aan veelɛ 1
1
Túwɔ́-woo
1Ɲą́ą́i a nu pɔlɔ-pɔlɔ, ɲą́ą́ ɓə ɉɛɓɛ́i ŋɛ̨i tɛɛi Bɛlɛ́-lee-nɛ̨ą tii di ɉəɠə ɉu#1 Bɛlɛ́-lee-nɛ̨ąi di ɉəɠə ɉu: Nu taɠaa da di kiliŋąhiɛ diɛ kɛ diɛ: Bɛlɛ́-lee-nɛ̨ąi di ɉəɠə ɉu da nonnii, yili mukulaa ɓaa: Yálá ŋą kpɔn ə ɉəɠə ɉu, da ɉu nuą. mą, da nonnii,
a yai nwɛli kaa mą́ą́ tɛ̨ą kɛɛ pono hu,
ɲą́ą́ danɔ̨n nɔ hvəə, nwɛli kaa mą́ą́,
kɛlaa yiiɠaai kpɔ tɛ̨ą kɔlɔnŋąą kaa di yəi diɛ kpɛlimąn;
2dɛ̨ąi gaa gu hu ɉáálai,
ɛlɛɛ, yai pai lɛɛi gu pɔ ɲɛ̨n deei hvo mą;
3Ną́n Yálá da Non Jesus Kristə di
nɛ̨ɛ̨laa, ɲɛ̨imąąwɛli kaa da liilaa tɛɛ ka gu pɔ,
tɛ̨ą da wɛlikɛmąąlaa hu.
4Ə́ lonnii taɠaa kaai ŋį́ mo, diɛ hiɛ tɛ̨ą kpaalə mɛ̨i,
yɛ bələi gu díɓo hɔlɔɓo la Nąn ɲəi,
yili ə gwəinɛ̨ɛ̨ kpɔ kɛnɛ̨ɛ̨.
5Yiihu kɛa, Bɛlɛ́-lee-nɛ̨ą,
və́ tíɓo nįnɛ̨ mąą mɛ̨nį pɛ̨ɛ̨i, gɛ́ dɛɛ yɛ́,
kɛlaa yii gaa kɛ gu yəi a gɔwɔ tɔɔ yələ, yaa lɔ ɓə,
gáá ɉu vɛlii yɛ́, 'ká gu gu keeni wɛlila kɛ,
6ɛlɛɛ, wɛlikɛmąą ɓaa:
Gu hiɛ yɛ bələi nwɔ tíɓoɠaa kaa la.
Díɓoi tii ɓə ká mąą mɛ̨nį mɛ̨n, a gɔwɔ tɔɔ yələ,
əgɛ, ká hiɛ gbaaləi tii hu.
7Mąąhɔlɔɓo, nu ɲąąhɛn nuą tamąą daa taɠa-taɠa yɛnɛ̨ɛ̨,
Di hvo laa li Jesus Kristə kɛ mɛ̨nį a nu, na.
Ya ka tii, a ɲąąhɛn kɛmun tii, a Kristə ɲowoi tii!
8'Ká ká kpɔwɔ mɛ̨i kaa káá kpinįi,
ə gɛ, ká hvo pa hvɛɠɛ a ká kɛ kólo dɔlɔ,
kɛlaa yaamun, ká ká hvɛla hɔlɔɓo kpɔ kɛnɛ̨.
9Nui lɔpee a mąą kwea mą
ɛlɛɛ, hvo lɛɛ li Kristə ŋą laa na pələi mɛ̨i,
akɛ tii, Yálá nwɛi ta hvə li.
Nui a lɛɛ laa na pələ mɛ̨i,
kɛ tii aa, Nąn da Non di hɔlɔɓo.
10Nu ta a pa ká pɔ,
hvo pa li a laa na pələ yili,
'ká hvo ká yee hee mu,
ɛlɛɛ, 'ká hvo kpɛli balúwɔ́ɲɛ̨n.
11Nui a balúwɔ́ɲɛ̨n,
kɛ tii aa ɲee lɔ nwɔ tuwɔ pələ ɲɔ̨n hu.
12Mɛ̨ni tamąą kaa kɛ gwə́i, gɛ́ ŋį́ mo káá,
kɛlaa, və́ bɔ, və́ gəlee kɛ hɛɓɛ́ laa ɲą a hɛɓɛ́-yá.
Gbala ə tɔɔ, gáá bɔ ɲą́ą́ gbini ŋą́ pa ká pɔɔli,
ŋą́ mo káá a nááləi,
ə gɛ, gu wɔ kwəinɛ̨ɛ̨i laa ə kulɔ.
13Ə́ mąąhalai di ɉəɠə ɉu#1.13 mąąhalai di ɉəɠə ɉu: Ə́ mąąhala, gbɔn ŋɛ̨i di kaa ɉɛɓɛ́ tɛɛi mą, da gbɔn ɉɛɓɛ́ tɛɛmun ə kɛ ɉu, di kɛ a laa na pələ tanɔ̨n mɛ̨i nuą., nonnii diɛ ə́ túwɔ́ɓo.
Currently Selected:
aan veelɛ 1: BKPDCG
Highlight
Copy
Compare
Share
Want to have your highlights saved across all your devices? Sign up or sign in
