Maleke 16
16
Yesu wuzeɠe vai é ɠula saai ya
(Matiyo 28:18-20; Luke 24:1-12; Zan 20:1-10)
1Dooɠo foloi leʋegai ma, Magedala nui Mali, naa ʋɛɛ Zake dee Mali ʋa, ta Salomé, ti tufa maku nɛɛnɛgiti geyani, nii a kɛ ti li, ti siɛ Yesu ma ʋoomai ma. 2Dɔɔɠɔi ma volo mɔungi sobuzobui, ti liini kabalaʋɛ, woza seɠezuʋɛ ma. 3Ti ɠɛni ɓɔɠɔ ɠaazaɠasu ga: «Ɓɛ ɠa a kɔtui ɠilikili ade ʋɛ, é seɠe kabai la?»
4Kɛlɛ siɛgi zu ti ɠaazuwuzeɠeni la, ti kaani ga kɔtu zɛbɛlɛ golai ɠilikiligɛ, é zeɠe kabai la. 5Ti lɔɔni kabayeɠei zu, ti wɛlɛ, ti zinipoi ta ɠa, é zeini ga nu yeezazu ʋelei, maaɠiliai ga seɠe ɠole pepegi. Ti wola luani.
6Kɛlɛ zinipoi ɠɛni ti ma: «À mina lua. Nazalɛte nui Yesu ɠa wo gaiziɛzu, nii ti kpadɔni saa wului ma. É la mɔ ʋɛ, é wuzeɠea, é ɠula saai ya. À ʋa, wo wɛlɛ, ʋɛ é ɠɛa laani ná. 7À li niina, wo bo ná-kaladopoiti ma ta Piyɛlɛ ɓalaa ma, wo ɠɛ ti ma: ‹É toga da wo luɠɔ Galilé yooi zu, miná ɠa wa ka ná, eɠɛʋelei é boni la wo ma.› »
8Ti ɠulani kabayeɠei zu, ti ʋela, tɔɔzei ti zu ɠɛni ɓalizu ga duai. Ti la faa woni nu nɔpɛ ma, tɔɔzei ti ɠɛni luazu.
Yesu ɓɔɠɔ lɛɛ vai ga Magedala nui Mali
(Matiyo 28:9-10; Zan 20:11-18)
9 # 16:9-20 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu. [Yesu wuzeɠeai ma, é ɠula saai ya dɔɔɠɔi ma volo mɔungi sobui, é ɓɔɠɔ lɛɛni dɛ ga Magedala nui Mali, nii kaite é inɛ dɔfelaiti kpɛɛni su. 10Naa liini, é naama wooi wo zɔiti ma, ti ɠɛni ga Yesu ná-siɛpoluiti, ti gaazuɠilii zu, ti ɗa wɔlɔ. 11Ti mɛnigai ma ga toɠa vulua, ta Mali pɛtɛgɛ, ti la ɠɛni laani da.
Yesu ɠula vai kɛlɛma kaladopo felegɔiti bɛ
(Luke 24:13-35)
12Naa ʋoluma é ɓɔɠɔ lɛɛni ga kaladopo felegɔ kɛʋelei taɠili su, naati ti ɠɛni pelei ma, ti ɗa li ɓalaɠai zu. 13Naati felegɔ ɓalaa ti ɠaleni ma, ti ʋa ti bo zɔiti ma, kɛlɛ ti la laani ɓalaa naati gooi la.
Yesu ɓɔɠɔ lɛɛ vai ga kaladopo puugɔ maazu ɠilagiti (11)
(Matiyo 28:16-20; Luke 24:36-49; Zan 20:19-23; Kɛɛwotiiti 1:6-8)
14Gaaɓelagi zu, é ɓɔɠɔ lɛɛni ga kaladopo puugɔ maazu ɠilagiti (11), siɛgi zu ti ɠɛni daami wosuʋɛ la. É zeliloni ti ma ta-ɠidaaleʋelalai ta ta-ɠikpaai vai zu, tɔɔzei ti la ɠɛni laani naama nuiti da, niiti ti kaani, buzeɠeai ma, é ɠula saai ya. 15Naa ʋoluma é ɠɛni ti ma: «À li eteai zu ná pɛ, wo Woo Niinɛ Ʋagɔi laazeeli nuɓusɛi pɛ ma. 16Zɔi a ɠidaaleʋena, é ɓatize, naa ɠa ɠizo, kɛlɛ zɔi é la ɠidaaleʋeni, naa undaa ɠa ʋili. 17Wɛlɛ laavɔɔ vai niiti ka ta ʋilɛ naama nuiti polu, ti ʋaazu ɠidaaleʋezu mà: Nɔ̀un daaseigi zu, ta inɛgiti kpɛ, ta ɠɛ ɓɔɛzu zii woo ɠiligiti su, 18ta ɠɛ kaaliiti sosu ga yeei, ti nu ʋaa ani ɓɔle ʋa, faa nɔpɛ ge la ti ɠaa, ta yeela seeɓɛ nuiti ma, naati ti ɗa ɠɛdɛ.»
Yesu lɛɛ vai geeɠɔlɔgi zu
(Luke 24:50-53; Kɛɛwotiiti 1:9-11)
19Maliɠii Yesu ɓegai ma ga ɓɔɛ ti ʋɔ ɠana, é lɛɛni geeɠɔlɔgi zu, é zei GALA zeezazuʋɛ. 20Kaladopoiti ma ti liini, ti ɗa Woo Niinɛ Ʋagɔi laazeeli adɛ pɛ. Maliɠii ɠɛni botii ɠɛɛzu ga ti maaʋele, é ɗa ti-wooi maaɓakpa ga laavɔɔ vaiti, niiti ti ɠɛni ʋilɛsu ti-wooi ʋolu.]
Currently Selected:
Maleke 16: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
