Acts 5
5
Ananias-aaq Sapphira-llu
1Yugtangqellruuq Ananias-aamek at'legmek, nuliani-llu Sapphira-llu tun'illrek nunautmegnek. 2Nuliani-llu umyuallguteklutek akit ilait qemagtakek, ilait tau͡gaam apostle-aanun tunluki (tamalkirrnguarluki). 3Peter-aam qanrutaa, “Ananias-aaq, ciin Satan-aam itertau ircaqun, iqlusqelluku Anerneq Tanqilria nunam-llu akiin ilait qemagtesqelluki? 4Tunvailgan, tamalkuan piksaaqan, tunngerpegu-llu umyuan aturarkauyaaqan. Ciin, tau͡gaam, ircaqurpegun mat'umek taqucit? Yugnun iqlunrituten tau͡gaam Agayutmun.” 5Tamatumek niicami Ananias-aaq narullgutuq; tuquluni-llu, tamarmeng-llu mat'umek niitellriit civuuraut. 6Yun'errat-llu tuanelnguut nangertut temii-llu imgulluku, ayautaat, tungmaggluku-llu.
7Sass'at pingayun kinguatni, nulirra itertuq, nalluluku tuaten picia. 8Peter-aam qanrutaa, “Nalqigusnga, waten-qaa amllertalriamun tun'artek nunautsek?” Kiugaa-llu taum, “Aa-ang, tuaten akitutauq.” 9Tau͡gaam Peter-aam qanrutaa, “Ciin-mi umyuallguteklutek picirkiurcetek naspaanaluku Atanrem Anernera? Tangerrluku, uivet tungmagcetellri uka-i itqatartut, taukut-llu anuciiqaatgen.” 10Tauna-llu egmian narullgutuq tuquluni-llu it'gain ciuqerratnun, yun'errat-llu itrameng tangrraat tuqumaluni, anulluku-llu tungmagtaat uingan canianun. 11Tamarmeng-llu agayuviim yui, yuut-llu makunek niitellriit civuuraut.
Apostle-aat Nallunailkucillrat Irr'inarqellriatgun
12Nallunailkutat irr'inarqellriit-llu amllelriit caliaqumalartut yugni apostle-aatgun. Taukut-llu quyurtelartut Solomon-aam Elaturraani. 13Cailkaat-llu ellaitnun ilagautesciiganateng, tau͡gaam yugni qigcikumaluteng. 14Ilangaqluteng-llu Atanrem ukveqestainek angutnek arnanek-llu amelqapiggluteng. 15Naulluulriit tuaten anutelarait tumyaranun, elliluki-llu inarrvignun wall'u curunun, Peter-aam talinranek, kitu'urqan talitesqelluki. 16Jerusalem-aam-llu avatiinelnguut nunat yuit yugugauluteng ullautelartut, naulluulriit tuaten anernerrlulget-llu ullaulluki; taukut-llu tamarmeng anirtuumaut.
Apostle-aak Itengqarraarlutek Ancimallrak An'gilakun
17Tau͡gaam agayulirten͞guneq ilai-llu tamarmeng Sadducee-aat nangertut ciknayugluteng. 18Apostle-aat teguit itercivigmun-llu kelucaulluki. 19Tau͡gaam Atanrem an'gilaan unugmi angpagtai (ikirtai) iterciviim ikirtuqai, taukut-llu anutai qanrulluki-llu, 20“Agayuvigpagmun ayagci, tuani-llu nangerrluci qalarutkiciu yugnun tamalkuitnun, man'a qalarutekluku Unguvam qaneryarartaa.” 21Tuaten-llu ellimertuateng, erteqanrakun agayuvigmun itertut, elitnauriluteng-llu. Agayulirten͞guneq tau͡gaam qaillukuarvigmun agngami, taisqai tamalkuita qaillukualriit Israel-aat-llu ciulirnertait. Itercivigmun-llu ayagceciuq taukut aqvasqelluki. 22Ullagtaita tau͡gaam anguyagtet nataqenritait itercivigmi; utercameng-llu nalqigtut, 23qanraqluteng, “Maaten tekitarput itercivik kelucaumayaaqellinilria pengegnaunani, tarikestet-llu amiigmi nangengqaluteng, tau͡gaam ikircamteggu yugmek tangenrritukut iluani.” 24Tua-i-llu agayuvigpiim atanran agayulirten͞gunret-llu man'a niicamegteggu, umyugaitut qaillun tamatum iqungqerrucirkaanek. 25Tuani yuk tekituq qanrulluki, “Tangerrluku angutet imkut kelucaucivigmun pilci agayuvigpagmi nangengqaut yugnek elicungcariluteng.” 26Tua-i angayuqaq anguyagten̄i-llu ayagtut tailluki-llu, tau͡gaam nangtenrilkurrluki, yuut alikngamegteki, teggalqunek miluqunayukluteng. 27Taicamegteki-llu qaillukuartet ciuqerratnun pivkarait, agayulirten͞gunrem-llu aptai 28qanerluni, “Waqaa, inerqunqegcaarallruamceci-ggem elicungcarisqevkenaci uum atrakun, tangerrluku-llu Jerusalem-aaq muirarci elitnaurutevcen̄ek, angutem-llu taum auga wangkutnun tuc'etengnaqerci.” 29Tau͡gaam Peter allat-llu elitnaurat kiugut, qanerluteng, “Agayun niisnganruarkaugarput yugni. 30Ciuliamta Agayutiita Jesus-aaq makcetaa, elpeci tuqutellerci muragmun agarrluku. 31Tauna Agayutem ucurnarivkaraa tallirpiminun Atanerkautngusqelluku, Anirturisten͞gusqelluku-llu, Israel-aat cikiisqelluki umyualinqigtem̄ek au͡g'aritmek-llu. 32Wangkuta-llu nallunritesten͞guukut makunun, tuaten-llu cali Anerneq Tanqilria, Agayutem cikiutekellra niisngastem̄inun.”
33Man'a niicamegteggu qenngut, qaillukuarluteng-llu tuqutnaluki apostle-aat.
Gamaliel-aam Ellalirai
34Tau͡gaam qaillukuartet iliit Pharisee-aaq nangertuq, Gamaliel-aamek at'lek, alerquutet elisngastiit, tamarmeng-llu takaqekiit. Taum alerqurai elitnaurat anuteqaasqelluki. 35Qanrutai-llu ilani, “Elpeci angutni, Jerusalem-aarmiuni, mulngakici qaillun picirkarpecen̄ek angutnun ukunun. 36Mat'um ciungani Theudas-aaq alairtuq, takarnarqengnaqluni, amllelriit-llu angutet, yuinaat yuinaq, elliinun ilautut. Tau͡gaam tauna tuqucimauq maligcestai-llu tamarmeng sekavcimaut, cauvkenateng-llu. 37Angutem taum kinguakun, Judas-aaq Galilee-armiu, alairtuq naaqumallrata nalliini amllelriit-llu yuut unayaqluki. Tauna cali piunriumauq, tamarmeng-llu maligcestai sekavvluteng. 38Taumek qanrutamci, angutet ukut uitaciki, ilangcivkenaki-llu. Maa-i picirkiullrat calillrat-llu yugnek pillrukuni, caunrirciquq. 39Tau͡gaam Agayutmek pillrukan pingutesciigatarci, wall'u Agayutmun anguyautellriacetun ayuqeciquci!”
40Taumun-llu maligutut, elitnaurat-llu itercetraarluki, nangtait, inerqurait-llu Jesus-aam atrakun qallatesqevkenaki, angitait-llu. 41Tua-i ayagtut qaillukualriit takuatnek, nunaniryugluteng tun'e'rnailameng caunrilkumaluteng Jesus-aam atra pitekluku. 42Unuaquaqan-llu agayuvigpagmi, 'laavkaani-llu tamaitni, arulairpek'nateng elicungcariluteng Jesus Christ-aq qalarutkaat.
Currently Selected:
Acts 5: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.