Korɛntə dɔlɔɔ 4

Kristə ŋą tínuą

1Ká ku kaa lɔ yɛ, Kristə ŋą tínuą, a diɛi a Yálá ŋą tɛ̨ą loɔ mɛ̨ikaa nuą. 2Yaan, yii da ɉuhvɛli hɛn mɛ̨ikaamun ma, ya ɓaa, ə kɛ a dələnmoɔ. 3Nwɛ́i, ə mą kɛ kaa náá ɲɔ̨nwɔ̨ɔ̨ ɓo, a wala kɛ tii, nu kanŋaa di mą́ą́ mɛ̨nį hutɔɔ a ɲɔ̨nwɔ̨ɔ̨, yili niihɛlɛn və́ mą́ą́; ɲą́ą́ gbinįi vá kpɛli pɛli gbɔ́wɔ́ kiti teei. 4A tɛ̨ą, gwə́i kili hva ɉɔ́n gaa mą́ą́, kɛlaa yili hvə a də́lə́nmo, nui a mą́ą́ mɛ̨nį hutɔɔ, ya lɔ ɓaa gu Ną́mu. 5Yili ɓa, ká hvo nuą kiti tee nąąlɔwai tɔwɔ, gɛɛ gu Ną́mu hvo pa. Ya ɓə pai, mɛ̨nįɠaai noɔ kpįnįi, gəlee tooi pono ɲą, ə mą kɛ di kwəi kiliɠaa. Yili pulu, nu tɛitɛi da mąąwiɛ hɔlɔɓo Yálá yəi yɛ bələi bɛliɛ la diɛ.

6Ną́n nonnii, ka mąą mɛ̨nį ɓə gɛ, gɛ́ mɛ̨nįi ŋɛ̨i hukulɔ la a ɉon bələ takpɛli, gɛ́ gɔɔn, ɲą́ą́ kwa Apɔlɔsə kuɔ, ə gɛ, ká ku túwɔ́ pələi tii kaa, ká hvo pa nəi hvɛɛ a kpɔwɔ ɲąąkɛnɛ̨, káá ká liiɓa həɠə la ku hu. 7Gbɛɛ ɓə ə́ hviɛlaɓo ə ə́ tɛɛ ə́ ɓɛlaa diɛ? Lə ɓə ə́ yəi, yai di hvo ə́ kɔ la? Ɛlɛɛ yaan, akɛ di ə́ kɔ lai, ə́ kpɔwɔ ɲąąkɛnɛ̨ mɛ̨nį nwun maa a lə, yɛ da wala ə́ kɔ la?

8Káá gbɛa pilɛ! Káá gbɛa kɛ a hɛn gɔw nąmįną! Ə kulɔ ku pulu, ká kaa kɛ a tɔɔɓɛlaa! Kɛlaa, ku wɛi, ku hvo la! Ə li kɛ, ka kaa kɛ la a neeleei, kuɔ kpɛli ku li kɛ tɔɔlaa hu gwa gaa ni. 9Gbala ə tɔɔ, gíliŋąhiɛ pələ, Yálá aa ku too nuą kanŋaa ɲɛ̨i ɓa, a kuɔi ŋɛ̨i a ŋą tínuą, aa ku lɛɛ a nu gbəli, yɛ nuąi da di kiti tee, a di paa mɛ̨nį. Aa ku kɛ a yɛlɛkulɔ ɉu hɛn, yɛnɛ̨ɛ̨ ɲɛ̨i ɓa, malakaɠaa ɲɛ̨i ɓa da nu kanŋaa. 10Ku kaa a ɓowo nuą Kristə mąą mɛ̨nį ɓa, kaa ɓo a kilimąą nuą Kristə hu. Ku hvįikpɛɛi, ká huwalawalai, da ká mąąwiɛ, diɛ ku ɓɛlɛ too. 11Yii laa hu, pulu kaa kuɔ, kpələ wɛli yɛ ku kɛ, tənə toɔ kuɔ, diɛ ku mɔ̨nɔ̨ɓo, ku kaa lɔ ku nwun ma kuɔ li; 12kwa kólo kɛ a ku kpɔwɔ yee ə gɛ, ku kɔ̨nɔ̨n ɉɔlɔɓo. Da ku lalan, kuɔ lúwɔ́ too, da ku mɔ̨nɔ̨ɓo, kuɔ ku liikpələ. 13Da ku laa kala, kuɔ di liilaa, gwa mo kpɔ tii, ku kaa kpɔ háá ɓa háá, a hɛn da bili túlún ŋą, yɛnɛ̨ɛ̨ nu kan gəlee ɲɛ̨i ɓa.

Bələi Polə lonnii mąą liihɛlɛn gaa la mą

14Və́ ɉɛɓɛ́i ŋɛ̨i tɛɛi káá, ka nwumɛ̨ mɛ̨nį ɓa, kɛlaa, ka kili ɲą pono mɛ̨nį ɓə, yɛ nwɛ́li kɛ mąą lonnii. 15Hvo gaai, ə mą kɛ, mąąkwɛli kɛ nuą waa pow a hɔlɔɓo, diɛ Kristə mąą mɛ̨nį lɛ káá, ka nąnni di hvo tamą li, ɲą́ą́ lɔ ɓə, Nwɛlɛɛ lɛlɛɛ háálai, ɲą́ą́ ɓə ka káá a lon Jesus Kristə hu. 16Niɛwooi gáá gɛi káá, ya ɓaa, 'Ká bɔ́ɔ́ kɔɔn. 17Yili ɓə kpɔ gɛ, ŋą́ nwɛ́likɛmąą lon Timote tɔɔ, yai vąŋąlɔɔ gu Nąmu mąą mɛ̨nį hu. Bələi ŋą́ nwɔ́ yɛnɛ̨ɛ̨ kɛ la Kristə yee kɔnma, gaa pai nąą kili tooi ká ɲą, a bələi ti ŋą́ hiɛ la, gbɔn gəlee ɲɛ̨i ɓa.

18Hvo gaai, kɛi ə mo ká taɠaa kwəi diɛ kɛ: Və́ kɛa pai pənəi, və́ pa ká pɔɔli, daa mąn tɔɔ, diɛ di nwun dɛ. 19Kɛlaa, ɉu hvo kwɛa li, gɛ́ pənə gɛ́ pa, gu Ną́mu a hvaa mą. Ɛlɛɛ, mələn nuą tii, və́ kɛli yii da mo-o, kɛlaa, bələi da túwɔ́ la, ŋį́ gbaɠala kaa. 20Mąąhɔlɔɓo, Yálá ŋą tɔɔlaa hvo lɔ nu hvaa woo hu, kɛlaa, gaa a gu túwɔ́ pələ. 21Lə ɓə ka káá bɔ ŋą́ gɛ káá? Ka káá bɔ ŋą́ pa ka pɔ a hvaɠa, a wala kɛ tii, a wɛlikɛmąąlaa da liinɛ̨ɛ̨ gwəi laa?

Currently Selected:

Korɛntə dɔlɔɔ 4: BKPDCG

Highlight

Copy

Compare