Efɛsə 1

Túwɔ́-woo

1Ɲą́ą́ Polə, Jesus Kristə nwɔ tímun, a Yálá liiɓa, gáá ɉɛɓɛ́i tɛɛ, nuąi Yálá aa di tolu, di laa mɛ̨nį ɓa Jesus Kristə la, diɛ; 2Gu Ną́n Yálá da gu Ną́mu Jesus Kristə di wɔ nɛ̨ɛ̨laa da di wɔɔ liilaa ə kɛ ká pɔ.

Nɛ̨ɛ̨laai ɲɛ̨n deei hvo mą

3Lúwɔ́ ə kɛ gu Ną́mu Jesus Kristə Nąn Yálá ɓa, yai aa yələkɔlɔn ɉu lúwɔ́ɠaa kəlee too guɔ Kristə hu. 4Kristə hu ɓə, Yálá ə gbɛa gu həɠə laa ɉu, gɛɛ hvo yɛnɛ̨ɛ̨ pɛli, ə gɛ, gu kɛ a nwɔ nuąi hɔn və diɛ, yaa ɲɛ̨i ɓa, wɛlikɛmąąlaa hu. 5Ə gbɛa gu həɠə ɉu, ə gu kɛ a nwɔɔ ɲąąkɔn nonnii Kristə hu, yɛ bələ nwɔ wɛlikɛmąą laa ə kɛ la bɔ; 6Ká gu Yálá mąmąɓo mɛ̨inɛ̨ɛ̨ kɛnɛ̨ɛ̨i aa gɛ guɔ nwɔ wɛlikɛmąą Lon ɉáálai, mąą mɛ̨nį ɓa.

7Non tii ɲąmą háálai ɓə, gu nwun mąą ə ɓo la, ɉáálai lɔ ɓə, di gu wɔ túwɔ́ pələ ɲɔ̨nŋaa mąą hvaa lɛɛ la, lɔ yɛ bələi ŋą nɛ̨ɛ̨laa hu kɛnɛ̨ɛ̨ la, gu pɔ pələ. 8Yálá ə gu pilɛ a ɲəi mɛ̨inɛ̨ɛ̨, a mɛ̨nį kɔlɔn gili, da kilikɛɲəi laa. 9Nwɔ loo mɛ̨nįɠaai a niiɓa, aa nɛ guɔ, a mɛ̨nįɠaai tii, ə gbɛa mąą kili tee gwəi, gbɔwɔ kpinį hu. 10Mɛ̨nį kəlee laa kulɔ ɲələ; gaa pai yələkɔlɔn ɉu hɛnŋaa da lɔi mɛ̨i hɛnŋaa ɲąąkpɔn ɉii nwun nąmu tanɔ̨n ɲee mu, ya ɓaa a Kristə.

11Yaa ti ɉu lɔ ɓə, gu gu wɔɔ nąą kɔlɔɓo laa, a nui a mɛ̨nį kəlee hee kpəlin na kɛ, a niiɓa, yɛ bələi ə gbɛa gu həɠə la ɉu. 12Guɔi gbɛa gu kilitɔɔ Kristə ɓa tɔwɔi, 'ká gu Yálá mąątɛ̨nɛ̨ wələ too.

13Yaa tii ɉu lɔ ɓə nwɔ̨nɔ̨, ká dɛ̨ą woo mɛ̨n na, yai a nwɛlɛɛ lɛlɛɛi a nu nwun mąąɓo, yaa ɉu lɔ ɓə nwɔ̨nɔ̨, ká laa na laa hɔlɔɓo laa, ɛlɛɛ, yɛ gɔlɔn ɉii kɛ káá, a Gilii ə naakwɛlanmo, yai a Kili-Mąąhəɠɛɛ. 14Gilii tii ɓə gaa a Yálá kwɛlin gu kaa pai ɉɔlɔɓoi, tɔlɔɔ, guɔ gu wɔɔ hɔlɔɓo naa tɛ́ mɛ̨ni da mąąwiɛ mɛ̨ni hu.

Polə nwɔ Yálá hvɛli woo

15Yili ɓə gɛ, ɲą́ą́ kpɛlimąn,, 'ká laa mɛ̨nį gu Nąmu Jesus la, da mąąhəɠə nuą wɛli la kɛ pələ ká yəi, yii kpɔ kɛa ŋą́ yili bələ mɛ̨n; 16vá kpɛla Yálá hɛɠɛɛɓoi ká mąą mɛ̨nį ɓa; gɛ́ ká mąą mɛ̨nįɠaa laa həli nwɔ́ hvɛli wooɠaa hu. 17Gu Nąmu Jesus Kristə nwɔ Yálá, Nąn, yai mąąwiɛlaa kəlee kaa a nwɔɔ, ə ká kɔ́ a mɛ̨nį hukpɛ kili, yɛ Yálá mąą mɛ̨nį hu pono ká ɲɛ̨i ɓa, káá pɛli gɔlɔn ɉii la a neelee; 18ə ká kili laaɓo nwɔ kɛɛ ponoi tɔwɔ, mɛ̨nįi ə ká təli mą, yai ká ɲɛ̨i kaa dɔwɔ, káá pɛli gɔlɔn ɉii, da nwɔɔ mąąwiɛlaa hu kɛnɛ̨ pələ, ya ɓaa, gwɛlin tii gaa ká kɔ́i ɉu, ka mąąhəɠə nuą; 19ɛlɛɛ, da nwɔ Hééɓolaa kɛnɛ̨i tii, ə ku mąą mɛ̨nį ɲɛ̨i kulɔ la, kuɔi ŋɛ̨i a laa na nuą, yɛ bələi lɔ ɉuwalawalaai la, da vaŋą kɛnɛ̨ pələ. 20Ə ŋą huwalawalalaa tii kəlee lɛ Kristə hu, a nwun ə mo haa nuą lɔwai, yɛ ɉee mamįiyee hu pələ yələkɔlɔn ɉu. 21Ɲąąwooɓo laa, Huwalawalalaa, Hvaŋą laa, Hééɓolaa, ɛlɛɛ, da laa huwui lɔpee, ɉeɛi kpɔ gəlee mɛ̨i; hvo lɔ a ɲɛnɛ̨ɛ̨ ŋɛ̨i hu mɛ̨nį, kɛlaa, ə mą kɛ, ɲɛnɛ̨ɛ̨ yii pai, ɉu. 22A tɛ̨ą, Yálá ə hɛn gəlee laa Kristə kɔ́wɔ mu, ə ɉee hɛn kəlee nwun mɛ̨i, ə gɛ a Yálá nwɔ kpɔn nwun ganįn, 23gbɔn tii ɓə a Kristə kpinį lee, a yai, Yálá kpinįi ə mąą mɛ̨nį laa kulɔi, ə bɛli ɉu, mɛ̨nį ta lɔpee hvo lɛɛ pulu.

Currently Selected:

Efɛsə 1: BKPDCG

Highlight

Copy

Compare