Korɛntə veelɛ 8
8
Polə ə Korɛntə nuą hvaŋąlɔ kulɔ-kulɔ hɛn mąą mɛ̨nį ɓa
(Korɛntə dɔlɔɔ 16.1-4; Romə 15.25-27; Galatə 2.10)
1Ną́n nonnii, mɛ̨inɛ̨ɛ̨i Yálá aa gɛ galan gbɔnŋaa diɛ Masedoanə lɔi hu, ku kaa bɔ ku ɉukulɔ káá. 2Mɔ̨nɔ̨ huwu tamąą ə laa diɛ, kɛlaa di kwəinɛ̨ɛ̨ pələ kɛnɛ̨, di mɛ̨inɛ̨ɛ̨ kpɛa-kpɛaa kɛ, bələi mąn ti di kɛ la yeehvowolo laa hu. 3Di gɛ yɛ bələi di wɔɔ yee pɛlimąą laa kaa la, ɛlɛɛ, di gɛ ə tɛɛ di yee pɛlimąą mɛ̨nį ɓa, di gɛ lɔ tii di kpɔwɔ ɓa, ɲą́ą́ kpinįi gáá a yili mąą kɛla. 4Di ɉu hvɛli kuɔ a hvɔlɔmąą laa, əgɛ ku hvaamą, diɛ pɛli mɛ̨inɛ̨ɛ̨ kɛi Kristalɛa diɛ. 5Yii di gɛ, ə lanŋįn yii ku kili ə kɛ mą, mɛ̨i. Di gbɛa tɔlɔɔ di kpɔwɔ tɛɛ gu Nąmu pɔ, yili pulu, Yálá liiɓa hu, di di kpɔwɔ tɛɛ ku pɔ. 6Yili ɓə gɛ, ku nɛ̨ɛ̨mąą hvə Titə ɓa kpɔ a nwalawalaa, kuɔ kɛ ə nú-kpɔwɔlaa kólói tii laa kulɔ a nɛlɛɛ ká pɔɔli, yɛ bələi ə gɔwɔ tɔɔ la. 7Kɛlaa, yɛ bələi mɛ̨nį kəlee kaa la ká yəi kɛnɛ̨: Laa na laa, laa-kpan-ɉu tee, mɛ̨nį kɔ́lɔnŋąą, kwəinɛ̨ɛ̨ huwu lɔpee gəlee, da wɛlikɛmąąlaa yai ká ɉɔlɔɓo ku yəi; mąąnɛ̨ɛ̨ ká wɔɔ nú-kpɔwɔlaa hɛn, ɉu ə kɛnɛ̨ lɔ tii.
8Və́ moi yɛ ŋą́ kɛli tɔ́n naa ká mɛ̨i yili hu, kɛlaa, ŋą́ kɛi nu takpɛliɠaa kwəinɛ̨ɛ̨ pələ hukulɔ káá, gáá bɔ ká ká wɔɔ wɛlikɛmąąlaa lɛ kpɔ ɉu a neelee. 9Bələi gu Ną́mu Jesus Kristə ə mɛ̨inɛ̨ɛ̨ kɛ la káá, gbaɠala kaa káá, yaa ti kɛ a hɛn nąmu, ə gbɔwɔ kɛ a yeehvowolomun, ə gɛ, ká kɛ a hɛn nąmįną.
10Liɛwoo ka ti gáá dɛɛ ká pɔ yili hu: Hvo gaai, yili ɓə bɛliɛ káá, gwɛlan tɛɛ, káá ɓə kɛ a nu tɔlɔɔɠaa, gilii ti ə too káá, káá gɛ. 11Yiihu kani, 'ká ká yee laa kulɔ; a kɛ tii, mɛ̨nįɠaa káá mąą kili tee ká kwəi a nɛlɛɛ, naa a kulɔ ká yəi, yɛ bələi ká yee pɛlimąą mɛ̨nįɠaa kaa la. 12Nu kiliŋąhiɛ pələ a lɛlɛ kpɔ a neelee, da di yee hee mu, da hɛn gaa ɲəi, hɛn da awala nwɔ̨nɔ̨ kɛ ɲəi, mɛ̨nį hvo li!
13Və́ kɛli 'ká ká kpɔwɔ too kanąn ɉu, káá ká ɓɛlaa yee la hvoloon na, kɛlaa, mąąnɛ̨ɛ̨, ə pɛli a gee nu kəlee yəi. 14Yiihu ŋɛ̨i hɛn gaa la ká yəi kɛnɛ̨, ká ɓɛlaai hɛn və di yəi, 'ká di mąąkpɔnmąą ɓo; ə gɛ yələ ta, hɛn a kɛ di yəi kɛnɛ̨, di ká mąąkpɔnmąą ɓo. Yili ɓə a mɛ̨nį kəlee pɛli ɉu. 15Yɛ bələi bɛ̨ɛ̨i la, yɛ kɛ mą:
«Nui ɲɛɠɛ kɛnɛ̨, nwɛi hvo tɛɛ mɛlaa di wɛi ɓa,
nui ɲɛɠɛ tiikpə, nwɛi hvo hvɛɠɛ.»
Titə da nuąi mąąnɛ̨ɛ̨ di ɉiɛ kulɔ
16Yálá hɛɠɛɛ mąmą, yai ká mąą lii too Titə kwəi. 17Dəlii ku mo, ə ku woo mu hon, ə mąąhulɔ nwɔ̨nɔ̨ ə pa, ku dí, yɛ pa ka pɔɔli. 18Ku kaa dɔɔ da gu nąn non ŋɛ̨i galan gbɔn gəlee da kɛ dɛnɛ̨i nwɛlɛɛ lɛlɛɛ mąą mɛ̨nį hu. 19Ɛlɛɛ nwɔ̨nɔ̨, yaa ɓə galan gbɔn gəlee di di yee lɛ mą, ə kɛ ku pɔ, ku wɔɔ hiɛɠaai hu, nú-kpɔwɔlaa kólói ŋɛ̨i hu, a gólói ku kaa gɛi, gu Nąmu kpinįi laa mąąwiɛ mɛ̨nį ɓa, ɛlɛɛ, ku wɔ kiliŋąhiɛ lɛlɛɛɠaa pɔ mɛ̨nį yɛ kɛ.
20Kwá gɛ ti, di hvo nəi pa ku hvala, ɉɛn gɔw kɛnɛ̨i ŋɛ̨i mąą mɛ̨nį kaa ku nwuɔ̨, naahɔnmo mɛ̨nį hu. 21Kwa ku liihɛlɛn na, ə lɛɛ a nɛlɛɛ Yálá ɲɛ̨i ɓa, ə mą kɛ, nu kanŋaa ɲɛ̨i ɓa.
22Ku gu nąn non doo nuąi pai di pɔ, a yai yələ kəlee kwa nwɔ hvaŋąlɔlaa hu kpɛ, ɛlɛɛ, yaan vaŋąlɔɔi lɔ nwɔ̨nɔ̨ yiihu, mąąhɔlɔɓo, gilitɔɔi kpɔ káá kɛnɛ̨. 23Titə kaa a ɉíɛ gee pulu, gaa bɔ́, kwa yaa kuɔ kólo kɛ ka mąą mɛ̨nį ɓa. Ku nąn nonnii, galan gbɔn ŋą nu tɔɔɠaa ka ti, di kaa di wɔɔ mąątíi kɛi diɛ kpɛli Kristə mąąwiɛ mɛ̨nį ɓa. 24'Ká ká wɔɔ wɛlikɛmąąlaa lɛ kani diɛ a neelee, galan gbɔnŋaa ɲɛ̨i ɓa; ɛlɛɛ, ku kpɔwɔ ɲąąkɛnɛ̨i kwa mo ká mąą mɛ̨nį hu, 'ká nɛ diɛ, káá, tɛ̨ą kaa ku pɔ.
Currently Selected:
Korɛntə veelɛ 8: BKPDCG
Highlight
Copy
Compare
Share
Want to have your highlights saved across all your devices? Sign up or sign in
