Matiyo 23
23
Yesu Faliziɛinti ta tɔ kalamɔinti peelala vai
(Maleke 12:38-39; Luke 11:43, 46; 20:45-46)
1Naama ziɛgi zu Yesu ɓɔɛni bɛbɛi ta ná-kaladopoiti pɔ, é ɠɛ ti ma: 2«Tɔ kalamɔinti ta Faliziɛinti tosuʋɛ ɠa ga ti wo ɠala ga Moize ná-tɔgi. 3Nii ti bosu wo ma, à naa ɠɛ. Kɛlɛ à mina ʋokɔɠɔ ti-ziɛ ʋeleiti ma. Tɔɔzei tɛnɛgi nii ti bosu, naa lɛi ti ʋa ɠɛ kɛɛzu. 4Ta ɗa kasɔ wuigiti gili, nii seɠezu ɓaai, ti da nuiti kɔma, kɛlɛ tiya ɓɔɠɔgoi ti la vɔlɔ kɛa, ti ʋa yeeɓeɠa goi vɔɔɠu ba, ti ʋa tago pa ɲiikpi. 5Nii pɛ ti kɛɛzu, ta kɛɛzu nii a kɛ nuiti ti ʋa ɗa ti ʋɛtɛ. Naa maaʋele ma, maalaagi nii GALA daawooi ná tanigaa ti ʋu su, é zɛlɛ nui yeei ʋa ɓaa toʋalaʋɛ, tɔnɔiti kpaɠoʋɛ boani tɔnɔ ʋa, ta-zeɠe wolaiti daa ɠeze yiizayiizagiti gola ɠoozakoozagai. 6Ti wɔinʋɛ ga seizu ʋagɔiti fɛti laami wosuʋɛti, ta lɛbiya zeizuʋɛti GALA dɛbi ʋɛlɛiti bu. 7Ti wɔinʋɛ ga ti ɗa ti luʋɔ kɛlɛmaʋɛti, ta ti ɗa ti loli ga ‹Kalamɔn›.
8«Kɛlɛ wɔun, à mina ‹Kalamɔn› laasei pɛɛ ɓɔɠɔ ʋa, tɔɔzei nu ɠila kpe nɔ ɠa é ga wa-ɠalamɔin, wo pɛ wa ga kɛɛɠɛloun ɠila kpegiti. 9À mina nu nɔpɛ toli zooi ma ga: ‹Kɛ̀ɛ›, tɔɔzei wo-Ɠɛɛ ɠa ɠila kpe, nii é geeɠɔlɔgi zu. 10À mina ‹totuɠɔ› laasei pɛɛ ɓɔɠɔ ʋa, tɔɔzei totuɠɔ ɠila kpe nɔ ɠa é wo ʋɛ, naa ɠa é ga Kilista. 11Zɔi é ga nu ɓii golai wo zaama, naa ɠa ɠɛ ga wa-wotiɠɛ nui. 12Zɔi nɔpɛ é ɓɔɠɔ wokomaalɛɛzu, naa maa ɠa yei, zɔi é ɓɔɠɔmaayeizu, naa unbu ɠa zeɠe.»
Yesu zelii lo fai wooveledai ma
(Maleke 12:40; Luke 11:39-42, 44, 47-52; 20:47)
13«Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wa geeɠɔlɔgi ma masadai laaɠulusu nuiti tuɠɔ. Wa ɓɔɠɔi wo la lɔɔzu su, wo la ɓega zɔiti ba, wɔin ti ma, ti ʋa lɔ su. 14[Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wa poanzaiti kɔligiti kulazu ti ya, wo ɗa GALA fali zuɠoozagiti kɛ, nii a kɛ nuɓusɛiti ti ʋa ɗa wo ɠa. Wa-ʋeelalai wola ɠa ɲɔu wo ma.]»#23:14 Wooi niiti ti [ ] kpaku felegɔiti zɔɠɔzu, naati ti la sɛʋɛ wɔlɔmai tanigaa zu.
15«Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wa leʋeteʋesu zooi ta kpoloɗɛi ɠa ná pɛ, nii a kɛ wo zii ɠiligi gila sɔlɔɔ, wo pilɛ wa-ƓALA pelei ma, tama siɛgi zu wo sɔlɔɔsu da, wa ma nu ɠɛɛzu ga undaaʋili doin, é ɲɔu é leʋe wo ʋa ga seizu felegɔ.
16«Maanɔɠɔi ɠa wo ʋɛ, wɔi wo ga totuɠɔiti ti ɠaazuɠoleai! Wa ɗa ɠɛ ma: ‹Ni nu ɠonana GALA sei ʋɛlɛi ma, naa la ga faa nɔpɛ, kɛlɛ ni nu a ɠonana zanugi ma, siaai GALA sei ʋɛlɛi ma, toɠa ma ga kuye ga é naama vai laazeeli.› 17Wɔi wo ga ɠimalala nuiti, ti ɠaazuɠoleai! Ani felegɔi naati su, ɓɛgele ɠa fizɔgai bɔɔla ʋa? Zanugi ʋe, ɓaa GALA sei ʋɛlɛi ʋe, nii é zanugi ɲadesu? 18Wa ɗa ɠɛ ma ɓalaa: ‹Ni nu a ɠonana zalaɠa ɠulazuʋɛ ma, naa la ga faa nɔpɛ, kɛlɛ ni nu a ɠonana zalaɠai ma, nii é laani maazu, toɠa ma ga kuye ga é naama vai laazeeli.› 19Wɔi wo ga gaazuɠole nuiti! Ani felegɔi naati su, ɓɛgele ɠa fizɔgai bɔɔla ʋa? Zalaɠai ʋe, ɓaa zalaɠa ɠulazuʋɛ ʋe, nii é zalaɠai ɲadesu? 20Zɔi é kona wosu zalaɠa ɠulazuʋɛ ma, naa ɠa ɠonazu zalaɠa ɠulazuʋɛ ma, ta zalaɠai nii é laani maazu. 21Zɔi é kona wosu GALA sei ʋɛlɛi ma, naa ɠa ɠonazu GALA sei ʋɛlɛi ma ta GALA nii é zeizu bu. 22Zɔi é konai wosu geeɠɔlɔgi ma, naa ɠa ɠonazu GALA ná-masa kpɔkpɔgi ma, ta zɔi é zeini su.
23«Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wa puusiɛi ɠulazu guluwulugiti ba, ʋelei tufa maku nɛɛnɛgi la ta tufa ɠonai, kɛlɛ wa naati daazu ɠoba, niiti ti ga faa ɓiigiti tɔgi zu: telebodai, gaazumaawɔinɠai, ta wooɠɛɠiladai. Tama naa ɠa maanɛɛni ga wo ɗa kɛ, wo mina fai mɔtaiti da ɠoba. 24Wɔi wo ga totuɠɔiti ti ɠaazuɠoleai! Wa wo ɓɔɔle ɗɛiti kpɛɓɛsu, nii a kɛ ani vulu go nɔpɛ ge mina leʋe wo-ɠɔdaʋɛ, wa ma, wo ɗa ɲɔmɛi ɓɔle.»
25«Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wa wa-ɓɔɔle aniɲakaiti ta daami aniɲakaiti maaʋɛ gbazu fo, tama ti zulaavegai ga unma wo fai ta ɓɔɠɔzotalai. 26Faliziɛinti wɔi wo ɠaazuɠoleai! À kpɔɔle aniɲakaiti ta daami aniɲakaiti suʋɛ ɲade mɔunpa, naa ʋoluma maaʋɛ ɓalaa ka ɲade niina.»
27«Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wo ɠɛɛʋɛ eɠɛ kabai niiti ti ɠobegai, ti ʋagai kɛlɛmaʋɛ, kɛlɛ ti zulaavegai ga gɔvɛiti ti-ma ɠaeiti ta kɔzɔba anii ma zii pɛ. 28Ʋele ɠana wa ɓalaa wo la, kɛlɛmaʋɛ wa ga telebo nu nuiti gaazu, kɛlɛ wo-yiimaʋɛti daavegɛ ga wooveledai ta faa ɲɔiti.»
29«Maanɔɠɔi ɠa wo ʋɛ, tɔ kalamɔinti wa Faliziɛinti, wo ga woovele nuiti! Tɔɔzei wa GALA goo wo nuiti ta-ɠabaiti kpɛtɛzu, wo ɗa telebo nuiti ta-ɠabaiti maanɛɛ, 30wo zɛba wo ɗa ɠɛ ma: ‹Ni gi ɠɛni ná gi-mɛmɛwolani ta-yeeɠɛɠalai zu, gi la ɠɛni ʋɔɔpɛa ti ʋa, gi ʋa ɗa GALA goo wo nuiti paa.› 31Naa maaʋele ma, wo ɓɔɠɔ ɠwɛɛga ga naama nuiti ti-mavofodaiti, niiti ti ɠɛni GALA goo wo nuiti paazu. 32Naa ɠa é ba, à wo-mɛmɛwolani zeeʋogi ɠaaɓela!»
33«Wɔi wo ga kaaliiti, pɛɛɠaali zuwuzuiti! Wa zoo ɠizosu ɠale peelalai ma, undaaʋili abui zu? 34Naa ɠa é ba, wɛlɛ, nà GALA goo wo nuiti ta ɠima nuiti teʋesu wo ma, naa ʋɛɛ kalamɔinti ba. Wa tanigaa ʋaa, wo tanigaa ɓadɔ saa wului ma, wo ɗa tanigaa loɠa ga kpakɔi wa-ƓALA dɛbi ʋɛlɛiti bu, wo ʋilɛ tanigaa ʋolu ga wɔinzeɠemai taa wolai ɠilagilagiti pɛ su, 35naa ɠa a kɛ sɔbalala nuiti kpein ti ʋaai, ti-ma ɲamai la wo unma, é zo Aɓɛle ma, é zeeli Ɓalaki ná-doun zunui Zakali ma, nii wo paani seizu ɲadegaiti zɔɠɔzuʋɛ ta zalaɠa ɠulazuʋɛ. 36Gè bo wo ma ga gaamai, naa pɛ ka la niizuʋɛ nuɓusɛiti unma.
Yesu ɠɔlɔ vai Zeluzalɛme ná-faa zu
(Luke 13:34-35)
37«Ee, Zeluzalɛme, Zeluzalɛme, ɗɛi ɗa ɗa GALA goo wo nuiti paa, è ɗa yɛ naati sɔɔzu ga kɔtui eyɛsu ti za, niiti GALA ge ti leʋesu è ma! Wɔin wola ɠɛa mà ga gè è zu nuɓusɛiti gaalɛ ba kòbaʋɛ, eɠɛʋelei tɛɛ leei a ɗa ma yiʋoiti gaalɛ la ba koʋegiti bu! Kɛlɛ wo la vaani bu pɛ! 38Wɛlɛ, wa-ʋɛlɛi wuuɲakai ɠana yɛ ɓɔɠɔ yeema. 39Tɔɔzei gè bo wo ma, wo la mɔ ɠaazulaa mà pɛ, eyɛsu voloi wa ɠɛ la ma: ‹Maliɠii tuya loo naama nui ʋɛ, nii é ʋaazu daaseigi zu!›#23:39 Guy 118:26.»
Currently Selected:
Matiyo 23: GDZ
Highlight
Share
Compare
Copy
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
