Korɛntə veelɛ 11

Polə da lɛɛ kɛlaɠaa di lɔwai kulaa

1Akɛ ká pɛli ká liikpələi tiikpə, nwɔ́ ɓowo hvaa ɓoɔ mui; yaan, a tɛ̨ą, hvo kɛli ká ká liilaa bɔ́! 2Ká wɛlii gaa mą́ą́, yili aa ká mąą tolo lɔ ɉú, nwɛlikɛmąąlaa kɛnɛ̨i tii ə həɠə Yálá pɔ. Hulɔnu tanɔ̨n gbən mə, ŋą́ ká toonwəlii kɛ mą, ya ɓaa a Kristə. Ŋą́ ká lɛ mą yɛ, nɛ̨ɛ̨gbəla mąą haŋąnŋąąi hvo hulɔnu mɛ̨nį hu kɔlɔn; 3Kɛlaa, gáá ɲɔwi, və́ bɔ ká wɔ kiliŋąhiɛ mąą hvo hvalin a ɲɔ̨nwɔ̨ɔ̨, hvo ka kulɔ Kristə nwɔ nɛ̨ɛ̨laa hu, yɛ bələi kaalə ə Ɛvə ɲąąhɛn na, a gbąnąlaa. 4Gbala ə tɔɔ, ká hvaa mą, nui lɔpee a tɔɔ, yɛ ká mąąkwɛli a Jesus takpɛli mąą mɛ̨nį, a Jesus ku hvo ta ká mąąkwɛli li a mąą mɛ̨nį. Awala kɛ tii, káá ká yee hee ka mąąkwəli woo takpɛli mu, a kilii ká hvo ta ɉɔlɔɓo li. Awala nwɔ̨nɔ̨ kɛ tii, di wɛlɛɛ lɛlɛɛ takpɛli laa həli káá, yii ká hvo ta ɉɔlɔɓo li kpɛli, ɛlɛɛ, káá ká yee hee mu a nwalawalaa.

5Ɲą́ą́ gwə́i pələ, və́ tíkpə li, və́ tɛɛ, gɛla kpɛa-kpɛaɠaa tii diɛ, a diɛi ká kili kaa diɛ. 6Ŋą́ gɔlɔn, náákpan ɉu hvo tee li mɛ̨nį ɓoi, kɛlaa, yii hvilɛn na mɛ̨nį kɔ́lɔn ŋąą ɓa, nwɛi gaa ɲə́i. Mɛ̨nį kəlee hu, a pələ huwu kəlee, kwaa yili kpaɠala lɛ káá.

7Akɛtii, mɛ̨nį ɲɔn mə tii mɔ̨ɔ̨ ŋą́ gɛi, gɛ́ gbɔ́wɔ́ mąąyɛɛ, gɛ́ Yálá ŋą wɛlɛɛ lɛlɛɛ laa həli la káá a mɛ̨inɛ̨ɛ̨, ə gɛ, káá kɛnɛ̨? 8Ŋą́ Yálá ŋą kpɔn dakpɛliɠaa yəi hɛnŋąa ɉon di yəi, gɛ́ kpɔnmąą tɛɛ la ká pɔ. 9Ɛlɛɛ, ɓɛlɔwai ŋį́ kɛ la ka pɔɔli, kpaan a hee kɛ mą́ą́, və́ kɛ laa li nu ta nwuɔ̨ a tiɛ̨, mɛ̨nį ta hu; mąąhɔlɔɓo, hɛn kpɔ mąą kanąn ə kɛ mą́ą́, gu nąn nonnii kɛi həɠə Masedoanə lɔi hu, di pa a gəlee bɔ́. Ɛlɛɛ, mɛ̨nį kəlee hu ŋą́ gbɔ́wɔ́ hu hon, və́ laa ká nwuɔ̨ a tiɛ̨ mɛ̨nį lɔpee ta hu, bələ lɔ ɓə gáá pai lɛɛi la. 10Kristə mąą tɛ̨ąi heeni ɉú, ɉáálai, gáá kpɔ moi gɛ́: Ɲɛ̨́i pono mɛ̨nįi gaa Akaiə lɔi hu, hva kulɔ ɲə́i. 11Lə mɛ̨nį ɓa? Akɛ tii, ká wɛli ɓə mɔ̨ɔ̨ hvo mą́ą́? Yálá ɓə gbaɠala kaa mą!

12Ɛlɛɛ, bələi ŋɛ̨i gáá gɛi la, bələ lɔ ɓə nwɔ̨nɔ̨ gáá pai gɛi, əgɛ, nuąi di kpɔwɔ mąątɛ̨nɛ̨ wɛlikaa diɛ, ŋą́ yili giliŋąhiɛ kulɔ di yəi, a diɛi da di kpɔwɔ kaa, yɛ kuɔ. 13Mąąhɔlɔɓo, nuąi ti di kaa a lɛɛ kɛlaɠaa, a lɛɛ nuąi, yá di kaa yɛ, Kristə ŋą kɛlaɠaa. 14Yili hva nu ta kwəi pili, mąąhɔlɔɓo, ɓilihi yaa gbɛlimąn, a kpɔwɔ kɛ yɛ kɛɛ pono malaka. 15Akɛ nuą tii da di kpɔwɔ kɛ yɛ tələnmolaa ŋą tínuą, yili hvo a kwəi pili mąą mɛ̨nį takpɛli. Di ɲąąkpɛɛi a kulɔ lɔ di kɛ kólo hu.

Mɔ̨nɔ̨ɠaai Polə ə mįi

16Gáá kpɔ pənəi ŋį́ mo, nu ta hvo giliŋąhiɛ, yɛ kɛ gáá a ɓowomun, a wala kɛ ti, ká hvaa kani mą, ŋą́ ɓowo, ɲą́ą́ gbɛli gɛ́ pɛli gbɔ́wɔ́ ɲąą kɛnɛ̨i tiikpə. 17Mɛ̨nįi gáá pai moi, və́ moi gu Nąmu nwɛi hu pələ, kɛlaa, yɛ a kɛ a ɓowo mɛ̨nį, gílaa ponoɔ, mɛ̨nįi gáá nwún dɛi la, ɉu. 18Yii nu tamąą da di kpɔwɔ ɲąą kɛnɛ̨ yɛnɛ̨ɛ̨ mɛ̨nįɠaa hu, ɲą́ą́ gbɛli, ŋą́ gbɔ́wɔ́ ɲąą kɛnɛ̨. 19Káámun a kilimąą nuą, ká naa ká kwəi, káá ká yee hee hupumąą nuą mu; 20Ká kɛ hvaai mą, diɛ ká kɛ a luwɔɠaa, diɛ ká mįi, diɛ ká mąąkpoloon, diɛ tɛɠɛɓo ká hu, diɛ ká laa lowa; 21Ku ɲɛ̨i paa mɛ̨nį kpɔ-kpɔɔ ka ŋɛ̨i gáá moi, ku ku kpɔwɔ lɛ lɔ yɛ hvįikpɛɛ nuą.

Gáá hvaai yɛ ɓowomun, mɛ̨nįi da di kpɔwɔ ɲąą kɛnɛ̨ ɉu, ɲą́ą́ gbɛli ŋą́ gbɔ́wɔ́ ɲąą kɛnɛ̨ lɔ ɉu. 22Di kaa a Hebreuxɠaa, ɲą́ą́ gbɛlimąn gáá la! Israɛlə lonnii ɓaa a diɛ? Ɲą́ą́ gbɛlimąn gáá la! Di kaa a Abrahamə huwu? Ɲą́ą́ gbɛlimąn gáá a da! 23Di kaa a Kristə ŋą tínuą? Ɓowo hvaa ka ŋɛ̨i gáá moi, Nwɛ́i lanŋąąi di wɛi mɛ̨i! Hvįikpɛɛ hu, dɛ́ɠɛɛi diɛ! Gaho hu, dɛ́ɠɛɛi diɛ! Kɛlɛɓo hu, dɛ́ɠɛɛi diɛ kpɔ kɛnɛ̨! Nu tɛɛ haa wolo la, dɛ́ɠɛɛi diɛ kpɔ pun! 24Ŋą́ hvaɠa ɲą pow haaɓa kɔw mɛ̨inąąn hɔlɔɓo Ɉuifəɠaa yəi, geemɛ̨i lɔɔli; 25di gɛ́lɛ a kpatolo geemɛ̨i haaɓa, nuą daa ta ɉɔ́ɔ́ a kwɛni, diɛ kɛ di báá, tanɔ̨n, kələn naa ə pɛlɛ a kuɔ geemɛ̨i haaɓa, ŋą́ą́ hvóló tɔ̨nɔ̨ da kpinį tɔ̨nɔ̨ kɛ gboloyá mu. 26Ŋą́ą́ hiɛ tamąą gulɔ gɔ́wɔ́ ɲą, haa aa hvoló mą́ą́ tamąą yá-kpɛa-kpɛaa ɲą, ŋą́ą́ kulɔ toomɛ̨i kɛ nuą yee mu, ŋą́ą́ kulɔ gááyɔwɔɠaai a ną́n nonnii di yee mu, yiiɠaai di hvo a Ɉuifəɠaa di yee mu, ŋą́ą́ tɛɛ mɛ̨nį kpɔluɠaa hu daa-leeɠaa hu, nɔi pun ɉu, gboloyá ɲą, hu hveelɛ nuą yee mu! 27Hvįikpɛɛ da mɔ̨nɔ̨, yíi kpəlin damąą, pulu, kwaną kpala, hín nɔɔ tamąą, kwɛ́lɛ́, da tənə; 28Və́ kpɛli gbəli yiiɠaa ti lonon ni, yələ tɛitɛi liihɛlɛnŋaa, ɛlɛɛ, da Yálá ŋą kpɔnŋaai mąąliihɛlɛn. 29Nui a kɛ yɛ vįikpɛɛi, ɲą́ą́ gbɛlimąn vį́ikpɛɛi, nu ta a too nɛ̨ŋɛ̨n ɉu, ɲą́ą́mun mə niikələn gwəi a həli mą́ą́.

30Akɛ mąąnɛ̨ɛ̨ nu ə gbɔwɔ ɲąą kɛnɛ̨, nwɛ́i ŋą́ hviikpɛɛlaa hu ɓə ŋą́ gbɔ́wɔ́ ɲąą kɛnɛ̨ laa. 31Yálá, gu Nąmu Jesus Nąn, yai lúwɔ́ kaa mą a yələ kəlee, ə gɔlɔn yɛ və́ lɛɛ kɛi. 32Damasə daai, tɔɔmun Aretasə ŋą gbahalanąmąi aa kɛ holahiɠaa tɔɔ ɉįi laa, ə gɛ di ɉón. 33Kɛlaa, di ɉéé kpɔlɔ hu, di dɛɛ pɛlɛ́ ta vinɛɛtɛlɛ la, di ɲɛ́ɛ́ ɉį́i pulu pələ, ŋą́ kulɔ ɲee ɲą.

Currently Selected:

Korɛntə veelɛ 11: BKPDCG

Highlight

Copy

Compare