Maleke 6
6
Nazalɛte nuiti ti ɠɛlɛ vai Yesu ʋa
(Matiyo 13:53-58; Luke 4:16-30)
1Yesu zeɠeni miná, é li taai naa zu, ʋɛ é kulasui woni ná, ná-kaladopoiti ti ɠɛni polu. 2Dooɠo foloi, é tɔɔzeini ga kalagi woga GALA dɛbi ʋɛlɛi wu. Niiti ti ɠɛni woilosu gooi ma, naa ma mɔinmɔin daavɔɔni, ti ɗa ɓɔɠɔ ɠaazaɠa ga: «Mini ɠa é niima vaiti pɛ sɔlɔɔgai ná? Mini ɠa é niima ɠimalai zɔlɔɔgai ná, ta zobogi nii é laavɔɔ vai niiti kɛɛzu la? 3Gulu zaɠa nui la ga nii, Mali ná-doun zunui, Zake, Zoze, Zude, ta Simon ti-liɛi? Baazeelaiti tɛi ti ʋa ɠɛ ade zaama?» Naa ɠa é ɠɛɛni ga zaɓui ti la ɠɛni laani da.
4Yesu ɠɛni ti ma: «GALA goo wo nui ɓɔɠɔ yooi, ta ná-pɛlɛyeɠei wu nɔ ɠa, sɔlɔɔ nuiti saama, é la ɗa ga unfema zɔlɔɔ ná.» 5É la ɠɛni zooni é ʋa laavɔɔ vaa ɠɛ ná, é ɠula seeɓɛ nu ɠilagilagiti polu, niiti é yeelaani ti ma, é ti ɠɛdɛ. 6Gola laavɔɔni ga naati ta-ɠidaaleʋelalai.
Keela puugɔ maazu felegɔiti (12) teʋe fai
(Matiyo 10:5-15; Luke 9:1-6)
Yesu ɠɛni leʋeteʋesu ná maaɠoolii zu laaiti su, é ɗa kalagi wo. 7É keela puugɔ maazu felegɔiti (12) tolini, é ti leʋe keela ziɛgi ma ga nu velefele, é zobogi ve ti ya kɔzɔba yɛnvuiti unda. 8É ti leveni ga: «À mina ani nɔpɛ seɠe siɛi wo fai zu, kɛni tukpɔi ɠila nɔ. À mina ɠɔnɔ seɠe, ɓaa ɓɔlɔ, wo mina ɓalaa wali zeɠe yea. 9À saʋalagiti dɔ ɠɔɠɔa, wo mina seɠewuzeɠe felegɔ zeɠe. 10Pɛlɛ nɔpɛ wo lɛɛzu bu, à yɛ ná, eyɛsu wo zeɠena yeeɠɛɠalai zeeli. 11Ni tama, wa lɛɛna adɛ ta, ʋɛ ti la pɔ ga ti ʋa yeezei wo wu, ɓaa ti ʋa woilo wo-woo ma, à ɠula naa ʋa, wo fufiligi ɓukpunɛ, é ɠula wo-ɠɔɠɔiti ma, é ɠɛ ga zeele wooi ti laalɔɠɔma.»
12Naati ma ti liini, ti Woo Niinɛ Ʋagɔi laazeeli, ga kɛni nu ziɛ ʋelei maavalibo. 13Ti ɠɛni inɛ mɔinmɔin kpɛɛzu, ti ɗa gulɔi ziɛ seeɓɛ nui mɔinmɔin ma, ti ɗa naati kɛdɛ.
Zan Ɓatisete zaa vai
(Matiyo 14:1-12; Luke 9:7-9)
14Masagi Elɔde#6:14 Elɔde: Elɔde Antipase ʋe, nii é ɠɛni ga Galilé you zɛʋɛ ɠundiɠii. Yesu maawooi mɛnini, tɔɔzei naa lɔɠɔi ɠulani adaʋɛ pɛ. Nui tanigaa ti ɗa ɠɛ ma: «Zan Ɓatisete ɠa buzeɠeai, é ɠula saai ya. Naa ɠa é kɛɛzu, é laavɔɔ vaiti kɛɛzu la.» 15Taɠiligaa ti ɗa ɠɛ ma: «Eli ʋe.» Zɔiti ti ɠɛ ma: «GALA goo wo nui ta ʋe, eɠɛ GALA goo wo nu wɔlɔwɔlɔgi ta.» 16Elɔde letemazu, siɛgi zu é naama wooiti mɛnini da, é ɠɛni ɠɛɛzu ɓɔɠɔ ma: «Zan nii gè devei veeni ga unteʋe, naa ɠa buzeɠeai, é ɠula saai ya!»
17Tɔɔzei kaite Elɔde devei veeni ga ti Zan zo, ti gili, ti pili kasoi ɠa, naa lɔɔzei kɛɛɠɛloin Filipe anzai Elɔdiade zei vai ʋa bɛ ga anza. 18Mazɔlɔɔ Zan ɓena ɠɛ Elɔde ma: «Tɔgi la vaani bu ga è ʋa è-ɠɛɛloin anzai zeɠe ga è-anza.»
19Elɔdiade wanagi lɔɔni Zan laalɔɠɔma, é ɠɛni keleɠele gaiziɛzu ga é naa ʋaa, kɛlɛ é la ɠɛni ma zobo sɔlɔɔsu. 20Tɔɔzei Elɔde ɠɛni luazu Zan ʋa. É ɠɛni kwɛɛni ga naa ɠa ga telebo nu, ɲadegai. Naa ɠa é kɛɛni é ɠɛni ɓaazu naa maazu. A la ɠɛna naa woomɛniga, é ɓena ɠɛ kidaaʋiligi zu. Tama wɔin ɠɛni ma ga é ɗa naa woomɛni.
21Kɛlɛ é ɠɛni ga yeeta, Elɔdiade yeeɠɛɠala zɔlɔɔni, Elɔde zɔlɔɔ foloi ma ɠona pilɛda yeei. Elɔde fɛti wolai ɠɛʋele ɓɛtɛni naama voloi, ná-botiɠɛ nu wolaiti bɛ, ta ná-salaʋusu ɠundiɠiiti, naa ʋɛɛ Galilé nu wolaiti pɛ ba. 22Ti ɠɛai ma fɛtii ɠulazu, Elɔdiade ná-doun anzanui kuai woni. Elɔde ta niiti ti lolini fɛtii ɠulazuʋɛ, ti wola ɠoozunɛɛni. Masagi zɛba é ɠɛ anzalopoi ma: «Nii nɔpɛ è pɔ ga gè fe è ʋɛ, bo mà, nà fe è ya.» 23É ɠonani vɔlɔ naa ʋɛ, é ɠɛ ma: «Nii nɔpɛ ɗa fali mà, nà fe è ya, anɛɛ ɓalaa toɠa ɠɛɛzu ga nà-masadai ɠilazuʋɛ pɛ.»
24Anzalopoi ɠulani, é dee ɠaazaɠa, é ɠɛ ma: «Lee ɠa nà fali?» Naa ɠɛ ma: «Zan Ɓatisete nɔungi.» 25Gaamago nɔ, anzalopoi lɛɛni ga gaazuvilɛi, é ziima vai wo, é ɠɛ ma: «Nà pɔ Zan Ɓatisete nɔungi zeeli mà ʋɛ ɠaniɠani koi nɔ, aniɲaka lazakalagi zu.»
26Naa masagi wola yiiɓɔlɔni. Kɛlɛ ná-konai maaʋele ma é boni, ta nui niiti é ti lolini fɛti ɠula vai ma, é la ɠɛni pɔ ga é ʋa ɠɛlɛ ná-minazeɠegi laazeelizu naa ʋɛ. 27Gaamago nɔ, é salaʋusui ta leveni ga é ʋaa ga Zan nɔungi. Naa liini, é Zan nɔungi leʋe ba kasoi ɠa. 28É ʋaani ga Zan nɔungi aniɲakai zu, é fe anzalopoi ya, é lii la, é fe dee ya. 29Zan ná-kaladopoiti ti naa mɛnigai ma, nii kɛai, ti ʋaani, ti ma ʋoomai zeɠe, ti maaɠulu kabayeɠei ta zu.
Yesu zunu waadɔɔlugɔi (5.000) ɠɔnɔkula vai
(Matiyo 14:13-21; Luke 9:10-17; Zan 6:1-14)
30Keelaiti paai ma, ti zeɠe siɛi ma, ti ɠaalɛɛni ba Yesu ɠobaʋɛ, ti ʋoluvaawo ma ga nii pɛ ti kɛai, ta kalagi nii pɛ ti feeni nuiti zea. 31Yesu zɛba é ɠɛ ti ma: «À ʋilɛ pòlu, ade li adaʋɛ ta, ʋɛ ná maaɠelesa teʋeai, wo lago looɠo ná.» Tɔɔzei nu mɔinmɔin ge ɠɛni lɛɛzu, ti ɗa yei, naa maaʋele ma ti la vɔlɔ ɠɛni yeeɠɛɠala zɔlɔɔsu, ti ʋa daami wo. 32Ti zɛba ti zeɠe ná, ti lɛ keingi zu, nii a kɛ ti li teʋebai ta zu.
33Kɛlɛ nu mɔinmɔin ge ti ɠaani, ti ɠwɛɛsu ɠaani ti ʋa, ti liizuʋɛ. Nuiti ti ɠulani taaiti pɛ su, ti ɗa ɓizɛ ɠɔɠɔa, ti to da ti luɠɔ naama adaʋɛ, ʋɛ ti ɠɛni liizu ná. 34Yesu ɠulaai ma keingi zu, é bɛbɛ wolai ɠaani. Naati maawɔin soni, tɔɔzei ti ɠɛni eɠɛ baalagiti niiti makɛ nu la ti ʋɛ. É zɛba é tɔɔzei ga kalagi woga, é lɛbi ga.
35Foloi ɠɛnina liizu. Ná-kaladopoiti ti maaɓuɠani ba, ti ɠɛ ma: «Ʋɛ ɠa ga teʋebai zu, foloi lia. 36Bɛbɛi ɠaaɠale ma, ti li ʋɛ ɠoba ɓalaɠaiti ta taa goiti su, ti ɠɔnɔ geya ɓɔɠɔ ʋɛ.»
37Kɛlɛ Yesu ti wooɠaaʋoteni, é ɠɛ ti ma: «Wa ɓɔɠɔi à ɠɔnɔ fe ti ya.» Ti ɠɛni ma: «Gi liina mu, gi wali ɠae unfelegɔ (200) ɓulu ɠeya, gi fe ti ya, ti mi?»
38Yesu ɠɛni ti ma: «À li, wo ná ɠaa. Ɓulu lielegɔ ɠa é wo ya?» Ti liini, ti gaazaɠagi wo, ti ʋa, ti ɠɛ ma: «Ɓulu lɔɔlugɔ ɠa é ná, naa ʋɛɛ kale felegɔ ʋa.»
39É zɛba é devei ve ti ya ga ti nuiti sei kpifɔkpifɔ tufa lɛnugi zu. 40Nuiti ti zeini kpifɔkpifɔ ga nu ungilagila (100), puulɔɔludɔɔlu (50). 41Yesu ɓulu lɔɔlugɔi ta kale felegɔiti seɠeni, é ɠaazulɛ geezu, é mama fee ƓALA falii wo. Naa ʋolu é ɓuluiti kpulukpuluni, é ma ɓuɠaiti fe kaladopoiti zea ga ti gaaɠwɛ bɛbɛi ʋa. É kale felegɔi ɓalaa gaaɠwɛɛni ɛsɛ pɛ ba. 42Ɛsɛ pɛ ge daamii woni, ti yiɠo. 43Kaladopoiti ti ɓulu ɓulukpulugi mɔtai ɠaalɛɛni ba ta kalei mɔtai, é ɠɛ ga kpɔlɔ puugɔ maazu felegɔ (12). 44Tama zɔiti ti ɓului naa miini, ti-liegɔi a la ɠɛ ga zunu waadɔɔlugɔ (5.000).
Yesu ziɛ vai ziɛi ɠa
(Matiyo 14:22-33; Zan 6:16-21)
45Naama vai ɓeni nɔ feya, Yesu ɓɔini ná-kaladopoiti da ga ti lɛ keingi zu, ti to da tuɠɔ, ti li ga ziɛ ʋoluʋelei, Ɓɛtesayida ʋele, naama ziɛ su, é ɗa bɛbɛi ɠaaɠale ma. 46É valiai ma ti ma, é lɛɛni gizei ma ga é GALA fali. 47Kpidii ʋɛai ma, keingi ɠɛni niina ziɛ zaamaʋɛ, Yesu ɠila kpe ka é yɛni kakei ma. 48É kaani ga ná-kaladopoiti ta wola ɓɔlɔzu ga keingi ɓizɛ vai, tɔɔzei fiilɛi ɠɛni ti laaɠomisu. Gosu yeeɠɛɠalai, é liini ga ti ʋɔ pelei, é ɗa ziɛ ziɛi ɠa. É ɠɛni ɠɛɛzu, é leʋe ti ʋa. 49Ti kaai ma, é ɗa ziɛ ziɛi ɠa, é ɠɛni ti ɠisu ga gɔvɛ mɔtai ta ʋe. Ti ɠɛni kpeei loozu. 50Tɔɔzei ɛsɛ pɛ ge kaani, dualuagi lɔ ti pɛ su. Kɛlɛ gaamago Yesu ɓɔɛni ti ʋɔ, é ɠɛ ti ma: «À zɛbɛzeɠe, nà ʋe de. À mina lua!» 51É zɛba é lɛ ti ɠoba keingi zu. Fiilɛi zuleʋe kpe. Ti wola laavɔɔni. 52Mazɔlɔɔ ti la ɠɛni ɓului ma laavɔɔ vai ɠaaɠaani, tɔɔzei ta-ɠikpaai ʋa.
Yesu seeɓɛ nuiti balo vai Zenezalɛte ɠoʋii ma
(Matiyo 14:34-36)
53Ti ziɛi ɓudɛai ma, ti zeelini Zenezalɛte yooi ma, ti ta-ɠeingi laalɔni kakei ma. 54Ti ɠulani nɔ feya keingi zu, gaamago bɛbɛi ɠwɛɛsu ɠaani Yesu ʋa. 55Ti leʋeteʋeni naama yooi zu ná pɛ. Ti tɔɔzeini ga ti ʋa pɔ ga seeɓɛ nuiti kpaɠalaɓaɠalaiti ma, ʋɛ nɔpɛ ta la mɛnina ga toɠa ná. 56Ʋɛ nɔpɛ a la li ná, taa goiti, taa wolaiti, ta ɓalaɠaiti su, ti ɠɛni ʋaazu pɔ ga seeɓɛ nuiti dɔɔɠɔ ɓalagiti su. Ti maanɛɛnɛni ga ti vɔɔɠu nɔ ná-seɠei laamaʋɛ ʋa. Tama zɔiti pɛ ti ɠɛni vɔɔɠuzu ba, ti ɠɛni ʋalozu.
Currently Selected:
Maleke 6: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
