. 4Mąąhɔlɔɓo, niŋɛ̨ ɲąmą da ɓolu ɲąmą di hva pɛli nɛ̨ŋɛ̨nŋaa kulɔi nu ɓa.
5Yili ɓə gɛ, ɓɛlɔwai Kristə ə kɛi pa la yɛnɛ̨ɛ̨, ə mo, yɛ mą:
«Haláá hɛn da kɔ́ɓo hɛn lɔpee ta wɛli hva ə́ hon,
kɛlaa ə́ kɔlɔ ta tɛ mą́ą́.
6Haláá hɛn da gələn, nɛ̨ŋɛ̨n mąą hvaalɛɛ haláá hɛn, hvó da pɔ.
7Ya ɓə, ŋą́ kɛ mą:
Ɲą́ą́ ka, mąąhɔlɔɓo, Ŋą́ą́ kpɔ ɓə, mą́ą́ mɛ̨nį ɓoɔi ɉɛɓɛ́ hu:
Ŋą́ą́ pa, oo Yálá, ŋą́ ə́ liiɓa kɛ.»
8Kristə ə gbɛa kɛ mą: «Kɔɓo hɛn, haláá hɛn da gələn, ə mą kɛ, nɛ̨ŋɛ̨n mąąhvaalɛɛ haláá, da wɛli hvo kɛli yɛ́, da hvo ə́ lii hon ni.» 'Ká ká kiliŋąlaa mą, ɉaláái mąą mɛ̨nį kaa ɓoi, ya tii wɔlɔ dɔn ə kɛ yɛ, diɛ gulɔ. 9Ya ɓə a kɛ nwɔ̨nɔ̨ mą: «'Ə́ ɲɛ̨i hee, ɲą́ą́ ka! Ŋą́ pa, ə́ liiɓa kɛ mɛ̨nį ɓa.» Gwɛli hvilɛn bələ tɔlɔɔ tii ɓə ə pa ɉu pui, ə nįnɛ̨ hee gbanɲą. 10Yálá lii ɓai tii hu ɓə, Jesus Kristə ə gbɔwɔ kulɔ la a haláá, lɔ tii taanɔ̨n gbən, gu mąąhəɠə mɛ̨nį ɓa.
11Yii kpɔ, ɉaláá laa həli nuą tɛitɛi, di kɛi tɔɔ a yələ kəlee, diɛ haláá huwu tanɔ̨n gbən kulɔ lɔ, geemɛ̨i pɔlɔɔ-pɔlɔɔ, yai hva pɛli kpɔ kɛ nɛ̨ŋɛ̨n gulɔi nuą diɛ, 12Kristə nwɛi, haláá tanɔ̨n gbən mə ə gulɔ nu kanŋaa di wɔɔ nɛ̨ŋɛ̨nŋaa mąą hvaalɛɛ mɛ̨nį ɓa, ə hee Yálá yee lɛlɛɛ mɛ̨i pələ, a yələ kəlee mɛ̨nį. 13Gaa heeni laa, yɛ nąą mąąkpɔn, ə gɛ, di ɲɔwɔɔɠaa pɛlɛ gɔwɔ mu yɛ haɠa. 14Gbɔwɔ gulɔ lɔ tii ə mo a haláá taanɔ̨n gbən, nuąi a nwɛiɠaa, ə pɛli di mąąhəɠəi, di mąą mɛ̨nį ɲɛ̨i kulɔ a yələ kəlee mɛ̨nį.
15Dɛ̨ą ti ɓə Kili-Mąąhəɠɛɛ a kɛ nwɔ̨nɔ̨ nɛi guɔ. Mąąhɔlɔɓo, yii kɛa ə gbɛa mo, yɛ kɛ:
16«Mįnɛ̨i pai kɛi kwa diɛni ku yilii a mąą yələɠaa tii, ya ka:
Ŋą́ kɛli pa ŋą́ tɔnŋaai tɔɔi, di lii hu,
da di wɔɔ kiliŋąhiɛ hu ɓə gáá pai bɛ̨ɛ̨i laa.
Gu Nąmu ɓə mo!
17Ɛlɛɛ, di wɔɔ nɛ̨ŋɛ̨nŋaa da di wɔ túwɔ́ pələ ɲɔ̨nŋaa,
vá kɛa gílí lɛɛ di hu.»
18Yaan, ɓɛi mąąhvaalɛɛ kaa laa, nɛ̨ŋɛ̨n mąą haláá kulɔ mɛ̨nį hvo kɛa laa.
Kristə pɔ yíiɓo pələ
19Yili ɓa tii, ną́n nonnii, kilitɔɔmąą laa walawala kaa kani ká gu yəi, guɔ pɛli lɛɠɛi la, gɛɛnąą mąąhəɠɛɛ hva-hva ɓa Jesus ɲąmą háálai. 20Pələ nįnɛ̨ hvúlúmąą ka tii kani kɛa gu yəi, yai ə nįnɛ̨ kulɔ ɉəɠə ɓɛla hu pələ, mukulaa ɓaa, gbɔwɔ kɔ́lɔ pɔ pələ. 21Haláá laa həli mun gɛnɛ̨ɛ̨ kaa ka gu yəi, yai heeni Yálá nwɔ pɛlɛ́i nwun na. 22'Ká gu gu mąąlɛɠɛ kani laa, a gu kwəi kwɛlɛɛ, laa na laa kpɔ-kpɔ hu, a gu lii hu ɲąŋąą, hɔn ɲɔ̨n da hvo gu kili pɔ, gu mąąwaa a yá mąąhəɠɛɛ. 23Gu hvo kpɛlin, 'ká gu kɛ lɔ gu wɔɔ kilitɔɔmąą woo laa həli a yələ kəlee, mąąhɔlɔɓo, nui ŋɛ̨i mɛ̨nį laakwɛlanmo guɔ, a kulɔ nwoo ɓa. 24'Ká gu gu keeni mɛ̨ikaa, guɔ gu kee lii muhəɠə wɛlikɛmąą laa pɔ pələ, da mɛ̨nį lɛlɛɛ kɛɛ. 25'Ká gu hvo kpɛla gu kee ɲąąkpɔnŋąą ɓa, yɛ bələi, nu taɠaa daa gɛ la a di kɛ-mɛ̨nį, di hva pa ŋąąkpɔn ɉu. Kɛlaa yaamun, ka gu gu kee hvaŋąlɔ, yii kpɔ, gu ɲɛ̨i kaa gu Ną́mu ŋą kuui tɔwɔ mąą yɛ kpuɔ.
26Mąąhɔlɔɓo, guɔi gwaa tɛ̨ą leelee kɔ́lɔn, gwa gili, gwa nɛ̨ŋɛ̨n ɉəɠə, nɛ̨ŋɛ̨n mąą hvaalɛɛ haláá kulaa takpɛli hvo kɛa laa. 27Kɛlaa, yii lɔ a kɛ laa, ya ɓaa, kítí wala wala da nwɔn gbɔlu yɛhɛ yɛhɛi, gaa nuąi daa di kwɛli tee, di mąą kpɔn ɉii. 28Nu ta a Moisə ŋą tɔ́n gala kɛ, nu hveelɛ ɉaaɓa di mąą kɛla hvaa ɓo, kɛlɛi di hva mąą nu mąąwɛlikaa, da baa-e? 29Gu hvomun kɛ, nui a Yálá lon mąą mɛ̨nį too gɔwɔ pɔ, mįnɛ̨ nįnɛ̨ ɲąmąi ŋɛ̨i pu, nɛ̨ŋɛ̨n nwaa mɛ̨nį ɓa, ə yili hviiɓo, ə ɓáá kulɔ nɛ̨ɛ̨laai a həɠə Kili-Mąąhəɠɛɛ pɔ, mą, ká wɔɔ kwəi, ŋą mɔ̨nɔ̨i hva kɛnɛ̨ kpɔ ə tɛɛ gɛi ɓa? 30Nui ŋɛ̨i kɛ mą: «Ɲą́ą́ ɓə ŋą́ nwąną kulɔ kɛ, ŋą́ą́ ɓə ŋą́ mɛ̨nį kwələ kulɔ!» Gu gɔ́lɔn, ɛlɛɛ, nwɔ̨nɔ̨: «Gu Ną́mu ɓə pai ŋą nu huwui kiti teei.»
31Mɛ̨nį kpɔlu ɓaa: Nu ya too Yálá hvulúmąą yee ŋą.
32Kɛlaa, ɲələi ka ka yee hee la kɛɛ pono mui, 'ká ká kili lɛɛ ɉu, ə kɛ lɔ tii, káá mɔ̨nɔ̨ɠaa mįi, káá kɔ́ɠaa kɔ́, 33da a kɛ, diɛ ka lalan nu kpulu hu, diɛ ɓáá kulɔ káá; nuąi di kaa di mɔ̨nɔ̨ɓoi tii, káá di mąą liihɛlɛn ɉee. 34Nuąi kɛ gaho ŋą, kaa di mąą lii hɛlɛn ɉee, diɛ ká kwɛlinŋaa kulɔ ká yəi, ká kwəinɛ̨ɛ̨. Mąąhɔlɔɓo, ká gili gɔlɔn káá: Hɛn gɔw ta kaa ká yəi, viɛlaɓoɔ, kpɛɛ hvo mą. 35Ka hvo lɛ̨ą ka wɔ kilitɔɔmąą laa ɓa, hvɛla kulɔ kɛnɛ̨ɛ̨ kaa ɉu. 36Liikpələ laa kpɔ ɓə ká mąąkpaan gaa mą, káa pɛli Yálá liiɓa kɛi la, ɛlɛɛ, káá pɛli mɛ̨nį laakwɛlanmoɔ pɔ mɛ̨nį hɔlɔɓoi la.
37«Mąąhɔlɔɓo, kpɔlɔɔ tíikpə, kpɔlɔɔ a lɔwai hukpua,
nui pai, yɛ pa həlii guɔ, hvo pai mąą yíi.
38Nwɔ́ɔ́ tələnmomun, a yɛnɛ̨ɛ̨ kɛ laa na laa háálai,
kɛlaa, a tinɛ̨n, a bulu tɔɔ mą, gwə́i hva kɛa nɛ̨ɛ̨ bɔ.»
39Gu nwɛi, gu hvo yɛ nuąi daa pənə, daa di pulu tɔɔ, di nwun pili mɛ̨nį ɓa, kɛlaa, gu kaa a laa na nuą, gu nįį nwun mąąɓo mɛ̨nį ɓa.
Currently Selected:
Hebreu 10: BKPDCG
Highlight
Copy
Compare
Share
Want to have your highlights saved across all your devices? Sign up or sign in
