Korɛntə dɔlɔɔ 3

Nwɛlɛɛ lɛlɛɛ laa həli nuą di wɔ mąątíi

1Nwɛ́i ną́n nonnii, və́ kɛ pə́lə́ ɓo li káá yɛ, nuąi Yálá ŋą kilii yee kɔnma, kɛlaa ŋą́ pə́lə́ ɓo káá yɛ nuąi nu kan gili kaa diɛ, yɛ lɛapɛlɛɛ, Kristə hu. 2Ɲįnįyá ɓə ŋą́ dɔɔ ka la, və́ kɔ̨nɔ̨n nwalawala lɔ li ka la, mąąhɔlɔɓo, ka hvəli pɛli mįi. Ká hvo li pa nwɔ̨nɔ̨ kɛ pɛli mą háákələi. 3Hvo gaai, ka káá ni nu kiliŋąhiɛ yee kɔnma. Mąąhɔlɔɓo, tolo da hvaa di kaa ni ka lɔwai; akɛtii nu kiliŋąhiɛ hva mɔ̨ɔ̨ a yili? Ɛlɛɛ, káá túwɔ́ la ti yɛ ɲɛ̨nɛ̨ɛ̨ ŋɛ̨i hu nuą? 4Akɛ nu taɠaa da kɛ kɛi diɛ: «Nwɛ́i, kwá Polə ɓə», daɠaa diɛ kɛ: «Nwɛ́i, kwá Apɔlɔsə ɓə», akɛti, ka hvo mɔ̨ɔ̨ ni túwɔ́i yɛ yɛnɛ̨ɛ̨ nuą?

5Gbɛɛ ɓaa a Apɔlɔsə? Gbɛɛ ɓaa a Polə? Di kaa lɔ a tínuąi, diɛi pa a káá laa na la pələ mɛ̨i. Di tɛitɛi di di wɔɔ mąątí kɛ, yɛ bələ gu Nąmu ə mąąlaa tɛɛ la di pɔ. 6Ɲą́ą́ ɓə ɉin, Apɔlɔsə ə yá pu mą, kɛlaa, Yálá ɓə gɛ yɛ kɛnɛ̨. 7Yili ɓa, nui ɉin hvo a hɛn da, nui nwɔ̨nɔ̨ ɲá pu mą, hvo a hɛn da, Yálá yaa tanɔ̨n lɔ ɓə naa kaa mą, yai gɛ, yɛ kɛnɛ̨. 8Nui ɉin da nui yá pu mą, di kaa tanɔ̨n, nu kɛlee a gɛ kolo hvɛla hɔlɔɓo yɛ bələi ə tí la. 9Gbala ə tɔɔ, ku kaa kólo kɛi gii ɓa Yálá yəi ɲɛa, káá ɓə a Yálá ŋą tíi, a Yálá ŋą pɛlɛ́i. 10Mɛ̨inɛ̨ɛ̨ Yálá ə gɛ mą́ą́ ɉaalai, ɲą́ą́ yɛ yɛlɛkɛmun nɛlɛɛ, ŋą́ gɔ́wɔ hvilɛn, nu ta kpɛli ə dɔɔ. Kɛlaa, nu kəlee ə gɛ a nɛlɛɛ nwɛi tɔɔ pələ hu. 11Yii ɓaa gɔwɔ hvilɛnŋąą nwɛi, nu hva pɛli nįnɛ̨ hvilɛn ɉii, ə kulɔ yii laa bulu, ya ɓaa: Jesus Kristə. 12Nu ə nwɔɔ tɔɔ mɛ̨i a: Hɛni, a wali-kwɛli, a kúwɔ́-kwɛni, a wulu, a mɔ̨nun gban, a wala kɛ tii, a dɛ̨ɛ̨, 13nu kəlee kɛ kólo kaa pai tooi pono ɲą. Giti tee hvóló ɓə pai gbaɠala lɛ, gaa pai nɛi a nwɔ̨n, ɛlɛɛ, nwɔ̨n mə pai nu tɛitɛi kɛ kolo hutɔɔi. 14Nui gɛ kolo a lɛɛ, a mąą hvɛla hɔlɔɓo. 15Nui nwɔ̨n a nwɛi kələn, a hvɛɠɛ; kɛlaa yaa kpinįlee tii a ɓalo, yɛ a ɓɔ nwɔ̨n ɉu.

16Ká hvo gɔlɔn kaa diɛ Yálá hee pɛlɛ́ ɓaa a káá? Ɛlɛɛ, Yálá-Nįi kaa heeni ka hu? 17Nui a Yálá hee pɛlɛ́ kala, Yálá yaa kpɛli a mąą nu kala. Mąąhɔlɔɓo, Yálá hee pɛlɛ́ mąąhəɠɛɛi, ɛlɛɛ, Yálá hee pɛlɛ́ tii, káá ɓə.

18Nu ta hvo gbɔwɔ ɓowo, nu ta a kɛ ka lɔwai yɛ gbɔwɔ kaa yɛ ɲɛ̨nɛ̨ɛ̨ ŋą kilimąą mun, ə gbɔwɔ kɛ a ɓowomun, ə gɛ, ə kɛ a kilimąą mun neelee. 19Hvo gaai, ɲɛ̨nɛ̨ɛ̨ hu kilikɛɲəi laa, gaa a ɓowo Yálá ɲɛ̨i ɓa. Yɛ bələi bɛ̨ɛ̨ la, diɛ mą: «A kilikɛɲəi nuą hon di kpɔ-kpɔɔ gbąnąlaaɠaa hu.» 20Ɛlɛɛ nwɔ̨nɔ̨: «Gu Námu Yálá ə kilimąą nuą di wɔ kiliŋąhiɛ kɔ́lɔn, gili kaa ɉu yɛ gaa a kpɛli.» 21Yili ɓa, nu ta hvo ŋą huɲąŋąkɛnɛ̨ kɔwɔ hvilɛn nu kanŋaa mɛ̨i, gbala ə tɔɔ, gəlee kaa a ká wɔɔ: 22yɛ ə kɛ a Polə, Apɔlɔsə ə mą kɛ a Sefasə; yɛ ə kɛ a yɛnɛ̨ɛ̨, yɛ ə kɛ a kɛ yɛnɛ̨ɛ̨, awala kɛ tii, haa; yɛ ə kɛ a háákələi awala kɛ tii, tínąą; gəlee kaa a ká wɔɔ. 23Kɛlaa, ka káá a Kristə nwɔɔ, Kristə yɛ ɓo a Yálá nwɔɔ.

Currently Selected:

Korɛntə dɔlɔɔ 3: BKPDCG

Highlight

Copy

Compare