Korɛntə veelɛ 12

Yálá ə mɛ̨nį ta too pono ŋą Polə ɓa

1Hvo kɛli mɔ̨ɔ̨ nu ə gbɔwɔ ɲąą kɛnɛ̨, ya pa, hɛn da hvo ɉu! Ɛlɛɛ yaan, gwɛlɛɛn gɛɛɠaai da mɛ̨nįɠaai gu Nąmu ə di lɛ mą́ą́i, ŋą́ą́ həli diɛ. 2Ŋą́ Kristə ŋą nu ta kɔlɔn, gwɛlan bow kɔw nąąn ga, kɛlɛ ə kɛ nu kɔlɔ hu, kɛlɛ hvo kɛ ɉu? Gbaɠala hvo mą́ą́, Yálá ɓə gbaɠala kɔlɔn! Nui tii, di dɛ kpɔ yələkɔlɔn mɛ̨i yələkɔlɔn ɉu. 3Ɛlɛɛ, gíli kaa ɉu, nui tii, kɛ ə kɛ nu kɔlɔ hu, kɛ hvo kɛ ɉu! Və́ gbaɠala kɔlɔn, Yálá ɓə gbaɠala kaa mą. 4Nui tii di ɉəɠə də li la Yálá-taa, ɛlɛɛ, ə wooɠaa mɛ̨n, nu hva pɛli moi, mąą laa hvo nu yəi, yɛ pɛli moi. 5Nui tii mąą mɛ̨nį hu, ŋą́ pɛli ŋį́ gbɔwɔ ɲąą kɛnɛ̨, kɛlaa, a kɛ lɔ ŋą́ hvįikpɛɛlaa hu. 6Ee! Ŋą́ kɛ kpɔ bɔ ŋą́ gbɔ́wɔ́ ɲąą kɛnɛ̨i, hva kpɛli kɛ a ɓowo mɛ̨nį, a kɛ kpɔ a tɛ̨ą; kɛlaa, ŋą́ gbɔ́wɔ́ huhon, ə gɛ nuą di hvo pa nəi mą́ą́ mɛ̨nį kɛnɛ̨, di hvo dɛɛ yii di kaa gaai ɲéé pɔ, mą; awala kɛ tii, dɛɛ yii di kaa mɛ̨n ɉii ná mą.

7Mąąhɔlɔɓo, mɛ̨nįɠaa tii di nɛ mą́ą́, ɉu kɛnɛ̨ pələ, bələ di tɛɛ la və́ pa nəi gbɔ́wɔ́ ɲąą kɛnɛ̨, di hɛn da lɔ gɔ́lɔ hu, di ɓilihi ŋą malaka ta tí, ə gɛ́lɛ, və́ pa nəi gbɔ́wɔ́ ɲąą kɛnɛ̨ a pələi lɔpee. 8Mɛ̨nįi tii hu, ŋą́ gu Ną́mu hvɛli geemɛ̨i haaɓa, ə gɛ ə ɉəɠə mɛ̨́i. 9Kɛlaa, ə nwóó ŋąą pənə yɛ mą́ą́: «Nwɔ́ mɛ̨inɛ̨ɛ̨ tii ə́ yəi, a pɛli; mąąhɔlɔɓo, nwɔ́ huwalawalalaa a too pono ŋą, ə́ wɔɔ hvįikpɛɛlaa tii hu.» Yili ɓa tii, nwɔ́ hvįikpɛɛlaa hu ɓə ŋą́ gbɔ́wɔ́ ɲąą kɛnɛ̨ la, ə gɛ, Kristə nwɔ huwalawalaa ə hee mɛ̨́i. 10Akɛtii kani, gwə́inɛ̨ɛ̨ mɛ̨nį ɓaa nwɔ́ hviikpɛɛlaa, lalanŋaa, wɛa mɛ̨nįɠaa, mɔ̨nɔ̨ɠaa, da liikələn gwəi a həli mą́ą́, Kristə mąą mɛ̨nį ɓa. Mąąhɔlɔɓo, vįi a kɛ a gbɛɛ, akɛtii ɉúwalawalaa li.

Korɛntə nuą mąą liihɛlɛn ə too Polə ɓa

11Ɲą́ą́ ka kani, ŋą́ą́ kɛ a ɓowo mun, káá ɓə gbáán gɛ́ kɛ la. Káá ɓə kɛ mąąnɛ̨ɛ̨ kɛ ká mą́ą́liɛwoo kɛ. Gbala ə tɔɔ, və́ a hɛn da hɔlɔɓo li a diikpɛɛ, ə tɛɛ la gɛla kpɛa-kpɛaa tii diɛ, bələi mąn və́ la a hɛn dai. 12Mɛ̨nįɠaai da gɛla kɔlɔn na, káá di kaa diɛ kɛ ɓɛ ká ɲɛ̨i ɓa, liikpələ ɲąąhɛn mɛ̨nį kəlee hu, kwɛlɛɛn mɛ̨nįɠaa hu, kpalo mɛ̨nįɠaa hu, kɛ mɛ̨nį walawalaɠaa hu. 13Lə mɛ̨nį kpɔ ɓə galan gbɔn yiiɠaa tii di ɉɔlɔɓo ə kɛnɛ̨ ə tɛɛ ká wɛi ɓa? Ə kulɔ lɔ, ɲą́ą́ gbinį lee, kɛi və́ mo ka nwuɔ̨ a tiɛ̨! 'Ka mąąhvaalɛɛ yili hu!

14Ŋą́ą́ gbɔ́wɔ́ pɛli yiihu, bá mɛ̨nį ɓa ká pɔɔli, a ɉaaɓanąn, ɛlɛɛ, və́ pai kɛi ka nwuɔ̨ a tiɛ̨. Mąąhɔlɔɓo, ká yəi hɛn vəi gáá gwɛlii, kɛlaa ká kpinį lee ɓə gáá bɔ. Lɛapɛlɛɛ hvəə da hɛnŋąa laaikɛ di kaa nuą mąą mɛ̨nį ɓa; kɛlaa, lon gaa nuą ɓə da di lonnii tɔwɔ hee. 15Ɲą́ą́ nwɛ́i, ŋą́ pɛli mą ŋą́ gbɔ́wɔ́ kwɛlɛ, ɛlɛɛ, gáá pai gbɔ́wɔ́ kwɛlɛi kpɔ tɛ̨ɛ̨tɛ̨ɛ̨? Ká mąą mɛ̨nį ɓa. Ŋą́ kɛli ká wɛlilakɛ tii, yili hva mɔ̨ɔ̨ nwɛ́li too kaa?

16Gaa kpɔ tii, və́ kɛ ká nwuɔ̨ a tíɛ̨! Kɛlaa gbąną ɓə ŋą́ mo, ŋą́ ká hon a gbąnąlaa. 17Nuąi ŋą kɛli di tɔɔ ka pɔɔli, ká dɔ̨nɔ̨ həɠə ɉu, ká gaa, nɛlɛ pɔ pələ ɓə ŋą́ kɛ la ká nwuɔ̨ a tíɛ̨? 18Ŋą́ Titə mąąnɛ̨ɛ̨, gɛ́ dɔɔ ká pɔɔli, da gu nąn non ti ŋą́ vaaɓoi, Titə ə kɛi mɔ̨ɔ̨ ká tɔlɔ kulɔ? Kili tɔnɔ̨ hvə kwa diɛni ku hiɛ la, kpaalə tɔ̨nɔ̨ mɛ̨i?

19Kɛlɛi, ɉu aa kwɛa, a kɛ ká kwəi, ku kaa ku kpɔwɔ nwun mąąkɔ̨nwɔ̨i ká ɲɛ̨i ɓa-e? Kpaa-o, Yálá ɲɛ̨i ɓa, Kristə hu ɓə ku kaa pələ ɓoi laa. Yili kəlee hu, nwɛ́likɛmąą nuą, ká hutɔɔ mɛ̨nį ɓə a mɛ̨nį lɛlɛɛ. 20Ɲɔw kaa ɉú, gɛ́ kɛ ŋą́ pa, və́ pa ká kaa yɛ bələ, gáá la bɔi; ɛlɛɛ, kaan káá gáá yɛ bələi ká la bɔ və́ kɛ la. Gáá ɲɔwi, kiti hvo pa kɛ ká lɔwai, tolo, lííholi, hvaa, laa kala, laa pələ ɓo, tɛɠɛɓo ɉu, da mɛ̨nį yɔhɔ-yɔhɔɠaa. 21Ɲɔw kaa ɉú, ŋą́ pənə ŋą́ pa, nwɔ́ Yálá hvo pa nwúmɛ̨ ká ɲɛ̨i ɓa, gɛ́ wɔlɔ nu tamąą mąą mɛ̨ni ɓa, a diɛi tii daa nɛ̨ŋɛ̨n ɉəɠə, ɛlɛɛ, di hvo di hɔn mąą hvalin ni, di wɔɔ wɛli mɛ̨nį, di wɔɔ túwɔ́ pələ ɲɔ̨n, da di mąąliɓi mɛ̨nįɠaa hu.

Currently Selected:

Korɛntə veelɛ 12: BKPDCG

Highlight

Copy

Compare