Maleke 7
7
Yesu ta kalagi nii Zuifuiti ti-mɛmɛwolaiti ti zɛgai
(Matiyo 15:1-9)
1Faliziɛinti ta tɔ kalamɔin tanigaa ti ʋaani, ti zeɠe Zeluzalɛme, ti ɠaalɛ ba Yesu maaɠoolii zu. 2Ti pɛtɛni ga ná-kaladopoi tanigaa ta ta-laamianigiti miizu ga kɔzɔba yeeiti, naa ʋolu ɠa ga ti la yeagbazu eɠɛʋelei Zuifuiti ta-ɠalagi ɠɛni la.
3(Tɔɔzei Faliziɛinti ta Zuifuiti kpein ti la ɗa ga daamii lɔɔzei, ni ti la yeagbani ɠɛzɛɠɛzɛ, ta naa ɠɛɛzu ga ti ɠolo kalagi naa ʋɛ, nii ti-mɛmɛwolaiti ti zɛgai ti ya. 4Naa ʋoluma ta zeɠena dɔɔɠɔi zu, ti la daami woga, ni ti la ɲade fai ɠɛɛni. Faa wɔlɔma mɔinmɔin kiligaa ta ti ya ɓalaa, eɠɛʋelei gɔwɔiti, ziɛ liɠiiti ta kɔlu ɓɔi aniɲakaiti gba vai la.)
5Faliziɛinti ta tɔ kalamɔinti ti zɛba ti Yesu ɠaazaɠa, ti ɠɛ ma: «Lee vaa zu ɗa-ɠaladopoiti ti la ziɛzu ga kɛwolaiti kɛɛ vaa wɔlɔmaiti? Lee vaa zu ti daamii wosu ga kɔzɔba yeeiti?» 6Yesu ti wooɠaaʋoteni, é ɠɛ ti ma: «Wɔi wo ga woovele nuiti! Wa ɠa GALA goo wo nui Ezayi ɠɛni vaazu wo ma GALA Sɛʋɛi zu, ʋɛ é sɛʋɛai ná ga:
‹Niima nuɓusɛiti ta dɛ̀bizu ga ti-lakɔlɔgiti nɔ,
kɛlɛ ti-yiimaʋɛ wola maaɠoozaʋɛ bà.
7Wafuun lɛbiya nɔ ɠa ti feezu bɛ̀,
tɔɔzei kalagi niiti ti bosu,
naa pɛ ka nɔ ga nuiti ta-leveiti.›#7:6-7 Eza 29:13 bogɛ é zoloo Gɛlɛke woo zɛʋɛ wɔlɔmai ma.
8Wa GALA ná-deveiti zɛsu ná, wo ɗa ziɛ ga nuiti ta-vaa wɔlɔmaiti!»
9Naa ʋoluma, é ɠɛni ti ma: «Wo zoogɛ gola GALA ná-deveiti daazu ɠoba, nii a kɛ wo ɗa ziɛ ga wa-vaa wɔlɔmaiti! 10Tɔɔzei Moize bogɛ ga: ‹È-ɠɛɛ lɛbi ta è-lee,›#7:10 Ɛgz 20:12; TSV 5:16. é ɠɛ mɔnɔ: ‹Zɔi nɔpɛ é kɛɛɠɛ ɓaa dee ɠotozu, ta naama nui ʋaa.›#7:10 Ɛgz 21:17. 11Kɛlɛ wɔun, wa ɠɛɛzu ma: ‹Ni nui ta a ɠɛɛna kɛɛɠɛ ɓaa dee ma: Nii nà la kɛ ga ɗa-ɓɔbai, naa ɠɛa ga vebɛani GALA bɛ,› 12naazu, wo la mɔ ma nu yɛsu ná, é ʋa faa ɠɛ kɛɛɠɛ ɓaa dee ʋɛ. 13Ʋele ɠana wo GALA daawooi zeɠezu la ma, ga wa-vaa wɔlɔmaiti niiti wo ti veezu ɓɔɠɔ ya. Wa naa ɠɛɠala vai ma mɔinmɔin kɛɛzu.»
Ani niiti ti nui ɠɔzɔzu
(Matiyo 15:10-20)
14Naa ʋoluma Yesu bɛbɛi lolini ʋolu, é ɠɛ ma: «Wo pɛ à woilo gòoi ma, wo gaaɠa ga pagɔ. 15Nii kpein é zeɠezu kamaʋoluʋɛ, é lɔ nui ɠoozu, naa lɛi a ɗa kɔzɔ. Kɛlɛ nii mu é ɠulazu nui yiimaʋɛ, naa ɠa a ɗa kɔzɔ. 16[Zɔi faa mɛni goiyeɠe ba, naama nui nii mɛni.]»#7:16 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu.
17Siɛgi zu Yesu zeɠeni la bɛbɛi ʋolu, é lɛ pɛlɛi wu, ná-kaladopoiti ti gaazaɠani naama vaalaalii ʋoluʋɛ ma. 18É ɠɛni ti ma: «Koo, wɔun, wa ɓalaa wo la faa ɠaaɠaazu ɓaa? Wo la gaaɠaazu ga nii kpein é zeɠezu kamaʋoluʋɛ, é lɔ nui ɠoozu, naa tanɔpɛ ge la zooga nui ɠɔzɔzu. 19Tɔɔzei naa tanɔpɛ ge la lɔɔzu ziimaʋɛ, kɛlɛ toɠa liizu kogi zu, naa ʋoluma, é ʋili ya dɔɔɠuzuʋɛ.» (Kɛai ma naama wooiti bosu, é ɠɛni dɛɛzu ga daamianigiti pɛ ɲadegɛ.)
20É zɛba é ɠɛ ti ma ʋolu: «Nii é ɠulazu nui zu, naa ɠa a ɗa kɔzɔ. 21Tɔɔzei nui ɠoozuʋɛ, ziimaʋɛ ɠa kisiɛ ɲɔiti ta ɗa zeɠe ná, niiti ti diizu koloɠologi ta unmai ma, naa ʋɛɛ nu ʋaa vai 22ta wɛɛnziɛgi ʋa, ta koozu yii, ta suɲɔulai, naa ʋɛɛ yaavai ta ɓaaɠulama vai ʋa, ta toloi, ta tɔɠɔ ɠoloɠologi, naa ʋɛɛ wasogi ta ɠimalala vai ʋa. 23Naama vaa ɲɔiti pɛ ta zeɠezu nui yiimaʋɛ, ti ɗa kɔzɔ.»
Kidaaleʋei é ɠɛni anzanui ya, é la ga Zuifui ta
(Matiyo 15:21-28)
24Yesu zeɠeni miná, é li Tiil yooi zu. É lɛɛni pɛlɛi ta wu, é la ɠɛni pɔ ga nu ʋa suɠwɛɛ ga toɠa ná, kɛlɛ é la ɠɛni zooni é ʋa yɛ dɔɔɠui zu. 25Tɔɔzei é ʋaani nɔ feya, anzanui ta maawoo mɛnini, nii kɔzɔba yɛnvui ɠɛni ná-doun anzanui zu. É ʋaani gaamago nɔ Yesu ʋɔ bɛ, é loo kɔɠɔwu. 26É ɠɛni ga zii ɠili anzanu, sɔlɔɔgai Fenisi ɠoʋii ma, Siili yooi zu. É Yesu maanɛɛnɛni ga naa inɛgi ɓɛ, nii é ná-doun anzanui zu.
27Yesu gooɠaaʋoteni, é ɠɛ ma: «Ɓe doungoiti ba dɛ, ti yiɠo, tɔɔzei maa la nɛɛni ga nu doungoiti kɔnɔgi ɠula ti ya, é pili gilɛ goiti bu.» 28Anzanui ɠɛni ma: «Gaama ʋe, Màliɠii, kɛlɛ gilɛ goi niiti ti daami wosuʋɛ ɠoba, ta ɗa daamiani kpulukpulu koiti mi, niiti ti ɠulazu doungoiti zeewu, ti loo zooi ma.»
29Yesu gooɠaaʋoteni, é ɠɛ ma: «Naama wooi maaʋele ma, li ɗa-ɠoizu, inɛgi ɠulaa è-loun anzanui zu.» 30Anzanui ɠaleni ma ná-koizu. É pɛtɛni ga ná-doun anzanui ɠa laani betei zu, inɛgi ɠulaai niina su.
Yesu zunui ta ɠɛdɛ fai, nii é ɠɛni ga ɓoɓoi
31Yesu zeɠeni Tiil yooi zu, é leʋe ga Sidɔn ʋele, é Taa Wola Puugɔi ma yooi maaleʋe, é zeeli Galilé ɗɛ wolai ma. 32Ti ʋaani pɔ ga goizuɓɔlɔ nui, é ga ɓoɓoi, ti maanɛɛnɛni ga é yeela ma. 33Yesu kulani bɛbɛi zaama, é ti felegɔ maaɠelesa teʋe. Kpegai ma ga yeeɓeɠaiti dɔ naa woiyeɠeiti su, é laaɗɛi ʋuuni ya, é fɔɔɠu naa nɛgi ʋa. 34Naa ʋoluma, é ɠaazulɛɛni geezu, é yɛnvu fɛɛ, é ɠɛ ma: «Ɛfata.» Naa ʋoluʋɛ ɠa ga: «Ɗa ʋe de, laalao!» 35Gaamago, zunui naa woiyeɠeiti daalaoni, nɛgi vie, é ɗa kpɔɛi zuɠula su ɠɛ kala.
36Zɔiti ti ɠɛni ná ɠobaʋɛ, Yesu ti laa maaɓakpani ga ti mina faa nɔpɛ bo nu ma. Kɛlɛ tɔun a la ɠɛna pele leʋega ti luɠɔ ga ti mina bo, naati mu ti ɠɛni liizu nɔ ga daazeelia. 37Bɛbɛi laavɔɔni ga gola, ti ɗa ɠɛ ma: «Nii pɛ é kɛɛzu, ti pɛ pagɛ ga gola! Toɠa goizuɓɔlɔ nuiti goiyeɠeiti daalaosu, é ɗa ɓoɓoiti daaʋɛti fie, ti ɗa ɓɔɛ.»
Currently Selected:
Maleke 7: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
