Korɛntə veelɛ 9
9
Liɛwoo takpɛli yɛ hvilɛn na kulɔ-kulɔ hɛnŋaa mɛ̨nį hu
1Yii hvilɛn na kalan nɛai mąąkpɔnmąąɓo mɛ̨nį ɓa, ə mą kɛ kɛa və́ yili ta pɛ̨ɛ̨ li, və́ dɛɛ káá. 2Ŋą́ ka wɔ kiliŋąhiɛ lɛlɛɛ kɔ́lɔn, ɛlɛɛ, ŋą́ ɲɛ̨́i pono la Masedoanə lɔi hu nuą ɲɛ̨i ɓa; ŋą́ kɛ kɛi diɛ: Akaiə yee ɲąą pɛliɛi, gwɛlan dɔ̨nɔ̨ ka; ɛlɛɛ, ká wɔɔ tɔɔ a nwąnąi laa tii, aa kalan gbɔn damąą lii muhəɠə a nɛlɛɛ. 3Gáá gu nąn nonnii ŋɛ̨i tɔɔi ká pɔɔli, gbɔ́wɔ́ ɲąąkɛnɛ̨i gáá moi ká mąą mɛ̨nį hu, hvo pa kɛ a lɛɛ; ɛlɛɛ, yɛ bələi ŋą́ mo la, ká yee ɲąą ə kɛ kpɔ a bɛliɛ. 4Akɛ, Masedoanə nuą da lɛɛ bɔ́ kwa pa, ká yee ɲąą hvo pɛli li, gilitɔɔmąą laa lɛlɛɛ ti, mąą hvo pa pənə a ku nwumɛ̨ mɛ̨nį, gu hvomun kɛ káá kpɛli. 5Yili ɓə gɛ, ŋį́ gu nąn nonii huhvɛli, di pa ká pɔɔli ku tɔwɔ, di ka wɔ kpɔnmąą hɛnɠaa da ká wɔ nú-kpɔɔlaa hɛn, ká naakwɛlanmo, ká kpɔn gee ɓa, ə kɛ kpɔ a naa gwəi mɛ̨inɛ̨ɛ̨ kɛɛ, hvo kɛ, a kpaan mɛ̨nį kɛɛ.
6Ká kili ə pu ɉu káá: Nu a ɉin tiikpə, dɔlɔ tiikpə lɔ ɓə a ɉɔlɔɓo, ɛlɛɛ, nui a ɉin gɛnɛ̨, dɔlɔ kɛnɛ̨ lɔ ɓə a ɉɔlɔɓo. 7Nu tɛitɛi ə dɛɛ kani yɛ bələi a laa la a níi, hvo gɛ a ɲɛ̨i-yili, hvo kɛ a ganąn mɛ̨nį, gbala ə tɔɔ, nui a dɛɛ a gwəinɛ̨ɛ̨, ya ɓə nwɛli kaa Yálá ɓa. 8Huwalawala kaa Yálá yəi, yɛ pɛli ká yee laa hvɛɛi a mɛ̨inɛ̨ɛ̨ huwui lɔpee gəlee, yii mąąkpaan gaa káá, mɛ̨nį kəlee hu, a yələ kəlee, yɛ pɛli kɛi ká yəi; ɛlɛɛ, káá nwɔ̨nɔ̨ pɛli kóló lɛlɛɛ huwui lɔpee gəlee kɛi la.
9Yɛ bələi bɛ̨ɛ̨ la, yɛ mą:
«Aa ɲąąkwɛlɛ, yɛ mɛ̨inɛ̨ɛ̨ kɛ yeehowolonuą diɛ,
nwɔ tələnmolaa kaa a yələ kəlee mɛ̨nį.»
10Yaa tii ɓə, a hihɛn ɉuwu tɛɛ tíi-kɛmun bɔ, yɛ gɔ̨nɔ̨n bɛlɛ mą, yaa lɔ ɓə pai hihɛn ɉuwu tɛɛi ká pɔ, yɛ ɉu kɛnɛ̨, yaa ti lɔ ɓə pai, ká wɔ tələnmolaa má tamąi ɲą. 11Ká káá pai kɛi a hɛn nąmu a pələ huwu tamąą, hɛn damąą hu; Yálá hɛɠɛɛɓo woo yɛ tɛ bɔ pələ, ku háálai. 12Mąąhɔlɔɓo, ɲee ɲąąkpɔn daaləi ŋɛ̨i hvo lɔ a kristalɛa mąąkpɔnmąą ɓo mɛ̨nį, kɛlaa gaa a gu wɔɔ mɛ̨inɛ̨ɛ̨ hu kɔlɔn ɉɛɠɛɛɓoi, a tɛ Yálá pɔ pələ. 13Bələi kpɔ Ká káá la, ká wɔ mɛ̨inɛ̨ɛ̨i tii, a ká lɛ diɛ, diɛ mąąwiɛ tɛɛ la Yálá pɔ, a ká lɛɛ mɛ̨nį Kristə ŋą Wɛlɛɛ lɛlɛɛ woo mu, yai káá gaa a tɛ̨ą, da ká wɔɔ nú-kpɔɔlaa kɛ pələ, káá di kɔ, ə mą kɛ, nu kəlee, a ka yəi hɛn gɔw. 14Di kaa pai kɛi Yálá hvɛli ká mąą mɛ̨nį ɓa, diɛ di wɔ wɛlikɛmąąlaa kulɔ pono ŋą káá, mɛ̨inɛ̨ɛ̨ kɛnɛ̨i Yálá aa gɛ kaa mąą mɛ̨nį ɓa. 15Yálá mąmą ɉɛɠɛɛ, nwɔ mɛ̨inɛ̨ɛ̨i gɔɔn mąą hvo mą, mąą mɛ̨nį ɓa.
Currently Selected:
Korɛntə veelɛ 9: BKPDCG
Highlight
Copy
Compare
Share
Want to have your highlights saved across all your devices? Sign up or sign in
