Acts 4
4
Peter-aam John-aam-llu Itengqallrak Qanercetaarumallrak-llu
1Tua-i-llu yuut qalarutellragni, Agayulirtet Agayuviim-llu atanran Sadducee-aat-llu ullagagket, 2cangaklukek yugnek qalaruciagnek tuqumalriit maktellerkaatnek Jesus-aakun. 3Teguagket-llu kelucaullukek-llu unuaqullerkaanun, unukataan. 4Tau͡gaam amlleret qaneryaramek niitellriit ukvertut; taukut-llu angutait nallmegteggun tallimaurtut tiissitsaat.
5Unuaquan-llu Atanirturilriit ciulirneret-llu igatulit-llu Jerusalem-aami quyurtut. 6Annas-aaq tuantuq agayulirten͞guneq, Caiaphas-aaq-llu, John-aaq-llu, Alexander-llu, allat-llu cali agayulirten͞gunrem tungelqurri. 7Qukaqmiumariamegtekek-llu aptagket, “Camek piunarqucingqerrlutek, cam-llu atrakun mat'umek picetek?” 8Peter-aam-llu, Anernermek Tanqilriamek muirumiimi, qalarutai, “Elpeci, Yuut atanirturtaitni ciulirneritni-llu, 9ernerpak qanercetaarumakumegnuk, yuum piyuayuilnguum piyuangucia pitekluku, nau͡gg'un-llu assiricianek taum, 10tamarpeci man'a nallunrilkiciu, Israel-aam-llu yuin tamarmeng nallunrillitgu, Jesus-aam Christ-am Nazareth-aarmium atrakun ussukcautellerpeci, Agayutem-llu tuqumalrianek maktellran, tua-i elliikun una yuk cavkenani takuvcen̄i nangerngauq. 11Wani-wa tauna teggalquq elpecen̄i enelilriani caunrilkellerci, kangiritkaurrluni teggalquuguq. 12Allakun-llu anirtuutaitukut, wani-wa-llu qiliim aciani yugni kina at'ngeksailami Anirturilriamek.”
13Tangrramegtekek-llu Peter John-aaq-llu alingenriluciagnek, nalluvkenaku-llu elisnganriluciak elitnaullrunriluciak-llu, irr'ikagket; elitaqagket-llu Jesus-aamun ilakellruciagnek. 14Caniagni-llu anirtullrak tauna nangengqalria tangrramegteggu, qanerviitut. 15Taumek qaillukuarvigmek anevkarraarlukek, ellmeggnek qaillukuartut, 16qanerluteng, “Qaillun ukuk piarkauceta? Wani-wa angelriamek irr'inarqelrialiullrak nallunaituq Jerusalem-aarmiuni tamaitni; asgurakviitarput-llu. 17Tau͡gaam mat'um ayunritlerkaakun yugnun, inerqurnaurput mat'um kinguani yugnun qanenqigtesqevkenakek atermek taumek.” 18Tua-i taisqen͞gamegtekek inerquragket qalartesqevkenakek watqapik elitnaurilaasqevkenakek-llu Jesus-aam atrakun. 19Tau͡gaam Peter-aankuk John-aam-llu kiugakek, “Agayutem takuani niisngaarkauyaaqellikemceci Agayutmi niisnganruluci. 20Tau͡gaam wani-wa wangkuk aassaqesciigatapuk tangelpuk niitelpuk-llu.” 21Taukut-llu alingcirturraarlukek cali, anevkaragket. Anucimirqecetaaryung'e'rmegtekek, yugnek alingut, tamarmeng yuut nanraumariatgu Agayun tamatumek pillragnek. 22Tauna-llu yuk yuinaak malruk cipingalutek allrakungqerran irr'inarqelriakun anirtullrak.
Ukverumalriit Piicautagket
23Anngamek-llu ilamegnun ullautuk qanemcilluki-llu agayulirten͞gunret ciulirneret-llu qanellratnek ellmegnun. 24Taukut-llu niicamegteggu qanemcillrak, erinaseng antaat ataucikun Agayutmun, qanerluteng, “Ataneq, qiliim piliaqestiini, nunam-llu, imarpiim-llu tamaanelnguut-llu tamalkuita, 25Anernerpegun Tanqilriakun, qanellruuten, David-aam ciuliamta qanrakun waten, ‘Ciin Agayumanrilnguut kitngiartat qiivluteng-llu? Ciin-llu yuut umyuangcartat atuugarkaunrilngurnek? 26Nunam angayuqai taigut, atanirturilriit-llu quyurrvikaat inglukluku Ataneq Agayun Christ-aq-llu.’ 27Tua-i ilumun ukuni nunani Jesus-aaq inglukluku, yuun Kenciknarqelria minguumalriartan, quyurtellruut Herod-aaq Pontius-aaq-llu Pilate-aaq, ilakluki agayumanrilnguut, Israel-aam-llu yui; 28tuaten pinaluku pinirpet pisquciatun picirkiucirpetun-llu ciunguluku. 29Watua-llu tangerki, ilungluteng alingcirtuutait; pisteten-llu cikirki alingitmek, qaneryaran qalaruteknauraat taqaunateng. 30Unateten yaggluki anirturilaqina yugnek, nallunailkutat irr'inarqelriit-llu pivkarluki yugpet Kenciknarqelriim atrakun, Jesus-aam.” 31Piicaumariata-llu, ena quyurrvikellrat tauna arulacimauq, tamarmeng-llu Anernermek Tanqilriamek imangut, qalarutkaat-llu Agayutem qaneryaraa, alingunateng.
Tamaitgun Pillgutkellrat
32Taukut-llu ukverumalriit yugugaat ataucimek umyuangut ilakuyulluteng-llu. Tuaten-llu kina imna qaneqsaituq piutni kiimi piksugluki, tau͡gaam tamarmeng aklullgutkut ataucimi. 33Angelriamek pinimek nallunairiut apostle-aat Atanrem Jesus-aam unguillranek; atawaqaasqun-llu ellaitnun tut'uq. 34Nurutellriartaituq-llu, wani-wa tamarmeng nunautellget enengutellget-llu tamakut tunait, akinguteteng-llu taitait, 35apostle-aanun tunluki; taukut-llu cikiutekait yugnun, piilutaciat tangerrluku. 36Tuaten-llu Joseph-aaq, apostle-aat acillrat Barnabas-aamek, (wani-wa kangia “Qaruyutem Yua”), Levite-at iliit. Cyprus-aarmiunguluni, 37tauna nunautminek tuniuq akia-llu tailluku tunaa apostle-aanun.
Currently Selected:
Acts 4: YPK
Highlight
Share
Copy
Want to have your highlights saved across all your devices? Sign up or sign in
Yupik Bible © 2012 American Bible Society. All rights reserved.