Korɛntə dɔlɔɔ 12

Kili yəi mɛ̨inɛ̨ɛ̨ɠaa

1Yii hvilɛn na Kilii yəi mɛ̨inɛ̨ɛ̨ɠaa diɛ, ną́n nonnii, və́ bɔ ka hvo lɛɛ ká tɛɠii yili hu. 2'Ká kili kaa ɉu, káá, ká kɛɛ hali yíi hu, ká kɛli lɔ li ká nwun ɉu kun ma, ɉaliɠaa tii di hva hvaa, di pɔ pələ. 3Yili ɓa, gáá moi káá; nu ta a kɛli pələ ɓo Yálá ŋą Kilii yee kɔnma, hva pɛli kɛi diɛ, «Jesus nɛ̨ŋɛ̨n naai», nu ta yaan hva pɛli kɛi diɛ: «Jesus kaa a Nąmu», akɛ Kili-Mąąhəɠɛɛ hvə dɔɔ li la.

4Mɛ̨inɛ̨ɛ̨ huwu tamąąi, kɛlaa, Kili-Mąąhəɠɛɛ kaa lɔ tɔ̨nɔ̨ gbən. 5Góló tamąąi, kɛlaa, Nąmu kaa tanɔ̨n. 6Góló ɉee kpəlin na tamąąi, kɛlaa, Yálá tanɔ̨n nɔ ɓə a nu kəlee nwɔɔ too ɉu. 7Kili-Mąąhəɠɛɛ a nu tɛitɛi kɛ kóló tɛɛ bɔ, mɛlaa mąą mɛ̨nį ɓa. 8Kili-Mąąhəɠɛɛ a nu taɠaa di wɛi kɛ a kilikɛɲəi wooɓoɔ, daɠaa di wɛi yɛ ɓo a: mɛ̨nį kɔ́lɔn nwoo Kili tanɔ̨n tii haalai; 9Kili tanɔ̨n tii lɔ ɓə, a laa na laa tɛɛ nu taɠaa pɔ, Kili tanɔ̨n lɔ ɓə nwɔ̨nɔ̨ a nu ɓalo mɛ̨nį mąą laa tɛɛ nu taɠaa pɔ; 10ə kpalo mɛ̨nį kɛɛ mąą laa tɛɛ da pɔ, ə Yálá kwəi mɛ̨nį hukulaa tɛɛ da pɔ, ə dakpɛli nwɛi kɛ a mɛ̨nį hukpɛ kili, da yɛnɛ̨ɛ̨ mɛ̨nįɠaa hu tɔɔ, ə da nwɔɔ kɛ a hį́iwooɠaa ɓoɔ, ə da nwɔɔ kɛ nwɔ̨nɔ̨ a laawoo tɛɛ kɛɛ. 11Kɛlaa, mɛ̨nįɠaa tii kəlee, Kili tanɔ̨n tii kɛ-kóló li, yɛ nu tɛitɛi nwɛi tɛɛ bɔ, yɛ bələi a laa la a nii.

Nu kpįnį kaa tɔ̨nɔ̨ dɔɔ-tɔɔiɠaa tamąą

12Bələi lɔ ɓə gaa la, nu kpįnį kaa la tɔ̨nɔ̨, dɔɔ-tɔɔi tamąąi mą, kɛlaa, bələi mąn tii damąąi la, gaa lɔ a kɔlɔ tɔ̨nɔ̨; bələ lɔ ɓə Kristə kaa la. 13Mąąhɔlɔɓo, di gu kəlee gu mąąwaa Kili-Mąąhəɠɛɛ tɔ̨nɔ̨ hu, ə gɛ, gu kɛ a kɔlɔ tɔ̨nɔ̨, yɛ ə kɛ a Ɉuifə, yɛ ə kɛ a Grɛkə, ə kɛ a luwɔ, ə kɛ a kaalon; yá nwun gulɔi tɔ̨nɔ̨ ɓə gu gu kpələ la, Kili-Mąąhəɠɛɛ tanɔ̨n ɉu.

14Nu kpįnį yan dɔɔ-tɔɔi hvo lɔ mą tanɔ̨n, kɛlaa, damąąi. 15Kɔwɔ a kɛ diɛ: «Yii və́ a yee, və́ a nu nąą ta», akɛti, hva kɛ mɔ̨ɔ̨ a kɔlɔ nąą ta? 16Wəli a kɛ diɛ: «Yii və́ a ɲɛ̨i kɔw, və́ a nu nąą ta», akɛti, hva kɛ mɔ̨ɔ̨ a kɔlɔ nąą ta? 17Nu nąą kəlee a lɛɛ lɔ a, ɲɛ̨i kɔw, a mɛ̨nį mɛ̨n a nə? Nu nąą kəlee a lɛɛ lɔ a wəli, a hɛn kun mɛ̨n a lə? 18Kɛlaa, Yálá ə nu tɔɔ-tɔɔi kɛ mą, yɛ bələi niiɓa kaa la. 19Nu nąą kəlee a lɛɛ lɔ a dɔɔi tanɔ̨n, gbįnį a kɛ mį? 20Nu tɔɔ-tɔɔi kaa mą tamąą, kɛlaa, kɔ́lɔ tɔ̨nɔ̨ li.

21Ɲɛ̨i kɔ́w hva kɛ yee ɓa: «Mą́ą́ kpaan və yɛ», ə mą kɛ, nwun galən hva pɛli kɛi kɔ́wɔ ɓa: «Mą́ą́ kpaan və yɛ́.» 22Bələi mąn gaa la tii, tɔɔ-tɔɔiɠaai gaa yɛ da kɛ a di hvįikpɛɛ, di mąą mɛ̨nį nwąnąąi, 23ɛlɛɛ, yiiɠaai di mąą hvo wiɛ li a dənən gu ɲɛ̨i ɓa, diɛmun mə, gwa di mąąwiɛ. A diɛi tii di mąą hvo wiɛ li a dənən, diɛ ɓə gwa di mąąwiɛ pələ kwɛli, 24yiiɠaai mąąwiɛ kaa diɛ, hɛn da mąąkpaan və yiliɠaa diɛ. Kɛlaa Yálá ə nu pɛli, ə ɉeekpəlin na kɛ, yiiɠaa di mąą hvo wiɛ li, di mąą yɛ pɛli wiɛi. 25Ə gɛ, ɓɛlaɓo hvo kɛ gu tɔɔ-tɔɔɠaa lɔwai, kɛlaa, di tɛitɛi, di mąą liihɛlɛn ə ɓo di kee ɓa. 26Nu tɔɔ-tɔɔi ta a kɛli nwąną, mɛlaa kəlee da ɉu mɔ̨nɔ̨ mįi, dɔ̨nɔ̨ a kwəinɛ̨ɛ̨ hɔlɔɓo, nąą kəlee a kɛ gwəinɛ̨ɛ̨ hu.

27Yaan, ka káá a Kristə kpįnį, kaa ɓo a dɔɔ-tɔɔiɠaa nu kəlee da dɔɔi. 28Nuąi Yálá ə di hee gbɔn nwun na, dɔlɔɔɠaa ɓaa: Gɛlaɠaa, a həɠə laa: Gwəi mɛ̨nį hukulɔ nuą, da həɠə laa: Nuąi di ɓɛlaa mąąkwɛli mɛ̨nį kaa di nwuɔ̨, yili a hələ laa: Kpalo mɛ̨nį kɛ nuą, ɓalo ɓo kɛ nuą, nuąi da kpɔnmąą tɛɛ di ɓɛlaa pɔ, ɲɛ̨i tɔwɔ nuą, da hįiwoo ɓo nuą 29Nu kəlee mə mɔ̨ɔ̨ a Gɛlaɠaa? A gwəi mɛ̨nį hukulɔ nuą? A mąąkwɛli kɛ nuą? Gəlee da mɔ̨ɔ̨ kpalo mɛ̨nį kɛ? 30Nu kəlee ɓə mɔ̨ɔ̨ a ɓalo ɓo kɛ? Gəlee ɓə mɔ̨ɔ̨ da hįiwooɠaa ɓo? Gəlee da mɔ̨ɔ̨ woo laa tɛɛ kɛ? 31'Ká mɛ̨inɛ̨ɛ̨ leeleeɠaa mąą gilɛ həɠə. Gəlee ə mą kɛ, gáá pələ lɛi káá, nɛlɛɛ dɛɛ gəlee ɓa.

Currently Selected:

Korɛntə dɔlɔɔ 12: BKPDCG

Highlight

Copy

Compare