aan aaɓa 1
1
Túwɔ́-woo
1Ɲą́ą́i a nu pɔlɔ-pɔlɔ, ɲą́ą́ ɓə ɉɛɓɛ́i ŋɛ̨i tɛɛi Gaiusə ɓa, yai nwɛli kaa mą́ą́ tɛ̨ą ŋą kɛɛ pono hu. 2Nwɛ́likɛmąąmun, gɛ́, ə́ mąą mɛ̨nį kəlee hu ə nɛ̨ɛ̨, ə́ kɔ́lɔi ə pono, ə́ nįį ə kɛ lɔ tii nɛ̨ɛ̨ hu. 3Bələi tɛ̨ą mɛ̨nį aa too la pono ɲą, ə́ wɔɔ yɛnɛ̨ɛ̨ kɛ pələ hu, gu nąn nonnii taɠaa di pa ɓɛ, di ə́ mąą kɛla hvaa ɓo, yili ə gwə́inɛ̨ɛ̨ kpɔ kɛnɛ̨; ə́ kaa hiɛi tɛ̨ą kɛɛ pono hu. 4Yii kpɔ gwə́inɛ̨ɛ̨ kɛnɛ̨ɛ̨, ya ɓaa, nónnii kaa hiɛi tɛ̨ą kɛɛ pono hu. 5Nwɛ́likɛmąąmun, ə́ kaa tuwɔi yɛ́ bɛli ə́ wɔɔ laa na laa ɓa, a nąn nonnii hon yá mo a nɛlɛɛ, ə mą kɛ, nwɛ̨ąą. 6Da ə́ wɔɔ wɛlikɛmąą laa mąą kɛla mąą hvaa lɛlɛɛ ɓo gbɔn nonnii kəlee ɲɛ̨i ɓa. Yá kɛ gɛi a nɛlɛɛ, a di mąąkpɔnmąaɓoi yá mo di wɔɔ hiɛ mɛ̨nįɠaa hu, yɛ bələi mąąnɛ̨ɛ̨i la Yálá ɲɛ̨i ɓa. 7Mąąhɔlɔɓo, Naa mąą mɛ̨nį ɓə di hvilɛnŋąąi la ɉiɛi tii hu, di hvo hɛn da hon ni huwu takpɛliɠaa yəi. 8Guɔ kpɔ ɓə gu mąąnɛ̨ɛ̨i gu mąąkpɔnmąą tɛɛ nuą tii pɔ, ə gɛ, gu gu kpɔwɔ lɛ diɛ a dɛ̨ą tii mąą kóló kɛ nuą, yɛ diɛ.
9Ŋą́ hɛɓɛ tɛɛ gbɔn ma. Kɛlaa, Diotrefɛsə, yai gbɔwɔ tɛ mɛ̨nį tɔwɔ wɛli kaa mąi, hvo ku kɔlɔn ni. 10Yaan, ŋą́ pa pai, yaa tii woo ɲɔ̨n moi a ku laai, ŋą́ gɛmɛ̨nįɠaa too pono ɲą, ɛlɛɛ, yili hvo kpɛli nii hon ni, hva ɲee hee di mu, ɛlɛɛ, nuąi da kɛ di di yee hee di mu, ə kpɛ̨ąn ɉu, ɛlɛɛ, yɛ di kpɛ gbɔn ɉu. 11Nwɛ́likɛmąąmun, 'hvó mɛ̨nį ɲɔ̨n pɔɔ kɔɔn, kɛlaa, mɛ̨nį lɛlɛɛ pɔɔ kɔɔn. Nui a mɛ̨nį lɛlɛɛ kɛ, Yálá nwɛi ta li; nui a mɛ̨nį ɲɔ̨n kɛ, hvo Yálá kɔlɔn. 12Yii ɓaa Demetriusə nwɛi, nu kəlee da mąą kɛla hvaa lɛlɛɛ ɓo. Tɛ̨ą yaa kpinįi a kɛ mąą kɛla hvaa ɓoi. Ɛlɛɛ, kuɔ kpɛlimąn, kwa mąą kɛla hvaa ɓo, ə́ kili kaa ɉu, ku wɔɔ kɛla hvaa kaa a tɛ̨ą.
13Mɛ̨nį tamąą kaa kɛ gwə́i gɛ́ kɛ ŋį́ mo, kɛlaa, və́ bɔ və́ gəlee pɛ̨ɛ̨ a hɛɓɛ́-yá, da hɛɓɛ́-kpɔw, 14Mąąhɔlɔɓo, gáá bɔ ŋą́ pa ŋą́ ɲɛ̨́i too yɛ́, ɛlɛɛ, gu lono kɛ gee ɓa. 15Liilaa ə kɛ ə́ yəi! Gu ɓɛlaa diɛ ə́ tuwɔ ɓo.
Gu ɓɛlaani di kaa laa, ku gəlee tɛitɛi túwɔ́ɓo, nu kəlee da mɛlɛ.
Currently Selected:
aan aaɓa 1: BKPDCG
Highlight
Copy
Compare
Share
Want to have your highlights saved across all your devices? Sign up or sign in