Wozé 7
7
1«Siɛgi zu gè ɠɛɛzu la gè naa valibo,
nii seiɗai nà-nuɓusɛi Izilayɛle luɠɔ, gè kɛdɛ,
názu ɠa Efelayime ná-faaɠaazagiti ta Samali ɠɛɛwoti ɲɔiti ta ɠula la kɛlɛma.
Ta tooma vaiti kɛɛzu,
unma nuiti ti ɗa lɛ pɛlɛiti bu,
toosu nuiti ti ʋilɛ koi yɔɠɔzuʋɛti.
2Tanɔpɛ ge la bosu ɠisu ga faa ɲɔi kpein ti kɛɛzu,
nɔ̀un gè faa ɠwɛɛ su.
Niizu niina, ta-ɠɛɛwotiiti ti ti ɠilia kpekpe,
gàazu ɠa naati pɛ ba.
3Ta masagi ɠaamɔlɛzu ga ti-zɔ ɲɔiti,
ti kundiɠiiti gaamɔlɛ ga ta-yaava vaiti.
4Ti kpein ta ga wɛɛnzo nuiti.
Ti ɠulaʋɛ ga sulugi, ɓulu loɠa nui suɓadiai ga abui,
é la mɔ ɓɛdɛni suɓadi vaa ma,
é zo ɓulu vukɔi ɠaayɔ siɛgi ma, eyɛsu é ɓokolo.
5Ta-masagi ná-fɛti ɠula voloi,
kundiɠiiti ta ɗa ɓɔɠɔ ɠɛ ga seeɓɛ nu, ti ɓadiai ga dɔɔi.
Ɲɛɛɠulasu nui naati ka masagi a ɗa yeemaale ti ma.
6Ta ɗa maaɓuɠa ba,
ti-yii zuɓadiai eɠɛ ɓulu mɔ sulugi, woyai ɠili vai ma.
Ti ʋɛɛni yiima ga ta-yiiɠaawanai kpidii ɲɛgɛlɛin daawu.
Kɛlɛ geelaalaogai ma, é soni eɠɛ abu wola.
7Ti pɛ ti ɓadini eɠɛ ɓulu mɔsuʋɛ,
ta ta-ɠundiɠiiti galazu mulukulu.
Ta-masagiti kpein ta ɗa loo bu ga gilagila,
tama tanɔpɛ ge la ɗa ga wooɠulaa nɔ̀un ma.
8«Efelayime ɓɔɠɔ zupua ga zɔɔma ziiti.
Efelayime ɠulaʋɛ ga ɓului nii ti la tatini.
9Wɛɛinti ta suvikɛi ɠulazu, é la loozu ga naa.
Nɔundeɠaiti ta ga ɠole, é la gaaɠaazu.
10Izilayɛle ná-wasogi ɠa zeele wooi wosu daalɔɠɔma.
Niima maanɔɠɔi kpein seiʋɛ ti ma,
kɛlɛ ti la gàazaɠani,
ti la ɠaleni ma pɔ̀, nɛ̀i gè ga Ɠɔoɠɔ GALAGI, ta-ƓALAGI.
11Efelayime ɠulaʋɛ ga dɔɓɔ ʋoopogi,
kpɔlɔ ge la un su, é la ɠeleɠeleni.
É Ezipete loligɛ, é ɓizɛ, é li Asiili ʋolu.
12Kɛlɛ siɛgi zu é ɠɛɛzu liizu la ná,
nà nà-wɔni zo tumɔi ʋilisu ma,
gè too bu eɠɛ wɔnii.
Nà ʋaazu maaɠolozu, siɛgi zu gè goomɛnisu da é ɗa ɠaalɛ ba.
13Maanɔɠɔi ɠa ti luɠɔ, mazɔlɔɔ ta ʋelazu bà.
Nimizai ɠa ti luɠɔ, tɔɔzei ti ɓakagɛ dàalɔɠɔma.
Nɔ̀un nà la ti unmɔɔ,
kɛlɛ tɔun, ta ɠɛna ɓɔɛa pɔ̀, zɛɛi ɠa ti bosu.
14Siɛgi zu ti kpalagi wosu da ta-ʋeteiti su,
ti la wooɠulazu mà ga ti-yii pɛ.
Siɛgi zu ti ɓɔɠɔ maazaɠazaɠazu la,
nii a kɛ ti moloi ta dɔɔi zɔlɔɔ,
nà ɠa ti ʋoluavesu bà.
15Nà ɠa gè ɠɛni ti ɠalasu, gè ti zɛbɛlɔ,
faa ɠili nɔpɛ ge la ɠɛni ti ɠisu é lo bà, kɛni faa ɲɔi nɔ.
16Ti la ɠalesu ma naa ʋɔ, nii é anii pɛ maazu,
ti pɛ ti ɠulaa ga mɛɛin nii poolaai.
Ta-ɠundiɠiiti pɛ ta zaazu kɔɔi zu,
tɔɔzei poomu gooiti ba ti ti wosu,
naa ɠa é ti ɠɛɛzu ga ɲɛɛɠulasu anii Ezipete yooi zu.»
Currently Selected:
Wozé 7: GDZ
Highlight
Copy
Compare
Share
Want to have your highlights saved across all your devices? Sign up or sign in
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.
