Galatə 6
6
Ka ka kee ni nwuɔ̨ tiɛ̨ həɠə
1Ną́n nonnii, ká ká ɓɛlan da hon mɛ̨nį ɲɔ̨n ɉu, káái Yálá nwɔ Kilii kaa ká yəi, 'ká vilɛn bələ ɓa a liinɛ̨ɛ̨ gwəi laa. 'Ə́ kpɔwɔ mɛ̨ikaa, ɲąąhɛn mɛ̨nį hva mɔ̨ɔ̨ pɛli həlii yɛ́ kpɛli yɛ́? 2'Ká ká keeni nwuɔ̨ tíɛ̨ həɠə, káá Kristə nwɔ tɔ́n pɔ yíiɓo la tii. 3Mąąhɔlɔɓo, akɛ nu ta a gbɔwɔ kaa yɛ nu walawala, ya pa, yaan hvo a hɛn da, gaa gbɔwɔ ɓowoi. 4Kɛlaa, nu kəlee ə gbɔwɔ túwɔ́ pələ mąą kpɛɛ, a ɲɛ̨i pono mɛ̨nį nwun gaa, ə gaa lɔ gbɔwɔ kpinį hu hva kɛ mɛlaa mąą mɛ̨nį hu. 5Mąąhɔlɔɓo, nu kəlee tiɛ̨ kaa gbɔwɔ nwuɔ̨.
6Nui di kaa mąąkwɛli Yálá laa woo ɓa, mąąnɛ̨ɛ̨i, ə kpɔnmąą tɛɛ mąąkwɛlimun bɔ a ɲəi hɛn nɛlɛɛmun.
7Ká hvo ká kpɔwɔ ɓowo, Yálá hva hvaamą, nu hvo yɛlɛkulɔ ɉu, gbala ə tɔɔ, hɛn nu a ɉin, ya ɓə a dɔlɔ hɔlɔɓo. 8Nui a gbɔwɔ kɔlɔ lii ɓa hin, kɔlɔ liiɓa hɛn mə a ɉɔlɔɓo: ya ɓaa, a haa. Kɛlaa, nui a Kili-Mąąhəɠɛɛ liiɓa hin, Yálá liiɓa mɛ̨nį ɓə a ɉɔlɔɓo: ya ɓaa, a ɓaloi hva kpɛɛ. 9'Ká gu mɛ̨nį lɛlɛɛ kɛ, gu hvįi hvo kpɛɛ; mąąhɔlɔɓo, gwa wala tee mą, ɲələ a pa ɉəlii, gwa dɔlɔ hɔlɔɓo. 10Yili ɓa, yii kpɔ gu kaa nii gu hvulú kɔwɔ ɲą, 'ká gu kolo kɛ, dɔlɔ ə həli nu kəlee ɓa, gəlee ə mą kɛ, nuąi di lɛɠɛɛ guɔ, laa na la hu.
Liɛwoo kpəli da Túwɔ́-woo
11Ɉɛɓɛ́ kɔ́w kpɛa-kpɛaai ŋɛ̨i, ká gaai, ɲą́ą́ gbínįi ɓə bɛ̨ɛ̨ a gbɔ́kpɔɔ yee. 12Nuąi ká hɔlɔhimą ɓoi diɛ hvo kɛ li di ká hee kɛ́nɛ̨ ɓai, diɛ ɓə di kaa bɔ nuą di di mąątɛ̨nɛ̨; yii lɔ di kwəi ya ɓaa, di hvo mɔ̨nɔ̨ mįi Kristə nwɔ kolowaai mąą mɛ̨nį ɓa. 13Nuąi ti di kpɔwɔ heei kɛ́nɛ̨ ɓa, di hva dɔ́n nwoo pɔ yíiɓo diɛ kpinįi, di kaa bɔ di ká hee kɛ́nɛ̨ ɓa, ə gɛ, di di kpɔwɔ ɲąą kɛnɛ̨ la ká mąą mɛ̨nį hu, diɛ kɛ mą: kuɔ ɓə di hee kɛ́nɛ̨ ɓa. 14Nwɛ́i, ŋą́ kɛ ŋą́ gbɔ́wɔ́ ɲąą kɛnɛ̨, ŋą́ gbɔ́wɔ́ ɲąąkɛnɛ̨ gu Ną́mu Jesus Kristə nwɔ kolowaai mąą mɛ̨nį hu. Kristə nwɔ kolowai háálai, ŋą́ą́ haa yɛnɛ̨ɛ̨ ɲɛ̨i ɓa, yɛnɛ̨ɛ̨ aa haa ɲɛ̨́i ɓa. 15Gbala ə tɔɔ, kɛ́nɛ̨-lon naa da kɛ́nɛ̨ kpolɔwa laa, tɔ̨nɔ̨ hvo da lɔpee hu. Yii lɔ tɔ̨nɔ̨ kaa mą, ya ɓaa: Yálá aa gu kɛ a nu nįnɛ̨ɠaa. 16Lúwɔ́ ə kɛ, nuąi di kaa hiɛi gbaaləi tii mɛ̨i, diɛ; ə kɛ lɔ tii, Yálá ŋą nu huwui kəlee ɓa.
17Ə həɠə yiihu ɓa, və́ bɔ nu ta hvo nwə́lii woo ɲąąnwąną, mąąhɔlɔɓo, gbɔlɔɔnŋąa ŋɛ̨i gaa gɔ́lɔ́ ɓa, da nɛ diɛ: Jesus nwɔ ɓaa a ɲą́ą́.
18Ną́n nonnii, gu Ną́mu Jesus Kristə nwɔ nɛ̨ɛ̨laa ə kɛ ká kəlee ká pɔ. Amįįną!
Currently Selected:
Galatə 6: BKPDCG
Highlight
Copy
Compare
Share
Want to have your highlights saved across all your devices? Sign up or sign in
