Korɛntə dɔlɔɔ 11

1'Ká kɛ a bɔ́ɔ́ kɔ́ɔn nuą yɛ bələi gáá Kristə pɔɔ kɔ́ɔn ɉii la.

Nɛ̨ąą da hinąą di tɔɔ pələ gu Nąmu ɲɛ̨i ɓa

2Ŋą́ ká mąątɛ̨nɛ̨i, gɛ mɛ̨nį ną́ą́kili a too ká ɲą mɛ̨nį kəlee hu, ɛlɛɛ, ká yee kanąn mɛ̨nį gu yíi pələ ɓa, yɛ bələi ŋį́ nɛ la káá. 3Kɛlaa, gɛ́ ká mɛ̨nįi ŋɛ̨i kpaɠala kaa: Hinąą kəlee di nwun nąmu ɓaa a Kristə. Nɛ̨ɛ̨nu nwun nąmu ɓaa a hulɔnu. Kristə nwun nąmu ɓaa a Yálá. 4Hulɔnu lɔpee a kɛi Yálá hvɛli, a wala kɛ tii, yɛ Yálá kwəi mɛ̨nį hukulɔ, ɓɔlɔ pɛlɛɛ nwuɔ̨, gaa ɲɛ̨i tɛ kulɔi a nwun nąmu. 5Kɛlaa, nɛ̨ɛ̨nu a kɛi Yálá hvɛli, a wala kɛ tii, yɛ Yálá kwəi mɛ̨nį hukulɔ, ɓɔlɔ hvo nwuɔ̨, gaa ɲɛ̨i tɛi kulɔi a nwun nąmu. Mąąhɔlɔɓo, a kɛ kpɔlɔɔ yɛ da nwun gbɛlaan mo. 6Akɛ nɛ̨ɛ̨nu a wala ɓɔlɔ yili nwuɔ̨, mąąnɛ̨ɛ̨ di nwun mɛ̨i tee. Kɛlaa, akɛ nwumɛ̨ mɛ̨nį ɓaa nɛ̨ɛ̨nu nwun mɛ̨i tee a wala kɛ tii, nwun gbəlaan moɔ, mąąnɛ̨ɛ̨ ə ɓɔlɔ yili nwuɔ̨. 7Hulɔnu nwɛi, mąą hvo nɛ̨ɛ̨li hvo ɓɔlɔ pɛlɛ nwuɔ̨, mąąhɔlɔɓo, gaa a Yálá mąąnįnįn da nwɔ mąąwiɛlaa, kɛlaa nɛ̨ɛ̨nu nwɛi gaa a hulɔnu nwɔ mąąwiɛlaa. 8Mąąhɔlɔɓo, hulɔnu hvə kulɔ nɛ̨ɛ̨nu hu, kɛlaa, nɛ̨ɛ̨nu ɓə kulɔ hulɔnu hu. 9Yálá hvo kɛ hulɔnu pɛli li nɛ̨ɛ̨nu mąą mɛ̨nį ɓa, kɛlaa, nɛ̨ɛ̨nu ɓə Yálá ə bɛli hulɔnu mąą mɛ̨nį ɓa. 10Malakaɠaa mąą mɛ̨nį ɓa, mąąnɛ̨ɛ̨ Nɛ̨ɛ̨nu ə ɓɔlɔ yili nwun ma, ə gɛ, ə nɛ yɛ diɛ gaa ɉilɛ woo mu. 11Kɛlaa yaamun, nɛ̨ɛ̨nu da hulɔnu di yiliɛ di kee ɓa Ną́mu Yálá ɲɛ̨i ɓa, da hva mɛlan nɛɛ. 12Mąąhɔlɔɓo, yɛ bələi di nɛ̨ɛ̨nu kulɔ la hulɔnu hu, pələ lɔ ɓə nɛ̨ɛ̨nu yaa kpɛli a hulɔnu kaa la, gəlee hveelɛi di həɠə Yálá pɔ.

13Káá kpįnį ka yili hu tɔɔ akɛ mąąnɛ̨ɛ̨ nɛ̨ɛ̨nu yɛ Yálá hvɛli ɓɔlɔ hva kɛ nwuɔ̨. 14A kɛ tii, yɛnɛ̨ɛ̨ mɛ̨nį hva kɛ mɛ̨nį ta lɛi káá, kɛlɛi nwumɛ̨ mɛ̨nį ɓaa hulɔnu nwun nɛɠa a kɛ a gweaa-e? 15Kɛlaa nɛ̨ɛ̨nu nwɛi, mąąwiɛ hɛn mąą nwun nɛɠa, Yálá ə nwun nɛɠa tɛɛ nɛ̨ɛ̨nu pɔ, ə gɛ a nwun mɛ̨i kpulu hɛn. 16Nu ta a tɔɔ yɛ gaa yili mąą hɛatooi, ku hvo ku muhəɠə li a yili, ə mą kɛ Yálá nwɔ kpɔn ɓə.

Gu Ną́mu nwɔ kɔ̨nɔ̨n

(Matie 26.26-29; Markə 14.22-25; Lukə 22.15-20)

17Yiiɠaa ti kɛ, gwaa yili kaa, və́ ká mąątɛ̨nɛ̨i; ká wɔ ɲąąkpɔnŋaai di hva ka tɛ tɔwɔ, yaamun, a ká kala. 18Tɔlɔɔ, di mo mą́ą́ diɛ; ká kɛ ɲąąkpɔn ɉui, ka ká ɓɛlaɓo, ɛlɛɛ yaan, gáá tɛ̨ą kaai ɉu. 19Hvo kɛli kpɔ yili ə kɛ tii, ə gɛ, gu pɛli huwalawala nuą kɔlɔn ɉii ká lɔwai ɲąąhɛn mɛ̨nįɠaa hu. 20Kɛlaa, 'ka ká ɲąąkpɔn, gu Ną́mu nwɔ kɔ̨nɔ̨n hvə ka hee mįi mɛ̨nį ɓa. 21Mąąhɔlɔɓo, nu tɛitɛi a mąąhulɔ, gɔ̨nɔ̨n ə paa la, ə ɉəɠə, a kɛ kɛa tii, pulu yɛ nu taɠaa kpɔlɔɔn, lɔɔ a daɠaa hon. 22Pɛ́lɛ́ hvo mɔ̨ɔ̨ ká yəi káá kɔ̨nɔ̨n mįi mu, káá ká kpələ laa? Ɓaa, gbɔn ɓə mɔ̨ɔ̨ ka káá mɛlɛ tooi? Ɛlɛɛ nuąi hɛn və di yəi kaa di nwumɛ̨ la tii? Lə kpɔ ɓə ŋą́ pɛli moi káá, ka túwɔ́ pələ a kɛ tii, mąąnɛ̨ɛ̨ ŋą́ ka mąątɛ̨nɛ̨? Vá kpɔ tai gɛ! Vá ka mąątɛ̨nɛ̨ yili hu.

23Hvo gaai nwɛ́i, yii ŋį́ ɉɔlɔɓo gu Ną́mu yəi, ya ka, ɛlɛɛ, ya ɓə gáá dɛɛi ká pɔ: Gbįnįi ŋɛ̨i di gu Ną́mu lɔ́wɔ́tɔɔ la, mąą kpįnįi tii, ə lɛɠɛ həɠə, 24ɛlɛɛ, gbɛɛ a Yálá hɛɠɛɛɓoɔ, ə ɉu yali, yɛ diɛ: «Yii kaa a gɔ́lɔ, yai a ká wɔɔ, 'ká yii kɛ káá ną́ą́ kili too la ká ɲą.» 25Bələ lɔ ɓə ə gɛ la a gbələ kɔwɔ, kɔ̨nɔ̨n mįi kɛɛ pulu, yɛ diɛ: Gbələ kɔwɔi ŋɛ̨i kaa a mįnɛ̨ nįnɛ̨ ɲą́mą hu; ká kɛ mɛ̨nįi ŋɛ̨i kɛi, yələi lɔpee ká kɛli da kpələ la, káá gbələ a ną́ą́ kili too pələ ká ɲą. 26Hvo gaai, yələi lɔpee ka kɛli nɛɠɛ ŋɛ̨i mįi la, káá ka kpələ a gbələ kɔwɔi ŋɛ̨i, 'ká gu Nąmu haa mɛ̨nį laa həli, ə lɛɛ ɉu ə pənə ə pa.

27Yili ɓə gɛi, nui lɔpee hvo nɛɠɛi ŋɛ̨i mįi a mįi pələ, hvo gbələi a gu Ną́mu nwɔ kpələ kɔ́wɔi a gbələ pələ, mąą nu kaa gu Ną́mu kpinį, da ɲąmą wulu lɛɛi nwuɔ̨. 28Yili ɓa, nu kəlee ə gbɛa gbɔwɔ mąą kpɛɛ, hvo teɠa kɛ nɛɠɛ mįi, hvo teɠa kɛ naa pɛlɛi gbələ kɔ́wɔ ɓa. 29Mąąhɔlɔɓo, nui a nɛɠɛ ŋɛ̨i mįi, yɛ gbələ a gbələ kɔwɔ, a tɛɠɛɓo ɉu laa gu Nąmu ɓa, gaa naa mįi, yɛ gbələ, a gbɔwɔ nwun na pili mɛ̨nį. 30Mɛ̨nįi gɛi, nu tamąą kaa la ká lɔwai, a ɲɔ̨n gɛ nuą, daɠaa kpɛɠii ə ɓo diɛ, ɛlɛɛ, damąą daa haa. 31Kɛlaa, gwa gu kpɔwɔ mąą kpɛɛ, giti hva kala guɔ. 32Kɛlaa, gu Ną́mu a gu kiti tee gu hutɔɔ mɛ̨nį ɓa, ə gɛ, kiti hvo pa kala guɔ gwa yɛnɛ̨ɛ̨ nuą.

33Yili ɓa, ną́n nonnii, ɓɛlɔwai ka ká ɲąąkpɔn na, kaa gu Ną́mu nwɔ kɔ̨nɔ̨n mįi, ka ká kee mąą kpɔn. 34Pulu a kɛ nu ta ɓa, ə kɔ̨nɔ̨n mįi ɲəi bɛlɛ́n, ə gɛ, ká hvo pa ká ɲąąkpɔn ká nwun na pili mɛ̨nį ɓa. Mɛ̨nį yiiɠaai tii daa lɛɛ, ŋą́ pa hiɛ hu, ŋą́ yiliɠaai ɲɛ̨i kulɔ.

Currently Selected:

Korɛntə dɔlɔɔ 11: BKPDCG

Highlight

Copy

Compare