Matiyo 24
24
GALA sei ʋɛlɛi ɠoloɠolo fai
(Maleke 13:1-2; Luke 21:5-6)
1Yesu ɠulani GALA sei ʋɛlɛi wu, é ɗa li. Ná-kaladopoiti ti maaɓuɠani ba, ga ti dɛɛ la, ʋelei GALA sei ʋɛlɛi lo pele ʋagai la. 2Yesu zɛba é ɠɛ ti ma: «Kɛbɛ tama wa niiti pɛ kaazu, kɛlɛ? Gè bo wo ma ga gaamai, kɔtu ɠila kpalaa ge la yɛga laani bɔɔla maazu, ti pɛ ta lokasu.»
Maanɔɠɔiti ta faaɓaagiti
(Maleke 13:3-13; Luke 21:7-19)
3Tɛi é ɠɛni zeini Wolive wulu ɓelei ma ɠizei ma, ná-kaladopoiti ti maaɓuɠani ba yɛ, ti gaazaɠa, ti ɠɛ ma: «Bo dɛɛ gi ma, yeelɛ ɠa naama vai ʋaazu ɠɛɛzu la? Naa ʋoluma poogi ma ɓɛgele ɠa, nu a kwɛɛ da ga è ʋaa vai ʋolu ta etea ɠaaɓela foloi maaɓuɠaa?»
4Yesu ti wooɠaaʋoteni, é ɠɛ ma: «À dama, nu nɔpɛ ge mina wo ɠaka. 5Tɔɔzei nu mɔinmɔin ka kpɛtɛ ɠisu ga ti ʋa dàaseigi zu, ti ɗa ɠɛ ma: ‹Nà ɠa gè ga Kilista,› ta nu mɔinmɔin kaka. 6Wa kɔɔiti maawoo ta kɔɔiti maalugi mɛni. À mina ɓɔɠɔ yɛ ziiɓɔlɔi zu. Mazɔlɔɔ kɛni naama vaiti ti ɠɛ, kɛlɛ naa lɛi é ʋa ɠɛ ɠɛɛzu ga gaaɓelagi. 7Mazɔlɔɔ zii ta ɠa wuzeɠe bɔɔla zii laalɔɠɔma, masadai ta ɠa wuzeɠe bɔɔla masadai laalɔɠɔma. Pulu wolaiti ta ɗa loo, ta zou ɓaliiti ti ɗa ɠɛ ada mɔinmɔin. 8Kɛlɛ naa ɠa ɠɛ nɔ eɠɛ doun zɔlɔɔ koozuwanai lɔɔzeizuʋɛ.
9«Naazu ta wo lɔ nuiti zeezu, ti ɗa wo ɓɔlɔ ta ti ɗa wo ʋaa. Ziiti pɛ ta wo wɔinzeɠe nɔ̀un maaʋele ma. 10Naa maaʋele ma nu mɔinmɔin ka ɠɛlɛ kidaaleʋei ʋa. Ti ɠilagilagiti ti ɗa ɓɔɠɔ yaava, ta ti ɗa ɓɔɠɔ wɔinzeɠe. 11Zɛɛ ɠala goo wo nu mɔinmɔin ka ʋa, ti ɗa nu mɔinmɔin kaka. 12Faa ɲɔi ɠaawɔɔlɔ ʋelei ma, nu mɔinmɔin ná-nɛɛbɛi ɠaa ɠa lɛi tɔɔn. 13Kɛlɛ zɔi a lo kpaan eyɛsu gaaɓelasuʋɛ zeeli, naa ɠa ɠizo. 14GALA ná-masadai ma Woo Niinɛ Ʋagɔi nii laa ɠa zeeli eteai zu ná pɛ, nii a kɛ nuɓusɛiti pɛ ti ma zeele wooi mɛni. Naa ʋoluma fai pɛ gaaɓelasuʋɛ ɠa ʋa niina.
Faa ɲɔu maayikiyikigi
(Maleke 13:14-23; Luke 21:20-24)
15«Siɛgi zu wo kɔzɔba vaa wolai ɠaazu la, nii GALA goo wo nui Daniyɛle ná-fai woni, é ɗa ɠɛ ada ɲadegai»#24:15 Wɛlɛ ʋɛti: Dan 9:27; 11:31; 12:11. (zɔi é sɛʋɛi nii ɠalasu, naama nui dama, é gaaɠa ga pagɔ), 16«naama yeeɠɛɠalai, zɔiti ta ɠɛ Zudé, naati ti ʋela, ti lɛ gizeiti ma. 17Ni nui ta a ɠɛna dooɠo bosuʋɛ ná-pɛlɛ ɠɔmaʋɛ, é mina yei ɠasɔ zeɠezu pɛlɛi wu. 18Zɔi ɓalaagi a ɠɛ kpalagaʋɛ, naa mina ɠale ma lɛɛzu taazu, ná-seɠe wolai zeɠe vai zu. 19Naama voloiti su, maanɔɠɔi ɠa ɠɛ koma anzanuiti bɛ ta zɔiti ti ɲiimi veezu! 20À GALA maanɛɛnɛ ga wa-ʋelai mina zoloo samai ma, ɓaa dooɠo foloi ta ma. 21Tɔɔzei naama ziɛgi zu, kidaaʋiligi wola ɠa ɲɔu, nii kaipa eteai lɔɔzei yee ma, kɛɠala la dɛ ɠɛɛni, nii eyɛsu ɠɔ nu la mɔ kɛɠala ɠa pɛ. 22Gaamazu, ni GALA ge la ɠɛni deveni ga é ta ɠula naama voloiti tiegɔi la, nu nɔpɛ ge la ɓena ɠizo. Kɛlɛ, nui niiti é yiimazeɠeai ga tiye, naati maaʋele ma, toɠa ta ɠula naama maanɔɠɔi ma yeeɠɛɠalai la.
23«Ni nui ta a ɠɛɛna wo ma: ‹À wɛlɛ, Kilista ɠa ʋɛ!›, ɓaa: ‹Toɠa munu!›, à mina la da. 24Tɔɔzei zɛɛ Kilistaiti ta zɛɛ ɠala goo wo nuiti ta ʋaazu ɠulazu kɛlɛma, ti ɗa laavɔɔ vaa wolaiti ta maaɓɛlɛ vaa wolaiti kɛ, nii a kɛ ti nuiti yaava, ni toɠa zoo ɠɛɛzu vɔlɔ, ti naati yaava, niiti GALA ge yiimazeɠeai ga tiye. 25Wɛlɛ, gè wo loa ɠisu ma yeeluɠɔ.
26«Ni ta ɠɛɛna wo ma: ‹À wɛlɛ lɛɛ, toɠa teʋebai zu,› à mina li ná pa! Ɓaa ti ɠɛ wo ma: ‹Toɠa pɛlɛ ɠoozu ʋɛlɛi wu,› à mina la naa tanɔpɛ da. 27Tɔɔzei siɛgi zu Nu ná-Doun Zunui a ɠɛna ʋaa la, paa vai ɠa ɠɛ eɠɛ mainmain nii a ɗa ɠula folo ɠulazu ʋelei, é ɗa volo eyɛsu folo liizu ʋelei. 28Ʋɛ nɔpɛ ani ʋoomai ná, miná ɠa ɗuaiti ta ɗa ɠaalɛ ba ná.»
Nu ná-Doun Zunui ʋaa vai ʋolu
(Maleke 13:24-27; Luke 21:25-28)
29«Naama ɠidaaʋili foloiti ta leʋena nɔ feya,
foloi zu ɠa ɓidi,
alugi la mɔ ná-wozakalagi vea.
Somideɠaiti ta ɠula geeɠɔlɔgi ʋa, ti loo bu,
geeɠɔlɔgi zu zɛbɛiti ta ɲiikpi.
30«Naa ʋoluma, Nu ná-Doun Zunui ná-poogi ɠa ɠula kɛlɛma niina geezuʋɛ. Eteai zu nuɓusɛiti pɛ ta ɗa wɔlɔ niina. Ti zɛba ti Nu ná-Doun Zunui ɠa, é ɗa ʋa geeɠɔlɔgi ma lonaɓiingiti maazu ga zɛbɛi ta lɛbiya wolai. 31Naa ʋoluma puʋugi ɠa vɛɛna, toɠa ná-geezuɠeelaiti teʋe eteai ɠɔlɔkɔlɔma ná pɛ, ti ná-nuiti gaalɛ ba, niiti é yiimazeɠeai ga tiye, é zo zou ɓela ga, é li zou ɓela ga.»
Kalagi nu a sɔlɔɔ kooleɠoole gului ʋa
(Maleke 13:28-31; Luke 21:29-33)
32«Kooleɠoole gului ná-poogi ɠɛ wo ʋɛ ga kalagi: Siɛgi zu ma ɓekegiti ti ɠɛɛzu la yɔɠɔɓɔ, gaalaagi ma lɛnugiti ti ɗa lɛ ga, wo kwɛni naazu ga foɠoi maaɓuɠaa. 33Ʋele nɔ ɠana é la, siɛgi zu wo niima vaiti pɛ kaazu la, ti ɗa ɠɛ, à kwɛɛ ga Nu ná-Doun Zunui maaɓuɠaa pɛlɛlaʋɛ ʋa. 34Gè bo wo ma ga gaamai, yamanii nii la ɓega ga leʋe, eyɛsu niima vaiti pɛ ti ɗa ɠɛ. 35Geeɠɔlɔgi ta zooi ta leʋe, kɛlɛ nɔ̀un daawooiti ti la leʋega pɛ.»
GALA gila kpe ka é etea ɠaaɓela foloi ɠwɛɛ
(Maleke 13:32-37; Luke 17:26-30, 34-36)
36«Nii é ga foloi ta yeeɠɛɠalai nii naama vai ʋaazu ɠɛɛzu la, nu nɔpɛ ge la naa ɠwɛɛ. Geezuɠeelaiti ti la kwɛɛ, Nu ná-Doun Zunui ɓɔɠɔi ɓalaa ge la kwɛɛ, kɛni Ɠɛɛɠɛ GALA gila kpe nɔ ɠa é kwɛɛ. 37Siɛgi zu Nu ná-Doun Zunui ɠɛɛzu ʋaazu la, faiti ta ɗa ɠɛ, eɠɛʋelei é ɠɛni ɠɛɛzu la Nowe ná-yeeɠɛɠalai zu. 38Tɔɔzei yeeɠɛɠalai nii é leʋeni ziɛve golai luɠɔ, nuiti ti ɠɛni daamii wosu, ti ɗa kpɔɔleiti bo, ti ɗa anzaiti fulu ɓɔɠɔ ʋɛ ta ti-lointi bɛ, eyɛsu naama voloi zeeli, yeei Nowe lɛɛni la keingi zu. 39Ti la vɔlɔ ɠɛni inɛinɛni ga faa tanɔpɛ, eyɛsu ziɛve golai ʋa, é ti pɛ undaaʋili. Ʋele nɔ ɠana é ʋaazu ɠɛɛzu la, siɛgi zu Nu ná-Doun Zunui ʋaazu la. 40Naazu nu felegɔ ɠa ɠɛ botii ɠɛɛzu ʋɔɔma kpalagaʋɛ, gilagi ɠa zeɠe, zɔi yɛ ná. 41Nu felegɔ ɠa ɠɛ ɠɔnɔgi ziɠazu ʋɔɔma, gilagi ɠa zeɠe, zɔi yɛ ná.»
42«À ɠaazuɓa mu, tɔɔzei wo la kwɛni, yeei wo-Maliɠii ʋaazu la. 43À nii ɠaaɠa ga pagɔ: Ni pɛlɛ kɛɛɠɛi ɠɛni kwɛɛni yeeɠɛɠalai kpidii zu unma nui ʋaazu la, a la ɠaazuɓa, nii a kɛ é mina ná-pɛlɛi yɛ ná, naa ʋa daaɠale. 44Naa ɠa é ba, wa ɓalaa, à ɠɛʋele ɓɛtɛ, mazɔlɔɔ Nu ná-Doun Zunui ɠa ʋaazu yeeɠɛɠalai ta ma, nii wo la vɔlɔ ɠisiɛni su pɛ.»
Botiɠɛ nu ʋagɔi ta botiɠɛ nu ɲɔi
(Luke 12:41-48)
45«Botiɠɛ nui ɓɛ ɠa mu é ga wooɠɛɠila nui, ta keleɠelegai, nii maliɠii seiɗai ná-botiɠɛ nuiti unda, nii a kɛ é ɠɔnɔgi ve ɛsɛ zea, yeeɠɛɠalai ma nii soloogai? 46Undaanɛ nu ɠa ga naama wotiɠɛ nui, siɛgi zu maliɠii ʋaazu la, é ka, é ɗa naa ɠɛ, nii ma levei veai zea. 47Gè bo wo ma ga gaamai, maliɠii ɠa sei kɔligiti pɛ unda. 48Kɛlɛ ni toɠa ga botiɠɛ nu ɲɔi, é zɛba é ɗa ɠɛ ɓɔɠɔ ma: ‹Màliɠii la ʋaazu fala,› 49é tɔɔzei niina ga é ɗa ná-botiɠɛɲɔɠɔiti doɠa, é ɗa daami wola wo, é ɗa dɔɔi ɓɔle ta dɔɔzo nuiti, 50naazu maliɠii ɠa ʋaazu foloi botiɠɛ nui ɠi ge la ba la, yeeɠɛɠalai nii é la kwɛɛ. 51Maliɠii ɠa faa zei ma ga gola, é so ʋelei nu a ɗa woovele nuiti so da. Miná ɠa gɔlɔi ta ɲiiga ziɛgai ná.
Currently Selected:
Matiyo 24: GDZ
Highlight
Share
Compare
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
